أولاً العربيه ممتازه جدا من كل النواحي وتقفيلها ممتاز وخاماتها أحسن كتير من عربيات فى نفس الفئة السعرية ثباتها علي الطريق عالي جدا انا مشيت بيها على سرعه 210 كم في طريق المحور وبسم الله ماشاء الله كان ثباتها عالي جدا جدا وعزمها و سحبها جامد جدا الفتيسDual Logic إسم على مسمى فعلاً بيغير طريقة النقل مع كبسك لدواسة البنزين كل ما في الموضوع انك لازم تفهموا عشان تعرف تتعامل معاه الفتيس عباره عن فتيس منيوال عادي جدا يعني فيه دبرياج و اسطوانه ودسك بس الاختلاف انه متركبلها مواتير وسلونويد فالف كنترول وكمبيوتر وهما المسئولين عن تغيير النقلة و الدوس علي الدبرياج بالنيابة عنك ، يعنى ممكن تسمى الفتيس سيمى مانيوال ولازمله معامله خاصه عشان يطلع العزم بتاع العربيه وانت الي بتتحكم في العربيه عن طريق دواسه البنزين وكمان انت الي بتحدد امتي العربيه تنقل و امتي تحرق علي الغيار و امتي تسقط نقله أو نقلتين اقل كل ده بدواسه البنزين وفيما يلى كيفيه التعامل مع الفتيس Dual Logic :


أولاً : تسخين العربية قبل إستخدامها بكامل قوتها ، إنتظار دقيقتين ثم مشى سلانسية حتى تصل إلى درجة حرارتها إلى 90 درجة


ثانياً : قبل التحرك من وضع الثبات يجب الضغط على دواسة الفرامل ثم النقل على الوضع أوتو أو مانيوال حتى يظهر رقم 1 على الشاشة والنقلات المسموح بها من وضع الثبات هى الأول والثانى فقط .


ثالثاً : فى حالة الرجوع للخلف من الثبات يجب كذلك الضغط على دواسة الفرامل ثم النقل حتى يظهر حرف R على الشاشة . ولا يجب النقل للخلف إلا بعد التاكد من ثبات السيارة تماماً .
ملاحظة : فى حالة الرجوع للخلف R ممكن تسمع صوت بيدي بيب مره واحده و بعدين ينقل ويجيب النقله R وسعات بيدي 2 بيب وده بعتمد علي سرعه نقلك يعني مثلا لو وقفت بسرعه و نقلت على R على طول ساعتها ممكن تسمع صوت بيدي 2 بيب و بعدين بيستجيب و ينقل و ده الكمبيوتر بيعمله عشان يدي شويه وقت لفصل الحركه و عكسها اما لو كنت ماشي للامام ووقفت و جيبت العصا علي R بس مش وري بعضه بسرعه يعني سيبت ثانيه او 2 قبل ما تحرك العصايه فبينقل علطول بعد بيب واحده .


رابعاً : فى حالة الحركة
فى مفتاح بجانب عصاية الفتيس مكتوب عليه حرف E (Economy) ولتشغيلة إضغط علية لحد ما يظهر حرف E على الشاشة وده وظيفته ينقل بسرعة كل النقلات على 2500 أر بى إم لتوفير إستهلاك البنزين، على سبيل المثال ممكن تلاقى العربيه بتنقل التاني و الثالث والرابع والخامس والسادس و لسه العربيه سرعتها ماجبتش 80 كم فبتحس ان عزم العربيه ضعيف جدا و ضايع و ممكن تفصلة عن طريق الضغط علية مره اخرى لحد أما يختفى حرف E من الشاشة لو مش عاوز ده يحصل معاك ، ويفضل إسخدامة فى السفر على طرق طويله وسريعة .


فى حالة القيادة العادية :
دوس على دواسة البنزين بالتدريج الكمبيوتر بيحس بزاوية الدوسة على البدال والعربية هاتنقل لوحدها على أر بى إم من 3200 إلى 4000 . نفترض إن العربية على الرابع وال أر بى إم عند 2500 لو كبست دواسة البنزين للأخر الكمبيوتر بيفهم اني عاوز اجري وهاينزل غيارين للثانى وتفضل تحرق وكمان لو العربية على الخامس وال أر بى إم عند 2800 لو كبست كبست دواسة البنزين للأخر الكمبيوتر بيفهم اني عاوز اجري وهاينزل غيارين للثاث وتفضل تحرق وديه ميزة جامده جداً لأن الفتيس الأوتوماتيك العادى بينزل غيار واحد بس .
ويمكن إستخدام عصا الفتيس أو البادال شيفت اللى فى الدركسيون ( + لنقل لغيار أعلى و – لتسقيط غيار ) فى النقل حتى وإنت دايس على البنزين والبادل شيفت ممكن تستخدمه على كل الأوضاع (مانيوال – أتو – Economy)


فى حالة القيادة السريعة (الشد) :
تكبس على دواسة البنزين زى ما انت عايز وانت على الأوتو من أول غيار ماتقلقش هاينقل لوحده عند 5500 وده عشان تاخد أعلى ضغط (Boost) من التربو لان الكمبيوتر بكبسك علي الدواسه بيفهم انك عاوز تحرق علي الغيار وعشان ما تحرقش الغيار لازم ترفع رجلك سنه بسيطه جدا عن الدواسه عشان العربيه تنقل للغيار الي بعده ، أما على المانيوال لازم تنقل عند 5500 باستخدام البادال شيفت اللى فى الدركسيون عشان الأر بى إم مش هايفصل حتى لو عديت على أول الريد زون هايفضل ثابت لفترة لحد أما تنقل .



النتشه الي بتحصل بين النقله و النقله دي نتيجه ان الكمبيوتر بيفصل الحركه (يدوس دبرياج) و ينقل ويرجع يسيب الدبرياج وممكن نقلل الاحساس بها عن طريق حساسيه الرجل علي دواسه البنزين يعنى لما تدوس بالتدريج مش هاتحس بالنتشه ديه خالص لكن كل ما تكبس علي دواسه البنزين النتشة بتزيد .



نصائح أخرى :

للحفاظ على التربو يجب قبل إيقاف تشغيل المحرك بعد قيادة طويله الإنتظار 5 دقائق تسيب الموتور شغال إلى أن تنخفض الحرارة ( هتلاقى مروحة التبريد هاتشتغل مرتين ثلاتة وهاتسمعها ) . ويمكن اإنتظار لدقيقة واحدة قبل إيقاف المحرك بعد القيادة العادية



يفضل تغيير الزيت كل 6000 كم والفلتر مره كل مرتين تغيير زيت ( كل 12000 كم ) ، والكشف علية كل 2000 كم وممكن تزود ربع لتر كل 2500 كم ، وسيبك من أى حاجة ثانية مكتوبه فى الكتالوج عشان ظروف الجو والتشغيل عندنا وأسلوب القيادة .