الموضوع: عايز معلومات عن عبده الميكانيكي

المشاركة الأصلية كتبت بواسطة mmamdouh

تحبوا اشترك ولا تزعلوا؟؟؟؟؟

mmamdouh

فى انتظار رايك وتعليقك بمزيد من التفصيل

طيب... خللينا نبداء

اول حاجة انا عرفت عبدة من حوالى 7 او 8 سنين مش فاكر بالضبط... و انا ساعتها احتاجت ميكانيكى عشان اعمل صيانة 40 الف و كانت عربية الوالد خرجت من الضمان بالتالى التوكيل مكلف على الفاضى... اللى دلنى على عبدة واحد قريبى كان شغال فى مبيعات فولفو و قاللى انة شغال فى التوكيل... و لولا كدة مكنش رحتلة لان العربية كانت جديدة و مش طالبة حد يعك فيها

لما رحت وقفت جنبة و هو شغال فى عربية تانية عشان اشوفة و هو شغال... من البداية حسيت انة منظم و مرتب و ميحبش الكروتة... لكن ميحبش يحس ان حد واقف فوق دماغة او بيراقبة او بيعدل على شغلة... انا شخصيا فى شغلى محبش كدة فا مقدرش الوم علية او اعتبر دة عيب فيه... و لما سالتة عن شوية حاجات كدة لقيتة فاهم هو بيقول ايه و عندة معلومات كويسة و بيعرف يحلل العيوب كويس و يجيب كل الاحتمالات للعطل

المهم لما بداء يشتغل فى عربيتى برضة تابعتة من بعيد و شوفت انة فاهم هو بيعمل ايه... طريقة الشغل مرتبة و منظمة و بيخلص الشغلة فى وقت كويس... ساعة الحساب قيتة مكلف شوية عن ما كنت متوقع لانى فى دماغى حسابات ميكانيكى عادى بس قلت مش مشكلة... ما انا لو روحت التوكيل كنت دفعت اكتر... و كان هو هو اللى حيشتغل فى عربيتى فا انا دفعت اقل و اخدت نفس الخدمة و الحرفية

دة كا وصف لعبدة من ناحية الحرفة... الراجل لا غبار علية و فاهم كويس اوى هو بيعمل ايه

من ناحية الورشة بتاعتة و الناس اللى معاه... هو عندة حاليا حسن الكبير و الصغير و عصام (تايسون)

حسن الكبير و الصغير ميختلفوش عن بعض كتير... الاتنين فاهمين و ليهم خبرة... بس طبعا مش زى عبدة... و كل واحد فيهم عندة مشكلة

حسن الكبير لو هو اللى حيحاسبك حيحطك على المقصلة و انا شخصيا اتظبطت منة مرة و قلت لعبدة على الحوار دة و من ساعتها انا بحاسب عبدة فقط لاغير... و نفس الكلام اشتكى منة ناس هنا و بلغت عبدة بيه و قاللى "خللى الناس تحاسبنى انا شخصيا و لو انا مش موجود يكلمونى اعرف الشغل اللى اتعمل ايه و اقولهم حسابهم كام"...

حسن الصغير عندة مشكلة تانية و هى انة احيانا لو قابلة مسمار... اما يتعافى علية و يكسرة او يربطة اى كلام... و انا جربت الاتنين و بالتالى ببقى فوق دماغة لما بيربط او يفك حاجة

عصام مكنش بيقعد كتير فى الورشة فا متعاملتش معاه كتير و مش لاقى عيوب فيه حتى الان... طبعة ميزتة الاساسية - بما انة تايسون - فا هو احسن واحد يربط عفشة هناك

دة وصف الناس اللى مع عبدة

بالنسبة لطريقة الشغل... طبيعى اى ميكانيكى بيجرب العربية لما تبقى بتشتكى منها و بيفحص كل حاجة و يقولك ايه العيوب... حتى لما بتروح التوكيل تعمل صيانة بيتكتبلك على الjob ان العربية محتاجة كذا او الصيانة التالية حتحتاج تغيير كذا... عبدة بيعمل كدة بالضبط و بيكتبلك لستة باللى فى العربية عشان يبقى الراجل كشف على كل حاجة و اداك تقرير باللى فيها

قطع الغيار ممكن هو يجيبهالك او انت تجيبها... مش فارق معاه... و ممكن لو انت زبونة يبعت حد بالموتوسيكل يجيبلك الحاجة لحد عندك... لو الحاجة استيراد و هو راح جابها بنفسة او انتوا مع بعض بيبقى هو مسؤل لو حصل فيها حاجة... لو انت جبتها بنفسك تبقى القطعة مسؤليتك طبعا

دة باختصار الوصف للراجل و الناس اللى معاه و طريقة شغلهم... نيجى بقى للكلام اللى كان قصدى علية و ممكن يزعل

بالنسبة للفلوس فا فيه ناس بتبقى مش عايزة تدفع فلوس و خلاص بغض النظر عن الشغل اللى اتعمل و بالتالى بالنسبة لهم اى مصنعية غالية و خلاص... و اعتقد ان معظمنا عارف ان الراجل صنايعى شاطر و من حقة يقدر نفسة و شغلة... مع مراعاه انة نفس الشخص اللى بيشتغل فى العربية لو رحت التوكيل و ساعتها حدفع اكتر بكتير... نا عملت موضوع قبل كدة عن شغل عملتة هناك و طلبت تقدير الناس و الحمد لله تقريبا كل الاراء قالت اسعار اعلى من اللى دفعتها بالفعل... و الطريف ان فيه زميل علق و قال الشغلة كلف كذا و لو عند عبدة تكلف ضعف المبلغ فى حين ان "كذا" دى كانت اقل من اللى دفعتة بالفعل

