الموضوع: هى البلد مالها التسول انتشر كدة ليه؟

انا طبعا بتعرض لمواقف من دي كتير بس انا فاكرة موقفين معلمين معايا شوية
مرة كنت ماشية بعربيتي وركنت على جنب لاني سمعت خبطة فنزلت ابص لاتكون العربية اتخبطت ولا حاجة ونزلت بصيت مالقيتش حاجة وركبت تاني ولسة بطلع لاقيت تاكسي سايقه راجل كبير وقف جنبي وبيكلمني ففتحت الإزاز (من هبلي فاكراه هايعدي وبيقولي استني فمستنياه يعدي عشان اطلع بعده) لاقيته ماسك ورق في ايده وفلوس كدة وبيقولي انا ابني عيان ومعرفش عندي ظروف ايه ولسة بيكمل الإسطوانة المعروفة فمرضيتش اسمع الباقي وقلتله الله يسهلك راح قاللي انا متأسف ومشي (بصراحة حسيت بالنذب للحظة وقلت يمكن يكون محتاج فعلا وانا كسفته كدة) بس رجعت قلت ماهو شغال على تاكسي أو يمكن التاكسي بتاعه وكلنا بنشتغل وطالع عينيا عشان نكفي نفسنا يعني انا مش لاقية الفلوس في الشارع يعني وكمان قبل ماجيب العربية كانوا سواقين التاكسي بيطلعوا عيني على مايودوني مشوار ويطلبوا اجرة زيادة ولو الأجرة معجبتوش بيطول لسانه.
بصراحة موضوع التسول خد اشكال كتير وبقي مستفز جدا جدا وبالذات لما بيلاقوا بنت وراكبة عربية كمان بيستلموها صح.
في الشارع اللي عند شغلي في واحدة ست بتتسول هناك الست دي بشوفها كل يوم الصبح صاحية من بدري وواقفة تشحت وانا حافظاها يعني وعارفة بتقف فين فمكنتش بديها بصراحة لاني حاساها محترفة للمهنة أو بتنزل تسلي وقت فراغها مش محتاجة فعلا يعني.
لسة بركن عربيتي وخلصت ركن ونزلت لاقيتها بتكلمني قلتلها الله يسهلك ياحاجة ومشيت لاقيتها بتقول اه ياختي مانا عارفاكي عمرك ماديتيني حاجة ابدا قلتلها ياستي الله يسهلك ماكلنا بنشتغل وبنتعب يعني مش لاقيين الفلوس في الشارع قعدت تبرطم بالكلام بقي ، طبعا مشيت وسبتها تكمل هرتلة لإنها ست كبيرة والناس في الاخر هاتلومني انا بس استغربت جدا من بجاحتها وجرأتها وقلة أدبها بصراحة وماشاء الله الست صحتها كويسة يعني (لاهي معوقة ولا صحتها على قدها) يعني ممكن تشتغل دادة في حضانة مثلا أو أي وظيفة تجبلها دخل معقول يكفيها.
من ساعتها وهي تشوفني تودي وشها الناحية التانية عشان عارفة اني مش هاديها حاجة.
انا عن نفسي صدقتي وزكاتي بطلعها في جمعيات خيرية بتساعد أسر محتاجة فعلا أو ناس شكلها يستاهل فعلا (لو طفل قاعد في عز البرد لإنهم بيصعبوا عليا اوي أو ست كبيرة صعب تشتغل أو راجل كفيف بايت في الشارع مثلا) أو جارة مطلقة أو أرملة وظروفها على قدها لكن مش ناس في الشارع صحتهم زي الفل ونازلين يسترزقوا على افا ناس تانية وفاكرينا وارثين عربياتنا دي ومعانا على قلبنا قد كدة
ماحنا موظفين وبنصحي من بدري ويطلع عينيا في الشغل عشان نجيب فلوس مايتعبوا هما كمان شوية ويعيشوا باحترامهم شوية بقي.

المشاركة الأصلية كتبت بواسطة amrabas2007

لا بقى انا مره واحد جه و قاللي انا عاوز 100 جنيه عشان أروح بيهم لبلدي رحت قولتلو ممعييش

دة ساكن فى أسوان ولا اية ؟!

المشاركة الأصلية كتبت بواسطة ashouhdy

كلهم لا تجوز لهم الصدقة
تصدق بالجامع لاسرة فقيرة تعرفها ..لموظف غلبان لقريب فقير لك لجار فقير
دول اولى من اصحاب مهن الشحاتة اللى كل 5 متر تلاقى واحد ويقولك دى الحتة بتاعتى

+1111111111111111111
وحشتنا مشاركات ياباشا وكلامك كله صح على فكرة بس انا شايف ان الناس هم الغلطنين لانهم طول ما بيديلهم فلوس وبيشجعوهم على الحركات دى وكل يوم اساليب شحاتة مبتكرة المهم انا كنت فاكر ان يوم ما الواحد يصعب عليه شحات هيديلو 2 او 3 جنية بكتيرو بس الى جنينى ان من اسبوع وانا واقف على كوبرى اكتوبر كالعادة لقيت واحد نزل الزجاج وادى الشحات 10 جنية مرة واحدة !! يبقى بزمتك مين الغلطان ؟؟ وتعاله شوفهم عند فلفلة فى فيصل كل خميس فاضحنا عند كل العرب ومش عارف فين شرطة التسول وبصراحة سعات بحس ان الفراخ البيضة بتوقفلهم الطريق عشان تقسم معاهم اخر اليوم وربنا يخدهم كلهم من الشوارع

عندك طلعه كوبرى أكتوبر إللى فى أخر البطل أحمد عبدالعزيز لما الكوبرى بيكون واقف (وهو عاده بيكون واقف) بتلاقيهم مقسمين نفسهم فى أول الطلعه شوية عيال صغيرين بمناديل بعديهم شاب واقف بعكازين وراجل عجوز ماسك كيس أدوية وبعديهم واحد واقف بكرسى متحرك قاعد عليه طفل نايم على طول كل يوم بالمنظر ده حتى ما بيفكروش يغيروا الترتيب