باسم الله الرحمن الرحيم...
إزيكم يا رجالة, عاملين ايه, كله تمام ؟
أنا انهارده رحت ال Test Drive Event اللي عاملاه Proton, وبصراحة الجو كان سيء جدا, ومطرت علينا شوية للأسف.
ياجدعان مش هينفع كدة بعد كدة لو فيه أي تجمع يخص عربيات يبقى المفروض نكتب على ضهرنا نايل موتورز علشان نعرف بعض ونتعرف على بعض
ماعلينا, كان فيه عدد من الناس لا بأس به, بتاع 40 واحد كده كتوتل منهم أستاذ محسن صالح المحترم, و بعض الاعضاء التانيين من التوكيل (معرفش اساميهم بصراحة).
المهم أنا قعدت اتكلمت مع أستاذ محسن صالح شوية, وأحلى حاجة في وسط الكلام جه واحد صورنا وقام أستاذ محسن قال لي أصل الصور ده هتروح ماليزيا... يعني ماتتخضوش لو لقيتوني في مجلة ولا على سايت, ههههههههههه.
المهم, قعدت فضلت اصور فيديو شوية بالموبيل, قعدتلي بتاع ساعة كده أو أكتر عبال ماجه دوري (كان فيه عربيتين من كل فئة بس ماكانش فيه غير نمرتين تجاريتين بس وعاملين يبدلو النمر )
أخيرا, جه دوري, بعد ما الانسة اللي بتنظم قالتلي أنا حاسة فعلا إنك قعدت كتير, المهم, جت العربية, وكان اللي بيركب مع الناس واحد اسمه "وائل حسين" وده هارجعله بعدين.
ههههه عارفه ده بردة اللي انا إسطبحت بيه وركب جنبي في الساجا الأوتو
اصل انا جربت الساج الأوتو والمانيوال والجين المانيوال
المهم ركبت العربية, واحنا كانوا زنقنا كلنا في حتة صغيرة كده والعربية كانت ركنا بضهرها فال مهم كان المفروض أرجع ل ورا عشان أطلع.
جت أحاول أجيب مارشدير معرفتش بصراحة الفتيس كان ضيق قوي مقارنة باللانوس, وأنا مكنتش متعود. المهم بقول للراجل هو مش عايز ييجي ليه, قال لي برخامة كده: لأ هو بييجي بس إنت تلاقيك مافطرتش.. (لذيذ قوي).
خفه أبو شفهانا بصراحة الريفيرز جه معايا تمام وكل الغيارات كان حلوه والفيتيس والدبرياج كانو عاجبني جدا علشان الدبرياج قصير والنقلات قريبة من بعضها فا الموضوع رياضي وسلس جدا جدا على عكس الساجا المانيوال الدبرياج مشوارة طويل جداً وانا كنت سايقها قبلها فحسيت بالفرق المهول بينهم
المهم جبنا reverse وجاي ابوص ورا مش شايف حاجة خالص بصراحة, الظَهر ال left back ده مش مخليني عارف أشوف حاجة والمرايات مش متعود عليها, بس الحمد لله عرفت أطلع.
هي كل العربيات الجديدة مش بينفع معاها إنك تبص ورا ولازم تعتمد تماماً على المرايات وربنا يخلي الباركنج سينسور هيسهل الموضوع زيادة
طلعنا بقى على الطريق (ال test drive كان قصير اويي. يادوبك تلف من قدام ملف كارفور وتلف تاني من الملف اللي بعديه...
دي فعلا أوحش حاجة الواحد مابيلحقش خالص!!!
المهم طلعت وابتديت أمشي, العربية ما شاء الله استجابتها هايلة وتسارع ممتاز قوي, وكنت حاسس إني بجري وحاسس بالأمان على عكس لما بجري باللانوس على 100 كيلو أو أكتر بأحس إن شوية هوا بيلعبوني.
هي بصراحة العربية فيها إحساس غريب بالقوة والأمان أصلا أنا أول ماقعدت في الكرسي منغير ماتحرك حسيت إني ممكن أطير بيها وانا متطمن
وصلت ل أول u-turn ولسة بلِف وطالع أجري شوية لقيته بيقولي خد بالك هنلف من الملف الجاي ده.
متفكرنيش!
رحت لفيت من الملف اللي بعده وطالع أجري برده..مش عارف فيه ايه, غصب عني واللهِ. لقيته بيقولي خد بالك عشان هندخل يمين بقى. دخلت يمين ركنت, وفعلا خلص التست.
طبعاً إحباط الواحد كان عايزلة 10 لفات كمان
نييجي بقى للانطباعات:
1- العربية صوت متورها وإنت جوه وقافل الازاز مش علي خاااااااااالص!!! أنا مش عارف الناس اللي بتقول صوت المتر علي حسستني إني هاركب نص نقل ليه. أنا كنت بنقل على 4 rpm تقريبا وكان صوت المتر عادي جدا, اللانوس عندي صوتها أعلى بكتير في أي حالة من الحالات على فكرة. سواء أول ماتدور, أو وانتا ماشي. ده أنا لما دورت الجين وانا قافل الازاز واللهِ ماحسيت, صوت هادي جدا في الأول.
2- صوت الموتور وإنت سمعه من بره عالي سِنة صغيرة.
3- وانا بجري عالطريق وبنقل, كنت حاسس بصوت rpm عالي سنة مابين النقلات, يا ترى ده طبيعي ولا أنا اللي مش متعود على قصر الدبرياج والنقلات القريبة ؟
أيوه فعلا انا لاحظت الموضوع ده في كل النقلات
زي ماتكون ماشيلتش رجلك من على البنزين
3- المرايات يمين شمال في النص بنسبالي كانوا صعبين إلى حد ما, وانا بارجع ل ورا فعلا كنت حاسس إني محتاج حد يوجهني. يا ترى ده طبيعي ؟
اليمين والشمال لو ظبطهم كويس هتلاقيهم كويسين لكن اللي في النص ده العادي
4- العربية ما شاء الله نعمة قوي في السحب وتحس إنها عايزة تجري.
نيجي بقى للاخ "وائل حسين" ده, الراجل بصراحة لو مكنتش حابب العربية والناس اللي هنا فالقسم, كنت سبت العربية ومشيت. الراجل حسيته قرفان مني من قبل مانبدأ. في الأول بيقولي إنت معاك رخصة ؟ سؤال بصراحة عاصبني, يعني تفتكر لو ماكانش معايا كنت جيت, أو كانوا سمحولي أملا الفورم فالاول ؟ لأ و طول الطريق بحاول أتكلم معاه عن العربية وهو مبيردش. بصراحة يكره الواحد في العربية ويخليه عايز يسيبها ويمشي. أنا حاولت أكلم أستاذ محسن صالح عليه بعد مارجعت بس بصراحة مالقيتوش ساعتها فقمت ماشي. بصراحة الراجل ده كان أسوأ مافي ال يوم. يمكن أسوأ من الجو.
قابلت الأستاذ مدحت سكيك هناك على فكرة, وقال لي إنه كان بيعمل صيانة ال 20 ألف ولقى ال event فـجه يعمل test drive لل Saga.
بصراحة أحسن حاجة حصلت انهارده هي الحبة الصغيرة اللي سقت فيها الجين 2 والتعرف عالعضو المحترم أستاذ مدحت سكيك.
وده فيديو للتست أخويا كان صوره:
تحياتي.
المفضلات