الموضوع: معايا كوبون من جوجل وعاوز أبيعه

أنا جالى من ثلاثة أيام كوبون Google Adwords للإعلانات بقيمة 550 جنيه وعاوز أبيعه ، وأنا بصراحة ماليش فى حكاية الإعلانات دى ، وأنا محتفظ بالكوبون عندى (( وفيه الرقم المسلسل بتاعه )) وأنا كمان لسة مشغلتوش ، يعنى الحساب كامل إن شاء الله .
أنا شايف إنه فرصة لأى حد عاوز يعمل إعلانات للشركة بتاعته على النت بطريقة يقدر عن طريقها يتحكم فى ميزانية الإعلانات اليومية زى ما الناس شرحوا لى .
وشكراً

المشاركة الأصلية كتبت بواسطة مصراوي جدا

الكوبون ده قصته كالآتي :

انا اصلا عندي موقع وعندي حساب على جوجل ادوردز للاعلان عن الموقع انما سايبه من زمان

لما جالي الكوبون ده قلت استفيد منه لقيت ان الحسابات القديمة على جوجل ادوردز لايمكن ان تستفيد من الكوبونات دي انما لازم يبقى حساب جديد لم يمر على فتحه 14 يوم

قلت بسيطة عملت حساب جديد بايميل جديد على جوجل ادوردز

طيب عايز ادخل كود الكوبون ، الواد جوجل مش اهبل ده حدق قوي مش كل واحد جاه له كوبون هيعمل به حساب مجاني في مجاني كده

قال لك لازم تدفع من كارت الفيزا بتاعك 80 جنيه (منهم 40 ضايعين مقابل الحساب الجديد في جوجل ادوردز) وبعد ما يخصم ال 80 جنيه من حسابك ممكن تضيف الـ 550 جنيه بتوع الكوبون وتبدأ تشتغل

انا عملت كده فعلا

الكوميدي ان شريكي في الموقع جاه لك كوبون

اخدت الرقم علشان ادخله على الحساب الجديد (يعني مش قديم ولم يمر عليه 14 يوم حسب شروط جوجل) قال لك لأ يا باشا جوجل برضه احدق منك ، لك كوبون دعائي واحد فقط

يعني من الآخر اللي عايز يستفيد من الكوبون ده لازم يحط عليه 80 جنيه من كارت فيزا ويصبح المبلغ المستفاد منه 550 + 80 - 40 = 590 جنيه ، علما بأن غالبا محدش هيضغط على اعلانات تكون تكلفة الحملة اليومية فيها اقل من 15 جنيه في اليوم ، يعني الفلوس هتطير بسرعة جدا

اخيرا اقول ان فيه فعلا ناس كتير جدا جاه لها الكوبونات دي وكتير منهم اعلن عن بيعها بمبالغ غريبة جدا تبدأ من 500 جنيه ونازل حتى 25 جنيه للكوبون الواحد وبالبحث على النت هتلاقي الاعلانات دي

ملاحظة هامة : الكوبون مكتوب عليه ان بعد 28 فبراير هتقل قيمته من 550 جنيه الى 400 جنيه

ودي كانت قصة كوبونات جوجل الدعائية

نورت الموضوع يا بمشهندس طارق ، أنا سعيد للغاية بمشاركة حضرتك

أنا بصراحة مكنتش عارف أعمل إيه بالكوبون ، علشان كده أنا كنت عارضه للبيع ، وكلام حضرتك سليم 100% لإن جوجل مش هيوزع الكوبونات دى كده وخلاص ، وبالنسبة لميعاد الكوبون أنا أخدت بالى فعلاً من التاريخ بتاعه وإنه من أول مارس قيمته هتبقى 400 جنيه

وشكراً جزيلاً لحضرتك