طلب مساعدة اشترى a516 اوm11

**ahmeddarhos** · 22-01-2010 10:00 PM

ال M11 طبعا ......أشيك وأداء أحسن .. العربية معاى من شهرين والحمد لله زى الفل وطول ما أنا ماشى فى الشارع الناس بتسألنى عليها... لكن فكرة انك تركب عربية مالية البلد كتاكسيات أعتقد انها مافيهاش خصوصية.. والعربية الى حد ما بتفقد رونقها....
و أخيرا ربنا يوفقك للقرار السليم

**market_profile** · 23-01-2010 12:48 AM

المشاركة الأصلية كتبت بواسطة Ghost2

بص انا هقولك للامانة .. انا رحت فورميولا الاهرام .. وشفت ال m11 وركبتها .. تقفيلها مش حلو خالص .. وده رأيي يا شباب .. انا شايف ان اعلى تقفيل في الاسبيرانزا هو التيجو .. وحتى الان مشاكلها قليلة جدا .. وكلها فردية .. واستنو تقريري عن اسبيرانزا من معرض فورميولا بس انا مش مصور حاجه على فكرة .. عشان يعني مش مستاهله اصور عربيات احنا عارفين شكلها ايه

كلام سليم التيجو تقفيلها جميل جدا و ال 516 تقفيلها معقول لكن M11 مش حلو خالص و انا مكنتش متوقع انها تكون كده بعد شكر ناس كتير فيها بس يمكن اللي محطوطه في المعرض دي حاله فرديه مش عارف حتى لما فتحت الكبوت حسيت ان تجميع الأجزاء مع بعضها مش حلو خالص بالمقارنه مع 516 و بلاش اقارنها بالتيجو عشان مفيش مقارنه !!!

و المعرض بجد فيه مفاجآت جامده زي ان 620 بتتباع في المعرض ب 95 ألف

و التيجو اوتوماتيك ب 105 و معاها عتب و اكصدام خلال فترة المعرض

كمان انا اتفاجئت من الماهيندرا اسكوربيو عربيه دبابه و ديزل و اوتوماتيك استيب ترونيك و ايرباج و ABS و تقفيلها فوق الممتاز كل ده ب 139 الف انا كنت فاكرها ب 300 الف مثلا

بجد سعرها ممتاز بالنسبه لامكانيتها و لو كان معايا تمنها كنت اشتريتها بدون تفكير في اي نوع تاني

الي غالي في المعرض هوا البريليانس الجديده FSV بتبتدي ب 85 الف الى 99 الف مش عارف ليه يمكن عشان ال Smart Key !!!

في عربيات صيني كتير في المعرض بس مجهولة الهويه مع ان توكيلها ابو غالي و منزل عليها ضمان 3 سنوات غير محدد بكيلو متر (بيقلد مرسيدس و بي ام) ههههه بس هما سنتين بس

كمان في العربيه ال FAW نازل منها 3 حاجات

واحده سيدان 1500CC و اوتوماتيك ايزي ترونيك و بيقولو ماتور الياريس و عفشة تويوتا بس تقفيلها تعبان و تحس ان اكر الأبواب ممكن تتكسر في ايدك ودي ب 70 الف

و التانيه زيها بس مانيوال و هاتش باك ب 60 الف

و التاته 1600CC بس تقفيل ممتاز جدا و استيب ترونيك و فتحة سقف و تكييف ديجيتال و لوحة عدادات عامله زي الجيتا كده و بيقولوا ماتور فولكس فاجن و دي ب 110 الف و اعتقد انه كتير عليها عشان كده دخلت في شريحة السيراتو والكروز !!!

و كلهم ضمان 5 سنين او 100 الف كيلو

**hemaa_82** · 23-01-2010 01:34 PM

المشاركة الأصلية كتبت بواسطة ghost2

بص انا هقولك للامانة .. انا رحت فورميولا الاهرام .. وشفت ال m11 وركبتها .. تقفيلها مش حلو خالص .. وده رأيي يا شباب .. انا شايف ان اعلى تقفيل في الاسبيرانزا هو التيجو .. وحتى الان مشاكلها قليلة جدا .. وكلها فردية .. واستنو تقريري عن اسبيرانزا من معرض فورميولا بس انا مش مصور حاجه على فكرة .. عشان يعني مش مستاهله اصور عربيات احنا عارفين شكلها ايه

بس كانت تستاهل عيوب التقفيل من وجهة نظرك بالصور اكيد ؟؟؟؟؟ اصل الناس عماله |لكلكلكلكلكلك" دي تقفيلها احلا لا دي احلا لا دي لا دي .....

