الموضوع: نصائح لشراء الشاهين ( من تحف سبعاوي )

الشاهين لا تختلف عن اية سيارة أخرى فى اسلوب شرائها ، فلا يوجد ما يعيب المستعمل منها بشكل خاص، باستثناء امر واحد، هو الكورونا التى يحدث ان يتسرب زيتها من بعض المهملين مما يؤدى الى تآكل تروسها وسماع صوت ونة مع السرعات العالية
فيما عدا ذلك فما ينطبق على الشاهين فى الشراء ينطبق على غيرها
كشف المحرك -فى الشاهين او غيرها: بعد دوران السيارة وتمام سخونتها (خمسة دقائق لو اول مرة فى الصباح او دقيقتين فى اى وقت آخر فى اليوم) يجب ان يكون صوت المحرك هادئ ومنتظم ولايوجد به تخبيط، ولا يوجد بخار زيت من خرطوم الفايظ(الخرطوم الرفيع الواصل بين ماكينة الزيت وعمة الكاربراتير، يتم الكشف علية بفك عمة الكاربراتير وملاحظة عدم خروج بخار زيت من مكان اتصال خرطوم الفايظ بها مع كبس البنزين بشكل خفيف)، وكذلك لا يسمع صوت تسقيف عند الحركة بالسيارة على نقلة عالية وسرعة بطيئة (50 على الرابع مثلا) ولغير الخبراء ينصح بالكشف على كبس المحرك فى محطة بنزين موثوق بها
الفتيس: يجب ان يكون الفتيس سهل التعشيق فى جميع النقلات صعودا وهبوطا ولا توجد عضة
الكورونا: عدم سماع صوت ونة من السيارة
هيكل السيارة، يجب الإطمئنان الى ان السيارة لم تصب فى حوادث ضخمة او تنقلب، وجود بوية الفابريكة بدواخل السيارة بالكامل يطمئن ان السيارة لم تتعرض لحوادث ضخمة، فى حالة دهان الدواخل يجب مراجعة السيارة بواسطة سمكرى موثوق به للإطمئنان الى ان السيارة لم تمر بحوادث ضخمة، سهولة فتح وغلق الأبواب وعدم وجود بوشان فى مفصلات الأبواب يشير الى ان السيارة معتنى بها
العفشة:مثلها مثل ايه سيارة اخرى،فساد المساعدين يسبب قوه الإحساس بالمطبات، فساد علبة الديريكسون يؤدى الى سماع تخبيط شديد فى المطبات ومثله فساد بيض المقصات، اما فساد كاوتشات المقصات فيؤدى الى عومان السيارة، ولكن عموما عفشتها رخيصة جدا
الصالون:يجب التأكد من عدم تشقق التابلوه ، لأن إصلاحة لن يعيده مثل الأول كما ان الجديد غالى جدا

وفى النهاية فإن المنظر العام للسيارة-مثلها مثل ايه سيارة مستعملة اخرى ترغب فى شرائها- يجب ان يكون مريح، يعنى لما تبص على السيارة من على بعد عشرين متر مثلا تحس انها حتة وحدة، مش معووجة ولا مكفية ولا ملووحة ، وتحس ان كلها مية واحدة ش كل حتة فيها مفارقة اختها، للسهولة بص على واحدة جديدة واحفظ شكلها فى دماغك للمقارنة

انا تعاملت مع الشاهين ذات الكاربوريتور ، وهى ممتازة والكاربوريتور بتاعها ويبر وهو بعتبر من افضل ماركات الكاربوريتور ، لكن ذات الحقن الإلكترونى ركبتها بس ماسقتهاش، بس ماسمعتش على مشاكل منها، الشاهين عموما طول عمرها لا مشاكل لها من ناحية دورة الوقود واستهلاكها فى الوقود معقول

