يا جماعة انا زهقت منالبلد بنت ال000 دي انا قرفت والله العظيم من كل حاجة ونفسي اهج منها ومش عاوز ارجعها تاني انا بقالي شهرين بظبط العربية واشدها
اشتريت لها مساعدين مونرو وغيرت العفشة كلها وجددتها وسمكرتها ورشيتها وركبت جنوط 14 سبور وكاوتشات جديدة ولسا بجمع حاجة تعديل الفرامل وامبارح وانا في الشغل لقيت البواب بيكلمني بيقول لي تعالى العربية اتخبطت قولت له مش هقدر اسيب الشغل دلوقتي ( انا جه في بالي حكة بسيطة لاني راكن فوق الرصيف لجوة وراكن جنبي عربية ناحية الشارع من برة) لاقيته بيكلمني تاني وبيقول لي الخبطة جامدة روحت كلمت اخويا راح بص على العربية لاقا ميكروباص عشة(ترامكو) طاير من الشارع وطالع راكب على 3 عربيات داخل في عربيتي والعربية اللي جنبي وش في وش المهم اخويا مسك الواد اللي سايق عيل عنده 15 سنة وخد المفاتيح وحبسه جوة الميكروباص شوية وجه ابو الواد ومعاهم بلطجية وعاوزين يهربوا الواد لكن البواب والناس اللي في الشارع منعوهم ودايما البوليس بييجي في الاخر زي الافلام العربي .
المهم كلمت السمكري وجه بص على عربيتي قال لي هتغير كبوت واكصدامين و3فوانيس وستارة الريداتير سالتعليهم لاقيتهم في حدود2500 ده غير المصنعية يعني هتخشلها في 4000 كلها وربنا يستر ومايكنش في حاجة في الريداتير ده غير العربيتين التانيين عاوين لهم 5000 هما كمان المهم كلمت ضابط في القسم قال لي الواد هيحبس 4 ايام ويدفع غرامة تصادم 50 جنية عن كل عربية ويطلع بكفالة ابوه حاول تخلص الموضوع وخد اللي تقدر عليه بعد خناقات وحوارات في القسم بين الواد واهلة والبلطجية من ناحية واحنا (اصحاب العربيات من ناحية تانية) الراجل ابو الواد طلع 4000 جنيه لكل العربيات انا نصيبي000 2 وكل واحد من الناس التانية 1000
انهاردة روحت اتنازلت عن المحضر بعد الواد مادفع الفلوس وانا راجع راكب ميكروباص كان سايق بسرعة جداً . ولما جه يركن في الموقف كان هيخبط واحدة ست شايلة طفل صغير وطبعاً انا مشحون ومش ناقص قولت له فتح يا اسطى هتدوس الست قال لي مالكش دعوة وخاف على نفسك روحت قولت له وريني هتعمل ايه قال لي اللي بيعمل حاجة مابيقولش روحت نازل له وفاتح الباب بتاعة وشديته وقولت له انا مش عاوزك تقول انا عاوزك توريني هتعمل ايه ولولا الناس حاشوني مش عارف كان ايه اللي ممكن يحصل
ولما هديت شوية قولت لو اتهورت والموضوع اتطور كان ايه اللي ممكن يحصل ...وافتكرت سواق الميكروباص اللي داس وكيل وزارة الاعلام
هي دي مصر وهو ده القانون قانون المرور الجديد يا أخي 000
حسبي الله ونعم الوكيل