الموضوع: مانيول وللا اوتوماتيك.....وليه؟؟؟؟؟

أوتوماتيك

شوارع مصر مابقتش ناقصة مانيوال

المشاركة الأصلية كتبت بواسطة MMamdouh

ماركة مسجلة لمحبى الاوتوماتك... طالما العربية وسيلة انتقال بالنسبة ليك يبقى الاوتوماتك ثم الاوتوماتك ثم الاوتوماتك

اذا كانت القيادة بالنسبالك متعة يبقى مانوال

الموضوع وجهات نظر و اختيارات... اللى عايز يريح نفسة و هو بينتقل من مكان لمكان بيركب اوتوماتك و اللى بيحب السواقة بيركب مانوال

مفيش فتيس فيهم "وحش" و التانى "حلو"... دة فيه مميزات و عيوب و دة فيه مميزات و عيوب و كل واحد حسب اختيارة و حسب اللى يريحة و الدليل على صحة كلامى ان فيه ناس بتركب مانوال و ناس بتركب اوتوماتك...لو كان نوع منهم وحش مكنش حد جابة اصلا

MMamdouh

انا اايد الاخ محمد فى الكلام ده لان كل واحد بيجيب السيارة الى بيحس بالراحة معاها وايضا على حسب نوع السواقه بتعتة هل بيحب الجرى ولا لا

انا لى تجربه
كنت فى مرسى مطروح فى بلاج بعيد نسيت اسمه
المهم اخر النهار وانا ماشى جالى واحد يقول لى عندك وصله بطاريه قلت له ايوة
رحت معاه وكانت العربيه بالمشمع بتاعها كانت سوزوكى
وصلت الوصله معاه ومعايا ويدور العربيه الكابل كان تعبان والعربيه مش عاوزه تنطق
قلت له أحسن نزق العربيه
قاللى اوتوماتيك
فى النهايه اشتغلت بعد ساعه عذاب
ومن يومها بكره الأوتوماتيك

المانوال سريع و مفيد يعنى مثلا انا معايا 504
لما الاشارة بتفتح على الناس اللى جنبى ما تبداء تتحرك اكون انا فى اخر الشارع ( اوع ياض منك له)
و فى السفر مش وحش. بس الواحد بيتحرك فىالبلد دى معظم الوقت على الغيار التانى و شوارع ضيقة و زحمة و زنقة و طلوع روح ... و هاتك يسا حرق بنزين بزيادة و سلملى على المانوال و على رجليك ( و دراعك اليمين احيانا) اللى بتسرخ بعد ما تتخطى حاجز الساعتين سواقة
و التشتيت ايدك الشمال اصبحت وحيدة تتحكم فى اتجاه السيارة واليمين تركت الدركسيون وبتبحث عن عصا الفتيس و تبداء فى تحريكه و فى نفس اللحظة تتحرك قدمك اليمنى الى الفرامل اما اليسرى فتكون سبقت الجميع ببضع اجزاء من الثانية الى الدبرياج ( مرستان و كل ده بيحصل و عنيك على العربية اللى انتا كنت هاتلبس فيها)

اما عن تكلفة اصلاح الاوتوماتك فلو انك بتسوق كويس و بتاخد بالك مش هايكون الموضوع ازمة
لكن تعلالى بقى فى المانوال اللى سواء كنت كويس او وحش ( و دى تبقى مصيبة اكبر) هايستهلك بسرعة فى ظروف الزحام الفظيعة دى و تعالى و شوف هاتغير طقم الدبرياج كل اد ايه و الاسطوانة و الدسك و البلية ( مع ان دى حجات المفروض بتعيش جزء كبير من عمر العربية. بس ده كان زمان) دا غير تصليح و ظبط العصاية اللى انتا عمال تلخلخ فيها طول النهار و مش عاتقها دى

على راى حمادة بتاع قطع الغيار: الاسطوانة و الدسك و البلية شغالين بيع زى الفل اليومين دول يا دكتور
انا : و عرفت السبب؟
هو : لما نزلت الجمعة اللى فاتت و سقت جوه البلد شوية و طول مانا سايق ماباعملش حاجة غير انى بدوس دبرياج قلت لنفسى " دا فعلا ليهم حق ينباعوا بالطريقة دى"

كلامك زي الفل يا دكتور ، أنا بحب المتنيوال و أداؤه الرياضي ( بس أركبه من وقت لآخر ) أما عربيتي أوتوماتيك ، قمة الراحة في القيادة ، خصوصا في الزحمة الرهيبة دي ، و بعدين أنا العربية معايا بقالها 5 سنين و ماشاء الله محتاجتش أي صيانة في الفيتيس( ياباني ) ، أما عن الشد و الكلام ده شغالة مش بطالة ، هوا فعلا السحب أقل بالنسبة لنفس الفئة ، بس الواحد لما بيشتري عربية مش هيشتريها علشان لما ييجي يشد تبقى كويسة ، لكن علشان تحقق الهدف الحقيقي منها و هوا الراحة ، و على فكرة الأوتوماتك مش ميت زي الناس ماهي فاكرة ، قيادته ممتعة جدا بس طبعا مش هتاخد منه نفس الأداء الرياضي بتاع المانيوال .