رأييى لو انت عايز تركب شاهين مستعمل دور على موديلات من 1997 وحتى 2003 (الموتور التمبرا والكاربوريتور الويبر) وافضلها السيارات موديل النص التانى من 2002 وموديل 2003 ، علشان تابلوهها احدث (مفتاح النور فى الدراع زى الكورى واليابانى، مفاتيح فوانيس الشبورة والإنتظار تاتش) ومزودة بفوانيس شبورة ومرايات بومبية ومجهزة لتركيب سنتر فى الشنطة
وفيه منها بالباورستيرنج والتكييف ، ومن اول 2003 فيه 1600 غير طبعا ال1400 الموجودة فى كل الموديلات

الخلاصة: اهم حاجة فى السيارة الشاهين المستعملة -بعد الإطمئنان على سلامة هيكل السيارة-هو الإطمئنان على صحة الكورونا، ثم سلامة الجير بوكس، ونظافة الصالون وسلامة التابلوه، لو الموتور مفوت ممكن تاخد العربية بعد الفصال فى ثمنها بما يوازى تكلفة العمرة،
وعموما الشاهين من العربيات التى يسهل العثور على واحدة منها مستعملة بحالة جيدة ، اولا: لكثرة الموجود منها، ثانيا: لانها سيارات تحافظ على كيانها لسنوات طويلة

القرق بين الشاهين 1400 وال 1600

الفرق الأول: المحرك، الشاهين 1400 محركها سعة 1400سى سى ، بنظام كامة علوية مفردة و8 صبابات وحقن الكترونى للوقود، بقدرة 82 حصان عند 4400 لفة فى الدقيقة، وأقصى عزم 170 نيوتن متر عند 1800 لفة فى الدقيقة، الفتيس خمس نقلات امامية وواحدة خلفية،نظام الدفع الخلفى عن طريق عمود كردان يرتبط بالفتيس عن طريق وصلة مرنة(كاوتشوك) ويرتبط بالكورونا الخلفية بوصلة صليبة، نقل الحركة من الكورنا للعجلات بنظام دفرانس من قطعة واحدة تربط العجلات بالكورونا بمحاور النقل

بالنسبة للشاهين 1600: نفس تصميم المحرك ولكن بسعة 1600 سى سى وقدة 96 حصان على 4400 لفة فى الدقيقة وعزم اقصى 230 نيوتن متر عند 240 لفة فى الدقيقة،

طيب الأرقام المكلكعة دى ملخصها اية فى احساسى وانا جوة العربية، ببساطة الشاهين 1600 تجميعها وسحبها احسن شوية وخصوصا فوق ال 100 كيلومتر، سرعتها القصوى 170 فى حين ان ال1400 سرعتها 160

الفرق التانى: التكييف، الشاهين 1400 مافيهاش تكييف وال1600 فيها تكييف، تكلفة تركيب التكييف لل1400 حوالى 3500 جنية بالإضافة الى انك بتلغى التكييف السخن الموجود فيها علشان تركب التكييف البارد فى حين ان ال1600 فيها بارد وسخن

الفرق التالت وهو اللى انا شايف انه الأهم على الإطلاق هو الباور ستيرنج: ال1600 فيها باور ستيرنج ، ودا طبعا بيفرق احساسك بقيادة السيارة تماما،ال1400 مافيهاش، صحيح انه ممكن يتركب، بس تكلفة التركيب مش اقل من 3000 جنية وعمره ما هيكون مظبوط زى بتاع المصنع

فيه فروق اخرى بسيطة، ال1600 زجاجها غامق، ودا بيعزل الحرارة شوية فى الصيف ودا شئ مهم للتكييف، وفيها سنتر لوك(تكلفة تركيبه لل1400 حوالى 150 جنيه، وشكل طاساتها مختلف!!!!!!! فيما عدا ذلك السيارتين فيهم نفس التجهيزات،عداد RPM وساعة وفوانيس شبورة امامى وخلفى وكاسيت والأبواب مدعمة بقضبان امان وفقل امامن للأطفال فى الأبواب الخلفية

فى رأييى الشخصى ان الفروق فى المحرك والتكييف والباور تساوى الفرق فى السعر، ولكن فى النهاية هى مسألة رغبات واستعداد مادى