للي مقدم على شراء لانسر الشكل القديم دي عيوبها بكل صراحة وبدون تعصب !!

**شاهين - بنز** · 11-12-2007 08:07 PM

والله ياجماعة أنا مش هدفي من الموضوع ده إني أنكد على إلي إشتروها أنا هدفي بس من تجربتي للعربية أوضح للي ناوي يشتريها

1- صوت المتور مش بس عالي جدا لأ وخشن كمان وبتحس برجرجة خفية وإنت ماسك الدريكسيون

2- حتى وانت ماشي على 50 بتسمع صوت الكوتشات والشارع والعربيات إلي حواليك وطبعا لو عديت ال 100 حتفاجأ من كمية الصوت المزعج عزلها زي الزفت تحس إنك راكب عربية موديل 75 يعني لو مسافر بالعربية ربنا يعينك

3- العفشة ناشفة قوي وأما تحود على سرعات عالية بتحس إن العربية حتفلت منك

4- أما تيجي تنزل الكرسي بينزل لوحده بدون مقعد الظهر وتحس إنك ضهرك حيكسر

5- الكرسي بتاعها غير مريح بالمرة ومفيهوش أي إنحائات تحس إنك قاعد على مسطبة

6- الباور بتاعها عادي جدا ومفيهوش جديد وإنت ماشي وحبيت تغير الحارة إلي ماشي عليها الدريكسون بيقى خنيق وتقيل

7- بالنسبة لل 1600 الأوتومالتيك لو حرقت على العربية بتلاقي الفتيس سخن منك وطلع ريحة شياط بس خفيفة

8- الفرامل بتصفر في 90% من عربيات الانسر

9- منتشرة أكتر من التاكسي ودي حاجة تخنق إلي شاريها ونفسه يحس بالتميز

10- الكاسيت الأصلي بتاعها صوتو وحش جدا هو والراديو بس مسمعتش صوت السيدي بتاعها

ومش فاكر دلوقتي باقي العيوب

نيجي للمميزات:

- مساحة الأرجل للكراسي الخلفية كويسة
- المكيف مش وحش
-سعر إعداة البيع أكثر من ممتاز
وفي النهاية دي مش أحسن عربية في فئتها ولو بصينا للإنترا وكورلا (الشكل القديم) والفوكس الخليجي حنلاقي عيوبها أقل بكتير

العربيات إلي جربتها
لانسر 1600 أوتوماتيك
2 لانسر 1300 جير عادي

**Ahmed Anwer** · 11-12-2007 08:48 PM

طبعا بعد الشكر علي الموضوعية و الحيادية و هوا ده اللي إحنا عايزينه في المنتدي مش كل واحد يقعد يقول شعر في عربيته و خلاص ،،

لأن مش عيب و لا حرام إن اجدع عربية يبقي فيها عيوب خاصة علي رأي م / سبعاوي ( مش عارف هوا مختفي فين ) لسه العربيات في بلدنا اللي في رينج 100 الف مش هتبقي كاملة الأوصاف ،، و بتهيألي و لا حتي اللي بمليون جنية

هاقول لحضرتك تحليلي لموضوعك رغم إني مش من مالكي اللانسر ،، بس طبعا ركبتها كتير لأني مصري

أي حد بيشتري عربية تجربته بتمر بتلات مراحل : _

1- السعادة و الإنبهار بالعربية الجديدة في بداية الشراء و التجربة .

2- بيروح الإنبهار و السعادة بعد شوية و مع التعود و يبتدي يكتشف إنها مش عربية الأحلام ،، و فيها حاجات مضايقاه

3- بعد العشرة الطويلة ،، يثق فيها و يقدرها عشان عمرها ما قصرت معاه ، و ما كسفته و شلته هوا و اسرته و لما حد يسأل عليها يقولوا هوا في زيها دي جنيه دهب ،،

و اروح انا و انتا و غيرنا نشتري لانسر تاني ،،،

غالبا حضرتك دلوقتي في المرحلة الثانية ،،

**boody2** · 11-12-2007 08:59 PM

بعد اذن حضرتك و من غير زعل هي العربية الي حضرتك بتوصفها دي لانسر و لا عريبة 124 مع كامل الاحترام لل 124

**Mohamed El Sokkary** · 11-12-2007 09:06 PM

بتقول بدون تعصب طب لو بتعصب كنت حتقيم الحد علينا لاننا اشتريناها

**شاهين - بنز** · 11-12-2007 09:42 PM

بعد اذن حضرتك و من غير زعل هي العربية الي حضرتك بتوصفها دي لانسر و لا عريبة 124 مع كامل الاحترام لل 124

لأ مفيش زعل ولا حاجة بس أنا قصدي بقارن عيوبها بالنسبة لباقي السيارات الجديدة من فئتها

بتقول بدون تعصب طب لو بتعصب كنت حتقيم الحد علينا لاننا اشتريناها

والله صدقني مفيش تعصب خالص وأنا مكتبتش العيوب دي إلا بعد ماسقتها مرارا وأكتر من عربية كمان
والعيوب إللي أنا كاتبها مش رأي لوحدي وآدي موقع ريفيو بيأيد كلامي http://www.whatcar.com/car-review-full.aspx?RT=718#Road
ولوشايف إن في عيب كتبته على العربية مش صحيح أو في تعصب حكون سعيد جدا لو نناقشه مع بعض

**شاهين - بنز** · 11-12-2007 09:55 PM

وأشكركم جميعا على المشاركة وأنا ياأستاذ أحمد أنور أنا بدأت على طول بالمرحلة التانية ومعاك حق في كل إلي قلته

**nobody** · 12-12-2007 06:56 AM

"تم حدف هذة الجملة بواسطة الاشراف للشخصنة- تنبيه للعضو نو بودى -هذا الأسلوب غير مقبول فى هذا المنتدى"

لو هو بيقارن اللانسر بالميجان او السيفيك يبقى غلطان تماما لأنهم فئة سعرية مختلفة
و بعدين مادام العربية مش عاجباه اشتراها ليه , كان ممكن بنفس السعر يجيب ميجان بانوراما مستعملة؟؟
أرجو من المشرفين حذف هذا الموضوع لأنه عبارة عن تضليل ليس الا
"تنبيه للعضو نوبودى- ليس معنى اختلافك فى الرأى مع صاحب الرسالة الأصلية ان يتم حذف رسالته"

**محمد عز** · 12-12-2007 08:18 AM

- صوت المتور مش بس عالي جدا لأ وخشن كمان وبتحس برجرجة خفية وإنت ماسك الدريكسيون
هوا صوت الموتور نوعا ما عالى بس مش عالى اوى لكن عمرى ما حسيت برجرجة

حتى وانت ماشي على 50 بتسمع صوت الكوتشات والشارع والعربيات إلي حواليك وطبعا لو عديت ال 100 حتفاجأ من كمية الصوت المزعج عزلها زي الزفت تحس إنك راكب عربية موديل 75 يعني لو مسافر بالعربية ربنا يعينك
لا ياراجل مش للدرجة ده

الكرسي بتاعها غير مريح بالمرة ومفيهوش أي إنحائات تحس إنك قاعد على مسطبة
حرام عليك

بالنسبة لل 1600 الأوتومالتيك لو حرقت على العربية بتلاقي الفتيس سخن منك وطلع ريحة شياط بس خفيفة
انا كان معايا 1600 اتوماتيك عمرها ما حصل فيها كده

الفرامل بتصفر في 90% من عربيات الانسر
يبقى انت اكيد بتكلم على عربية تانية غير الانسر