الموضوع: هى دى مصر غصب عن عين كل الاجندات الخارجية-وفاة 4 أقباط أثناء إنقاذ مسلم سقط بـ"بيارة

المشاركة الأصلية كتبت بواسطة ashraf229

و الله ما بيشوف تصنيف للمصريين (مسلم) و (مسيحي) الا في الأعلام الله يهديه........

كلنا عايشين و مصريين و دي حقيقة مهواش كلام جرايد و شعارات عمر حد فيكم ركب تاكسي و اتضايق لأن السواق مسيحي و حاطط شعارات أو كلمات قبطية ولا حد ما اتعاملش مع بياع ولا محل لأنه مسلم و هوه مسيحي!! الكلام الغريب ده معرفش بيثيروه ليه كل شوية مع ان السواد الأعظم من الناس قلوبها نضيفة و طاهرة و عالأقل لو ما بيحبش التاني أو بيفضل يتعامل مع من هم من نفس دينه سواء نجارين أو صناعية أو نقاشين أو بياعين فهو عالأقل لا يكن لهم أي كره أو يحاول يؤذيهم..........

و الله عيب يا جماعة اننا ندور على أمثلة تثبت تلاحمنا و تسامح ديننا حيث قال أعز من قائل (ان أكرمكم عند الله أتقاكم) و غيره كتير...وقال رسولنا الحبيب -صلوات ربي وسلامه عليه-(لا فرق لعربي على أعجمي الا بالتقوى).........عيب والله يا أخوانا أنا عن نفسي في مجال عملي كل الكهربائية اللي بأشتغل معاهم أقباط و كل التجار و البياعين في الفجالة في محلات السيراميك و في المخازن هم أقباط و مسلمين مفيش فرق و الله والقهوة اللي قعدت سنين مع اصحابي أروحها كان بينزل الطلبات أحمد وده مسلم و شغال معاهم موظفينه يعني و أصحاب القهوة كانوا يوسف و عادل أخوه و فتحي كلهم مسيحيين و بيفطروا و يتعشوا و شغالين و كله بيتكلم عن الكورة و حرب العراق و همومهم واحدة مع الدنيا ما ضاقتش يعني انه اللي ماسك الطلبات كلها و الأرضية يكون مسلم لكن والله عمرهم ما فكروا في كده و أهم صعايدة من المنيا كلهم اهه و أحمد كان مثال للأنضباط و الأمانة و خفة الدم و الجدعنة..........المحترم محترم ايا كان دينه أو ملته أو جنسيته........

لا داعي في رأيي لأبراز مثل هذه الأخبار التي تظهر كأن الدنيا في مصر لسه بخير لأنها بخير و ستظل بخير بأذن الله و أنا بأتكلم عن نفسي و عن تجاربي الشخصية التي لم أفكر ابدا في الشخص اللي بأتعامل معاه دينه ايه و لو اكرمني أكرمته و لو أذاني أبتعدت عنه...........

خلينا بئى من الكلام ده اللي عيب نكرره و خلينا بنبني بلدنا و نجري على أكل عيشنا و نحب بعض كفاية بئى الناس شمتانة فينا و بيتفرجوا علينا شكلنا بئى وحش مش علشان واحد مسجل خطر و مرتزق و مجرم عمل حاجة و أهدر دم يبقى كلنا وحشين ولا علشان واحد مسيحي يجي يعملك مصيبة يبقى هما خلاص بقوا أعداء زيهم زي اسرائيل و ذيع يا 90 دقيقة و هلل يا قاهرة اليوم و عيشي يا منى الشاذلي و زغرتي ياللي انتي مانتيش غرمانة......و أفرحي ياللي انتي جارتنا و شمتانه.............

مصر بلدنا كلنا............مش هيحس بكلامي ده الا المحرومين منها و متغربين عنها.........

الله يفتح عليك
جبت المفيد والله
انا حاسس ان الاعلام هو فتنة للناس كلها

المشاركة الأصلية كتبت بواسطة maged

الف شكر للاستاذ سبعاوى على فتح الموضوع ده لان بصراحة كنت منتظر حد يجيب سيرة فى المنتدى باعتبار اننا اخوان وهمومنا كلها واحده وكان نفسى افضفض شوية لكن ترددت ولو سمحتولى افضفض اكون شاكر منتظر الرد

يا باشا طبعا أتفضل حضرتك مش محتاج أستأذان