الموضوع: تنظيف الكاربيراتير؟

تنظف الكاربراتير لما تحس أن المكنه بقت مخنوقه منك و الأفضل تروح البنزينه تجيب سائل بيتحط مع البنزين بيخلي الكاربراتير يبقي نظيف جدآ و تحطوا مثلا كل 500-1000 كيلو و الفلتر بتنظفه بهوا بس و لو تجيب فلتر k&n يبقي أحسن قوي و طبعآ ال92بنزين يفرق جااامد و الفرق بينه و بين البنزين ال90 كلام فاارغ فدايمآ حط ال92 عشان الكاربراتير كمان و حط من بنزينه نظيفه مش أي واحدة و أنا عن نفسي بأحط 95 و بالنسبه للمصنعيه للي هينظف الكاربراتير فهي بتختلف بس عمومآ هي بتبقي 100 جنيه و بص ما تخليش أي واحد ينظفلك الكاربراتير و بص بردوا أنا أحسن واحد شفتة في حياتي بينظف فعلآ محترف عن تجربة و فاهم قوي بس هوا اللي يعملوا بأيده مش الصنايعيه اللي عندة تقولوا هو غير كدة بلاش هو أشرف السني اللي في ميدان الجيش في العباسيه عند التوحيد و النور هتلاقيه جوا في الحارة و أسئل أي حد ألف من يدلك و خد بالك من نفسك الله يحفظك

شكرا وتعبت نفسك
الموتسيكل موديل 92
يعنى احطله 90 ولا 92
وبالنسبه للسائل ده
بيغنى عن التنضيف؟ واسمه ايه وبكام وبيعمل كام مره

وشكرا مره تانيه

الشكر لله ما فيش تعب ولا حاجه , المكنة حطلها بنزين 92 دايمآ و سائل التنظيف هيغنيك تقريبآ عن التنظيف اليدوي و سائل التنظيف هتلاقيه في المحل اللي بيبقي في البنزينه مثلا زي on the run أو محلات شل أو catlex بس من المحل مش من البنزينه نفسها لأ من المحل اللي في البنزينه و هتلاقي أسمه carpurater cleaner أو أي أسم تاني بيبقي مكتوب علي العلبه carpurater بس يكون أمريكاني أو ألماني لأنه كل النظيف أمريكاني و ألماني غير كدة ما تجبش و سعره من 11 لغيت 20 جنيه بس حلو جدآآآآآآآآ ممكن تستخدمه من 2 لغايت 6 مرات و أهم حاجتييييين ما تمشيش بالمكنه و البنزين قرب يفضي عشان الهباب اللي بيبقي في البنزين ما يبوظش الكاربراتير و تاني حاجه لما تحط بنزين وقف المكنه شويه و متدورهاش 10 دقايق كده عشان كل اللي في البنزين ينزل تحت و دايمآ غير فلتر البنزين أول بأول و بردوا يبقي أغسل الموتور و بعديها لازم تغير الفلتر و أه صحيح أوعي تحط سائل تنظيف الinjection اللي هو الرشاشات لأ بتاع الكاربراتير فقط حتي لو الراجل بتاع المحل أو الميكانيكي قالك ده ينفع أوعي تبوظ المكنه و أوعي تحط سائل تنظيف الموتور أكتر من 5 دقائق الموتور يبوظ منك و يفوت و دايمآ أهم حاجه عشان تحافظ علي المكنه أقراء الأرشادات بتاعت أي حاجه قبل ما تستعمل الحاجة اللي هتحطها أو هتستخدمها و خد بالك من نفسك و أمشي براحة الله يحفظك شر الطريق

ربنا يكرمك ويحفظك ويكفيك شر الطريق

إفادتكم على الراس

انا كنت بقرا الموضوع بصضفه بس عجبنى رد حضرتك جدا المعلومات الى فيه جميله جدا متشكرين قوى

الف شكر ياباشا على المعلومات بس ممكن توضيح منك انا كنت عاوز اعرف احط السائل ده ازى بالضبط

تحطه مع البنزين بس تملي التانك علي الأخر و بعدين تحط نص العلبه أو ربعها في التنك قبل ما تفول التنك أفضل و لو بعديها عادي بردوا و العلبه بستخدمها من مرتين لأربع مرات بس كدة الله يحفظك شرالطريق و خد بالك من نفسك السلام عليكم