جوجل بعتت كوبونات إعلانات قيمتها 550 جنيه لناس كتيرة وأنا منهم وهو جالى من حوالى 5 أيام ، وأنا معنديش موقع ومعنديش منتدى ومش عارف أعمل إيه بالكوبون (( هى بس حتة مدونة صغيرة كده على قدى ))، أنا دورت على النت ولقيت فيه ناس عرفت تبيع الكوبونات بتاعتها ، ولما دخلت على جوجل علشان أعرف إيه نظام الكوبون ده ، لقيت إن الضغطة على الإعلان سعرها بيتحدد حسب الموقع اللى الإعلان ظهر فيه وحدها الأدنى ممكن يكون 6 قروش فقط ، وكمان حاسبين عدد صفحات ظهور الإعلان بالألف ظهور بحوالى 1.50 جنيه ونصف فقط ، وتنشيط الحساب بحوالى 40 جنيه ، والكوبون صالح حتى آخر فبراير بقيمة 550 جنيه مصرى وصالح حتى آخر مارس بقيمة 400 جنيه مصرى واكتشفت كمان إن الكوبون ليس مرتبط بحساب معين أو للشخص اللى مبعوت له الكوبون لإنه ممكن تنشئ حساب جديد على Adwords.google.com وتدخل فيه السيريال بتاع الكوبون وتحدد الميزانية اليومية للإعلانات يعنى ممكن تصرف فى اليوم 20 جنيه مثلاً إعلانات على جوجل والإعلان مش هيتحسب إلا لما حد يضغط كليك على الإعلان ويخصم مثلاً 10 قروش من الميزانية بتاعة النهاردة .

أنا عاوز حد يكون مجرب الموضوع ده يفهمنا الدنيا ماشية إزاى ، علشان أنا بصراحة زهقت ومش عارف أعمل إيه وبصراحة بقى أنا عاوز أبيع الكوبون ده ، لو حد عاوز يشتريه أنا جاهز .