اللي شايف عيب يصوره و يورينا علشان نشوف و نفهم و ناخد بالنا .....

انا ركبت 516 و معايا 11 .... ال2 زي بعض بالنسبة للتقفيل " السوك و الفتحات و تناسقها مع مسارها " انما خامات ال11 اعلي شوية من ال516....

بس كدة

و السلام عليكم

**Ghost2** · 23-01-2010 04:31 PM

وانت حضرتك متعصب ليه يا استاذ هيما .. هو انا لو مش بحب ال m11 وبقول عليها وحشة .. هل ده يزعلك . في ناس كتير او بتكره عربيات موديلات عاليه من سكودا و فولكس وفورد .. ده طبيعي دي ازواق.. جودة التقفيل في حاجات حضرتك ممكن تتقبلها ويمكن انا لا .. يعني المسأله نسبيه .. وانا بقول رأيي للأمانه فقط لا غير . وشكرا

**market_profile** · 23-01-2010 09:26 PM

المشاركة الأصلية كتبت بواسطة hemaa_82

يا سيدي العزيز انا مش متعصب ... بس انا مستغرب!! الناس بتقول ردود مختصرة تحسسك ان الkeyboard هتخلص....يعني ايه تقفيل وحش.....ليه منبقاش موضحين ولا هوا الناس بتكتب توششوش نفسها ؟؟؟؟
لما اقول دي وحشة اقول علشان 1 و 2 و 3 علشان زي ماسعادتك تفضلت و قولت ان هية ازواق ....

و في الاخر كل هدفنا ايه؟؟؟؟؟ الافادة

و والله ما متعصب يا سيدي .. تجيب راسك ابوسها:oc_sun1[1]:

لا يا استاذ هيما ال m11 تقفيلها مش زي ال 516

بص كده على خامات بلاستيك هوايات التكييف و بص على درج التابلوه و شوف كده الغطا بتاعه بيقفل تمام و لا في زيادات

افتح الكبوت و بص بصه جيب عربيه 516 و حطها جنب ال m11 و قولي شايف ايه

انا لا معايا 516 ولا m11 فمليش مصلحه اختار دي على حساب دي بس انا بقول اللي شفته

**esam722** · 23-01-2010 10:16 PM

ياجماعة بلاش حماس احنا كلنا اخوات وبعدين الموضوع مش اهلى وزمالك العربيات فعلا اذواق وعلى حسب المقدرة المالية انا نفسى اجيب هامر بس المقدرة
بس بحاول اجيب اعلى امكانيات على قد الفلوس اللى معايا
وعلى فكرة مجرد دخولكو ومساعدتى فى الاختيار دى حاجة تستحق الشكر

**hemaa_82** · 24-01-2010 12:32 AM

المشاركة الأصلية كتبت بواسطة market_profile

لا يا استاذ هيما ال m11 تقفيلها مش زي ال 516

بص كده على خامات بلاستيك هوايات التكييف و بص على درج التابلوه و شوف كده الغطا بتاعه بيقفل تمام و لا في زيادات

افتح الكبوت و بص بصه جيب عربيه 516 و حطها جنب ال m11 و قولي شايف ايه

انا لا معايا 516 ولا m11 فمليش مصلحه اختار دي على حساب دي بس انا بقول اللي شفته

بالنسبة للخامات فهيه هيه ... و التابلوه عندي الحمد لرب العالمين مظبوط .... اما بقي اني افتح كبوتها جنب ال516 فايدك علي تمن 516 علشان انا مفلس و الحمد لله

ما تحيب ياعم راسك ابوسها

**market_profile** · 24-01-2010 01:08 AM

المشاركة الأصلية كتبت بواسطة hemaa_82

بالنسبة للخامات فهيه هيه ... و التابلوه عندي الحمد لرب العالمين مظبوط .... اما بقي اني افتح كبوتها جنب ال516 فايدك علي تمن 516 علشان انا مفلس و الحمد لله

ما تحيب ياعم راسك ابوسها

تني ا هيما بيه لا مش هيا هيا و ممكن حضرتك تروح المعرض و تتفرج بدل متروح تشتري 516 ههههههه

20 جنيه مش حتخسر معاك