الموضوع: السلام عليكم سؤال الى اهل الاوبترا المحترمين

المشاركة الأصلية كتبت بواسطة mo7elmy

حسام بيه
هو صحيح فى دعامات معدنية قوية فى الاوبترا من ادام
لان فى واحد صاحبى عمل حادثة بالنوبيرا فالسمكرى استغرب من وجود الدعامة القوية دى لانها خففت من اثار الحادثة بشكل كبير وقالوا انا كان عندى كورولا امبارح مخلصها مفهاش الدعامة دى
وهل فعلا فى داعامات من الصلب قرب الماساعدين زى ما زميل كانت كاتب فى المنتدى ان فيرنا خبططه جامد وهى على سرعة 90
واكتشف ان العربية على شدادات مش اكسات وبرضو السمكرى على حسب قوله زوهل من وجود الدعامة فى المكان دة الى برضه بدورها قللت جدا من اثر الحادثة لانه كام مصور الفيرنا ومصور خبططه ؟
وشكرا
واخيرا وليس اخرا هل قبلت مشكلة فى الاتوماتيك وهل عربيتك فيها abs ولا لا
لانى عاوز اعرف تقديرك للفرامل فى ردك السابق هو على الفرامل العادية ولا فى وجود abs ?

هو فيها دعامه معدنيه فى الخلف ورا الاكصدام الخلفى

من الامام مش فاكر هابقى أبص وأقوللك

موضوع دعامات المساعدين برضه مش متأكد منه

انا عربيتى اوتوماتيك بدون Abs

الحمد لله مقابلتش اى مشاكل فى الفتيس وهو سلس واستجابته ممتازه وسحبه كويس جدا

والعربيه بشكل عام كويسه معايا وبقالها معايا حوالى 19 شهر

العيوب اللى ظهرت معايا

صاج السقف والكبوت ضعيف وبيتأثر بسهوله

ظهور صوت تزييق وانا بالف الدركسيون يمين وشمال اثناء تسخين العربيه الصبح

بعد 10 دقايق الصوت بيختفى وملوش اى تأثير على اداء العربيه

وبخصوص تقييمى للفرامل فهى استجابتها ممتازه وأسعفتنى فى مواقف كتير وكما ذكرت بدون Abs

المشاركة الأصلية كتبت بواسطة mo7elmy

تسلم يا حسام بيه
بصراحة اجاباتك شافية
حابب اقولك انى مضطر انى اجيب من غير ABS
لانى سالت النهاردة فى التوكيل
قالى مفيش لا مانيوال ولا اتوماتيك بABS دة كانت دفعة فيها دة ونزلت وخلاص مفيش منها تانى
فهاتوكل على الله
واقوم بتاجير واحدة مانيوال امشى بيها يوم كامل اعيش بيها واكيد حكمى عليها هيكون اكبر من دلوقتى
ودعواتك يا حسام بيه
وياباشا اى خدمة من الضرائب

ربنا يخليك

غريبه حكاية انهم بطلوها دى

دا لحد وقت قريب كانت بتنزل

انت سألت فى انهى فرع ؟

عموما بالتوفيق

وعايز اقولك ان فرامل العربيه دى طلعت محترمه بجد

انا من نص ساعه بالظبط كنت مش هابقى موجود تانى على وش الدنيا :)

كنت ماشى على الدائرى بتاع المعادى فى اتجاه المريوطيه

والطريق فاضى شويه فالواحد بيجرى بقى مع انى مش من عادتى اجرى بس كنت ماشى حوالى 140 - 150

وماسك الحاره الشمال عادى وقدامى تريلا ماشيه فى الحاره اللى فى النص

فباديله نور عشان ياخد باله منى

قام عمل العكس :(

ادا اشاره شمال وداخل عليا

انا فى لحظتها قولت خلاص انا يا هالبس فيه يا هالبس فى الحاجز الخرسانه اللى بين الطريقين , لان اكيد مش هالحق افرمل , واى عربيه مفيهاش Abs فى موقف زى دا يبقى Game Over خلاص :)

طبعا فرملت بس انا مش من النوع اللى بيقفش فرامل مره واحده وافضل قافش , لأ فرملت جامد وبعدين سبت رجلى لحظه وفرملت تانى , السرعه هديت شويه وهو اخد باله من صوت الفرمله ووسعلى شويه , ربنا ستر الحمد لله

الشكر فى الاول وفى الأخر يرجع لربنا طبعا , وللعربيه والفرامل ثانيا

المشاركة الأصلية كتبت بواسطة totaman

حمد الله على السلامة يا حسام وجامدة اوى ( جيم اوفر ) هههههههه بعد الشر عنك

والحمد لله ربنا ستر وخد بالك لان الاوبترا مغرية فى السرعة

و لله الحمد الفرامل مفيهاش ولا كلمة انقذت الواحد من حاجات كتير

ربنا يباركلك فيها ان شاء الله

الله يسلمك ربنا يخليك ياباشا

انا والله مش غاوى جرى يعنى اخرى 120 مثلا

بس كان الطريق فاضى بقى والمسافه طويله فمن غير مابتحس تلاقى نفسك بقيت 140 150

الحمد لله ربنا ستر

المشاركة الأصلية كتبت بواسطة mo7elmy

لا لا لا الف مليون سلامة عليك خدبالك ياغالى
ربنا يسلم طريقك
انا سالت فى التوكيل نفسه ( منصور ) اتصلت بيهم نفسهم وهما الى قالولى كدة
انما انت طمنتنى على الفرامل يا غالى
بس سوال العربية عومت منك وانت بتضرب الفرامل
ولا حسيت بثبات ؟

الله يسلمك ربنا يخليك

لأ العربيه معومتش خالص

هو بس الدركسيون كان عايز يحود منى شويه بس انا طبعا كنت ماسكه جامد

والعربيه كملت فى طريقها عادى محدفتش