و الفكرة هنا برضة ان اللى مشتغلش بايدة بيفتكر ان الحوار سهل... انا بشتغل بايدى و بعرف اقدر حجم المجهود اللى بتحتاجة كل شغلة و ايه الصعوبات اللى فى كل عملية... يعنى ممكن الصنايعى ابو شلن يكسرلك مسمار او يفوتة و كروتلك حاجة فى التركيب تعملك مصيبة... انا شوفت عربية قطعت كاتينة و اكتشف ان الميكانيكى اللى قبل كدة كسر مكان تركيب الشداد فى طلمبة الزيت و لحمة اى كلام و ركب و الشداد كان معووج و قطع الكاتينة و العربية جابت صبابات... و فيه زميل هنا كان بيشكى من عدم ضبط الموتور و اكتشف ان زنبة الكامة مكسورة و الترس بيلف على العامود و العربية تخلف تقسيمة... اهى دى اخطاء واحد باخد ملاليم بس بيلبس الزبون فى الحيط

فيه ناس تانية بتحب تفتى و تالف... و اعتقد احنا شوفنا اطنان من محبى الافتاء و دول بيحبوا يقاوحوا فى التشخيص اللى قالة الراجل و يخترعوا اسباب اخرى... طيب ما الراجل خبرة و شغال فى التوكيل و اجعص عيب فى الدنيا بيعدى علية 20 مرة بالتالى الراجل مش محتاج يالف او يقول اى رغى... و لو مش عارف بيجرب و يحاول يوصل للسبب فا طبيعى لما حد من دول يرغى كتير الراجل يبقى مخنوق منة و مش عايز يتكلم معاهم ولا يحب انهم يحشروا نفسهم فى شغلة

فيه ناس تالتة بتبعتبر ان الراجل لما يشرحلهم المشاكل اللى فى العربية او يوضح ان فيه شغلة معينة ممكن تفتح معاهم ان الراجل عايز يشتغلهم... هو لما الراجل يقولك عربيتك فيها كذا و كذا و كذا يبقى بيشغلك؟؟... امال ايه معنى كشف؟... و طالما انت راجل فنى جامد كدة طيب ما قولتلوش ليه على العيب من البداية و قولتلة يصلحة على طول و خلليتة ميكشفش؟؟؟؟... الاهم من كدة ان اراجل مش بيجبر حد على حاجة ولا بيفرض على حد يصلح عندة... يا جدعان دة فيه ناس بتروحلة و يقولولة انهم من طرفى و يخللوة يكشف على العربية و فى الاخر بيمشوا من غير ما يدفعوا ولا مليم اساسا...

و طبعا الناس اللى فاهمة عارفين كويس ان شغل العمرات عمرة ما بيبقى معروف الا لما الحاجة تتفك و تبان قدام عينك و على اساسها تحدد ايه حجم الشغل بالضبط بالتالى الراجل بيوعيك للموقف و بيعرف الدنيا ممكن توصل لايه... مش معنى كدة انة حيغير كل حاجة تقابلة حتى لو كانت سليمة لان الموضوع مش عافية ولا الراجل ضميرة ناقص عشان يضحك على زبون... و على فكرة هو عمل معايا كدو لما وديتله عربية عمتى و لما فكينا لقينا الموضوع طقم شمبر و بس.... و تعالوا نتخيل لو الموضوع اتعكس... انت اتقالك ان القصة شمبر فقط و بعد الفك لقيت السبيكة ضايعة و الكرنك عامل ريجة... حتبقى مبسوط ولا حتقول الراجل فتح فى العربية عشان يعمل شغل؟؟؟ دا كمان ساعتها حتبقى قدام الامر الواقع و عربيتك مصارينها برة و حتعمل اللى الصنايعى بيقولك علية من سكات... و الله الناس امرها غريب... توعيهم على كل الدنيا يقولك دا بيفتح شغل... تسيبهم للظروف يقولك برضة بيفتح شغل

فيه رابعة بقى تروح تعمل صيانة فى اى خرابة من ابو شلن اللى انتوا عارفينة مرة و اتنين و تلاتة لحد ما العربية تبقى كنبة... و بعد الياس من العربية يروحوا لعبدة... طبعا الراجل بيطلع كل العيوب اللى فيها و يطلب تغيير ملون حاجة لان نصهم مش نافع و النص التانى مش بتاع العربية اساسا و تلاقى الزبون مش عاجبة و عايز يعمل لعربية من الاول ببلاش... او عايز يكمل مسيرة العك و عبدة مش بتاع عك... عبدة ميعرفش غير الفابريكة و بس (انا و مصطفى قعدنا نقنعة ان النوبيرا بينزل فيها مكنة 2000 سى سى برة عشان يرضى يسقط المكنة فى عربية مصطفى لانة كان رافض الفكرة لانها فابيركتها 1600... لو كان بتاع اشتغالات و مادى كان وافق و خلاص)... او تلاقى ان كل عيب عايز تصلحة محتاج تغير معاه حاجتين تلاتة عشان الدنيا تمشى صح و ساعتها الناس بتقول انة بيفتح شغل او او سابوة يشتغل و صلح كل حاجة فعلا و طلب فلوس بعد ما الجثة تتحرك و تبقى عربية يقولك اصلة مادى و بيغالى فى المصنعية

دى حاجات كدة فى السريع و لو افتكرت وقائع تانية حقولكوا عليها

MMamdouh