حد منكم جرب يحط زيت موتور من إمارات مصر؟

**marsguy** · 22-12-2007 11:52 PM

السلام عليكم ورحمة الله وبركاته،،،

عاوز أستشير حضراتكم في حاجة ...

حد منكم جرب يحط زيت موتور من إمارات مصر؟

أنا حطيط منه النهارده وهم عندهم ميزة حلوة أوي، هي إنك ممكن تحط زيت سايب، يعني الراجل بيحطلك بطرمبة زي طرمبة البنزين كده، وطبعاً ده أوفر ومش هايخليك تحتفظ بعلبة الزيت اللي فيها حبه صغيرين عشان المرة اللي بعديها.

هم عندهم نوعين زيت، نوع بيعد 5000 كيلو وده ثمنه 14.80 للكيلو، ونوع ثاني بيعد 3000 كيلو وده ثمنه 9 جنيه وشوية.

أنا عاوز آراء الناس اللي جربوا الزيت ده، أصل أنا خبرتي قليلة أوي في السيارات ولسه ما أقدرش أفرق بين أنواع الزيت.

شكراً

**NaderNabil** · 23-12-2007 12:05 AM

أنا جربته لأول مره ..و أهو عامل 2000 كيلو لحد دلوقتي و ممتاز صوت الموتور ناعم و درجة الحرارة مستقرة...ده غير الخدمة و المعامله المحترمة اللي في المحطة...و كمان 8 مره من السايب ده بتبقي مجانيه...
أنا أرشحه لأي حد

**marsguy** · 23-12-2007 12:27 AM

ربنا يطمنك يا نادر

أنا فعلاً نسيت أقول إنهم عاملين عرض بالنسبه للزيت السائب

المرة الثامنة لتغيير الزيت بتكون ببلاش، وبيدوك كارت متابعه كدة مكتوب فيه قراءة عداد الكيلومتر

وعلى فكرة سعر الزيت السائب هو نفس سعر الزيت اللي في العلب، عشان ما حدش يفتكر إن الزيت السائب نوعيته وحشه ولا حاجه.

شكراً

**Hossam_Hassan** · 23-12-2007 11:50 AM

بقالى مرتين بأتعامل معاهم، الزيت فى كفاءة الشل من حيث صوت الموتور و الحرارة، بس لزوجته أعلى حتى أخر يوم و بخليه لغاية أخر ال 5000 عكس الشل اللى كنت بغيره على 3500 و ضيف على كده كفائة محطاتهم.