إلى خبراء الفيات

**georock** · 20-12-2007 09:39 PM

هاى شباب
أنا لم يسبق لى القيادة من قبل و لكنى مضطر الأن لشراء سيارة وذلك لبعد عملى عن منزلى بحاولى 50 كيلو متر و لذلك فكرت فى شراء سيارة بدلا من البهدلة فى المواصلات و أرغب فى شراء سيارة من تلك السيارتان وهذا الأختيار طبقا لميزانية الشراء
أى السيارتان أفضل
فيات ريتمو
فيات 128
مع العلم أنه مطلوب من السيارة أن تقطع أكثر من 100 كيلومتر فى اليوم الواحد
و أرغب فى أستفسار أخر !!!!!!!
ما سر أنخفاض سعر السيارة الريتمو ؟
أرجو الرد سريعا و شكرا

**Xpert** · 20-12-2007 09:53 PM

نصيحه ابعد عن الريتمو .. علابيه مش بياعه .. هاتلك ريجاتا و ماتجبش ريتمو .. لاءن زي ما مطلوب من العربيه تقطع اكتر من 100كم في اليوم مطلوب منها تتباع وقت الحاجه ... هات 128 موديلات معااك لحد 1992 ... فوق 1992 ماتشتريش ... طبعاً حاجه نضيفه .. و الاحسن لو بيتي و تبعد عن التجار .. و تكون حاجه انت عارفها .. الريتمو مش بياعه لاءن شكلها وحش ..

**NaderNabil** · 21-12-2007 12:47 AM

شكلها وحش و شاسيها ضعيييف جدا....بيفتح بسسهووله أوي فا بيخلي الزوايا تبوظ و العفشة تبوظ...

**georock** · 21-12-2007 10:50 AM

أنا عارف أن الريجاتا أحلى من الريتمو و 128 بس أنا ميزانيتى معيش غير 20000 جنيه علشان أشترى العربية و أشدها و اللى خلانى أفكر فى الريتمو أنى لقيت سعرها أقل من مثيلاتها( على أساس أن فى منها عربيات 1500 سى سى )
بمعنى أصح الريجاتا عالية عليا
حسأل سؤال 128 حتصد معايا فى المشوار الكبير ده بتاع كل يوم ؟
ولا سنة سنتين و تسمعنى سلام بودعك
أنا برده عايز عربية تعمر معايا !!!!!!!!!!

**Xpert** · 21-12-2007 01:19 PM

عندك ال128 هاتسد .. و عندك الجولف 1 هاتسد .. المهم مش العربيه هاتسد ولا لاء .. مانت ممكن تجيب بي ام و تسقيك المرار ..
المهم حاله العربيه و طريقه الاستعمال ...

**Ahmed Hassan** · 21-12-2007 01:40 PM

بعا الريجاتا احسن.. بس لو الميزانيه تحصر الاختيار بين الـ 128 و الريتمو يبقى ريتمو

**hazem_khidr** · 21-12-2007 01:49 PM

لو عاوز ريتمو يبقي الريتمو ال 75 اللي هيا فيات مش تقفيل مصري ال 65 علشان التانيه دي ما تتركبش اساسا.
غير كده اي عربيه في الرينج دا ما تتوقعش منها اداء قوي و مشاكل قليله .
لو قدرت توصل للريجاتا او زودت و جبت سويفت او اكسيل يبقي كده بتبعد عن المشاكل اما ال 128 او الريتمو فعلا سنه او اتنين ممكن تعمل معاك الصغيره

**Ahmed Anwer** · 21-12-2007 02:17 PM

بص يا باشا ،،

في المستعمل ،، كل المقاييس بتنتهي ،،

مقياس واحد بس اللي بيفضل ،،،،، الحالة ،،

انا لما كنت بشتري مستعمل كنت باخد القرشينات و انزل اصطاد و انا و رزقي

و مبربطش نفسي أبدا بموديل معين ،، اللي الاقيه حالته كويسة اشتريه ،،

عشان كده مبحبش اللي بيسأل يشتري موديل ايه في المستعمل ،، لأنه اللي بيفرق الحالة

**Xpert** · 21-12-2007 02:21 PM

احمد .. ماهه كله بيعمل كده .. بس النفس بتبقي حابه موديل معين .. بينزل يصطاد يلاقي حاجه غيرها تدخل دماغه يجيبها ;)
بس برضه انا مابشتريش غير البي ام :d :d

**فادى** · 21-12-2007 08:50 PM

كما قال الاخوة الأعزاء المهم هو حالة السيارة.
الريتمو سيارة جيدة جدا و هى تطوير ال128 و هى احدى سيارات فيات التاريخية و احدى السيارات التى أشعلت ثورة فى أوروبا, و لكنها مش واخدة حقها فى مصر, عموما لا فرق كبير بينها و بين ال128 تقريبا هى نفس السيارة , الى تلاقيه منهم فى حالة أفضل اشتريه.
و عموما ال128 لو اعتنيت بيها و كانت حالتها كويسة هتصمد معاك سنتين و 5 سنين و هى عربية جيدة جدا و للعلم ناعمة جدا فى سواقتها عكس سيارات فيات الكبيرة مثل ال125 و ال124, و أنا كان معايا 128 و كانت حالتها معقولة و كنت معتنى بيها و مشاكلها الحمداالله كانت قليلة الى حد كبير, على فكرة ال128 فى حد ذاتها مش عربية بتبوظ أو سيئة الصنع, المشكلة هى قطع الغيار المغشوشة الى موجودة فى السوق, يعنى لما تروح لميكانيكى مثلا و عندك العربية بتقطع يقولك انت لسه مغير بوجيهات؟ حاول انك تجيب قطع غيار أصلية قدر الامكان عشان متقلش معاك, طبعا هى مش حمالة أسية زى الشاهين و ال131 و ال132 و لكنها بتستحمل الى حد ما بشرط المحافظة عليها. و نفس الكلام ينطبق على الريتمو و ان كان أداء الريتمو أفضل قليلا من ال128 من حيث السرعة و الثبات.
للمزيد من التفاصيل يمكنك مراجعة مقالتى عن ال128 على اللينك التالى :
http://www.nilemotors.net/Nile/showthread.php?t=6657