الموضوع: ايه رايكم في زواج الاجانب

المشاركة الأصلية كتبت بواسطة araberphilosoph

يا ريس تسلم يا كبير
الهي ما يسخن لك موتور ولا يسد لك شكمان

انت كويس يا ابني .. ليك مستقبل .. استمر ...:D:D:D

لغاية دلوقت مش قادر اعرف ايه المغزى من الموضوع؟

يا ريت araberphilosoph يفهمنى

المشاركة الأصلية كتبت بواسطة Abu Aly

???!!!!! ... بره ده تبقى فين بالظبط ؟؟ اى دوله تقصد ؟؟ طيب اذا كان العالم كله زى بعضه فى الفساد و الاستعباد.. الخ ليه دول كتير متقدمه عنا ؟ ليه فى قانون و نظام و ديمقراطية و انتخابات نظيفه و محاسبة اكبر رؤؤس فى الدولة ( اقدر اذكر لك مئات الامثلة )و ليه اسوأ العناصر
عندنا هى اللى بتاخذ كل المناصب الهامة الموثرة ؟ .. طبعا فى جوانب سلبية فى كل الدنيا لكن الفارق هو ان لا احد فوق الفانون و الحساب و الفارق ان المواطن هناك يتم التعامل معه على انه انسان محترم و شريف و له كل الحقوق مش مهانه كرامته و ليس له قيمه فى نظر الباشوات .. طبعا مش بتكلم على دول زى رواندا و بروندى و بورما و نيبال .. الخ ! ..
الموضوع مش موضوع فساد مغلف بالجرنال و الا بالسوليفان .. الموضوع هو سيستم يشجع على الفساد و سيستم يحاربه ... يا راجل الفساد عندنا وصل حتى ان كبار الفاسدين معدش حتى عندهم حياء و لا بيهمهم كلام الناس طالما محدش بيحاسبهم و طالما بيدفعوا نسبة مقننه للكبار !

يا استاذنا اذا كنت تعرف النرويج يمكن تعرف ان ملك النرويج السابق عندما كان ملكا كان انسان بسيط بيخرج من القصر بالبسكلته و يمشى فى شوارع اوسلو و الناس تحييه لانها بتحبه من غير حرس و لا هيلمان زى اتفه وزير عندنا بيعمل !!.. معرفش مين الملك او الملكة حاليا لكن اكيد
سلوكه لن يختلف و قيس على ده كل الدول المحترمة..مفيش فروق بين الناس و مفيش تشجيع على الفساد و الافساد و لا فرعنه للى على الكرسى
يا سيدى النرويجو الاتحاد الاوربى بتدى مساعدات مالية للفلسطنيين اكتر من السعودية رغم انها اقل ثراء بكتير و زعمائنا بيتاجروا بالقضية ..

للاسف كل تفكيرنا عن اوربا و الغرب هو الحرية الجنسية !!! و لو شفت اقبالنا هنا على قنوات الدش اياها و مواقع النت اياها و التحرش المنتشر تعرف ان ثقافة النفاق مغلفة حياتنا و اننا بنضحك على نفسنا .

بالهداوة كده
واحدة واحدة
انا مبدئيا سافرت (فرنسا و هولندا و النرويج و ايطاليا و انجلترا و اسكتلندا) في اوروبا
و (قطر و السعودية و الامارات و ليبيا و تونس) في الدول العربية
و سافرت ايران
و سافرت جنوب افريقيا

ده غير اني باشتغل من يوم ما اتخرجت تقريبا في شركات اجنبية .. لظروف يطول شرحها
الفساد موجود في كل مكان .. و انا بعيني بشوف الرشاوي و العمولات على اعلى المستويات
و خلينا نتكلم واحدة واحدة
فرنسا
شيراك .. سارق فلوس و معين ناس في فترة رئاسته .. و فرنسا مليانة فقر و في بنات بتجبر على ممارسة الدعارة 18 ساعة يوميا و محبوسين في اماكن البوليس عارف و قابض و ساكت
فرنسا بلد الظلم الاجتماعي .. احياء كامله مفيهاش لاصحة و لا تعليم .. ناس فرنسيين مش لاقيين ياكلو .. و الاحتجاجات و الاضرابات دليل
النرويج على فكرة من اغلى دول اوروبا .. و ممكن تراجع نصيبهم من بترول بحر الشمال ده غير عدد السكان القليل .. و مع ذلك الفساد موجود و رشاوى و عمولات ..
انجلترا .. صفقة اليمامة .. و ان رئيس الوزراء بنفسه .. يصدر امر مباشر بغلق التحقيق في القضية مجاملة للسعودية
ايطاليا .. لوحدها من غير كلام كتير .. بلد الفساد الاول
امريكا .. حدث و لا حرج
الفرق بيننا و بينهم يا باشا ... الميديا .. يا سيدي الفاضل امشي في شوارع ابردين و لا ادنبرة هتلاقي شباب 20 و 25 سنه بيشحت و الله بيشحت ... و ناس واقفة تبيع مجلات
مش بقول احنا احسن في محاربة الفساد .. بس هنا و هناك في فساد
انا عاوز اقولك ان في السعودية و اهي بلد واخده سمعة .. الرشاوي و الفساد على ودنه .. و بعيني شايف الوكيل بيحط فلوس في ايد الضابط علشان التصاريح .. ده الناس بتوع المينا (سعوديين) بييجو يطلبو منا سجاير ..
اللي سافر بلد واحدة .. او سافر زيارة .. سياحة يعني .. او مسافرش خالص .. مش هيفهم كلامي ده ... يا راجل في لندن المية بتتقطع .. و لفيت في روتردام على نت كافيه ساعتين بالعربية مفيش .. وو الشباب في الشوارع اساسا معندهومش فكرة عن البطيخ ... الميديا يا باشا ..

اللي بيتكلم على التحرش .. غالبا مفيش واحدة بتترقى في اي موقع برة .. الا لما بتكون مظبطة المدير بتاعها .. و بيعتبرو ده عادي و من ضرورات العمل

اخر حاجة انا بكرر كلامي .. الحياة مش وردي في مصر ... و لو دورت هتلاقيني عمال اسب و العن في مواضيع تانية على الفساد و قلة الضمير
لكن الحياة مش وردي برة برضو و ده مقصود كلامي .. و لو حطيت ده على ده يبقى تقعد في بلدك احسن و تحاول تصلح حالها .. (للاسف انا بقولك الكلام ده و انا في السعودية و السفرية الجاية النرويج بس انا بسافر شهرين و اخد اجازة شهر) يعني مقيم برضو في مصر
انا ما بسكتش على اي فساد باشوفه في مصر .. و لما كلنا نعمل كده حال البلد دي هيتصلح

المشاركة الأصلية كتبت بواسطة araberphilosoph

الغرض ان احنا نفكر في الموضوع تاني
نعرف ان الانسان مش بجنسيته لا بشخصيته يعني الفكره المسبقه عن زواج الاجانب انه مرفوض وخطر وغلط وكده لازم تتغير لانه هيبدا ينتشر اوي
بس فكنت عايز اعرف ارائكم ونشوف انتوا شايفين ايه

طب هو احنا فكرنا فى الموضوع أولانى علشان نفكر تانى؟ و مهما انتشر هيكون برضوا نسبة لاتذكر و لا تؤثر لأن معدل الزيادة السكانية بيوازن اى طفرات فى اى ظواهر.

و موضوع ان الأنسان مش بجنسيته ممكن يتفتح من خلال مواضيع أهم و أعمق تأثيرا من الموضوع ده - مع الأحترام التام لوجهة نظرك -

و لو أغلب الناس شافت انه غلط، فياترى ده هيغير موقفك؟

و ياريت علشان خاطرى تاخد بالك من الكلام اللى زى (جنسية تشرف) لأن بجد بحس انها اهانة لو حد غريب قالها، و بحس انها جرح لو حد قريب قالها.

وأخيرا هقولك رأيى بالمرة من خلال الأرقام، خلال 18 سنة بين مجال شركات السياحة و بين الفنادق قابلت على الأقل 100 حالة جواز مصريين بأجانب، و اللى استمر و نجح مش أكتر من 2.