تشكر يا عمر باشا على المجهود دا وعلى الموضوع الرائع
رقم العضوية : 56615
تاريخ التسجيل : 22Dec2009
المشاركات : 449
النوع : ذكر
الاقامة : 6th of October
السيارة: Mercedes Benz C200 (2013)
السيارة[2]: Renault Fluence E3 2015
الحالة :
بسم الله الرحمن الرحيم
أولا أعرفكم بنفسى و بعربيتى : اسمى عمر .... سنة 5 طب بشرى و من سكان 6 أكتوبر .... اما عربيتى كيا سيراتو 2010 خليجى EX F/O لونها اسود و العربية عاملة 5430 كيلومتر ... حبيت أعمل صيانة ال1000 بس الحقيقة اتأخرت لظروف الامتحانات - طبعا كان عندى خلفية من أعضاء المنتدى عن مواعيد الصيانة اللى طلعت مختلفى تماما عن مواعيد الصيانة اللى مكتوبة فى كتالوج العربية - مش موضوعنا
اسمحولى التقييم هيكون من 10 و كل ما هو سلبى ينقص درجة من التقييم
1- الحجز:
الأول اتصلت ب EIT أبو رواش علشان أحجز .... طبعا محدش بيرد و كان الله فى العون لأنهم شغالين هناك زى خلية النحل بس بعد 6-7 محاولات ردوا و قالولى اتصل ب 19KIA علشان أحجز الأول - اتصلت و ردوا الحمد لله من أول مرة بس انظرت حبة على السماعة و ردت عليا انسة محترمة اعتقد اسمها أ.منى و أخدت كل بيانات العربية و قالتلى ان السيرفر واقع و إنى اتصل تانى الساعة 6 على ما يكون السيرفر رجع .... المهم اتصلت تانى يوم الساعة 6 و نص و حجزت يوم الخميس اللى هو كان انهاردة الساعة 10 ... طبعا أخدت رقم الحجز و المعاد
2- أبورواش:
صحيت الساعة 9 و نص و جريت على الصحراوى .... طبعا انا مكنتش أعرف حاجة عن أبورواش دى غير إنها ورا كارفور بس فين بقى الله أعلم .... المهم لقيت يافطة مكتوب عليها أبورواش يمين 100 متر .... دخلت يا معلم و تهت جوة بتاع ييجى نص ساعة لدرجة إنى وصلت للمنصورية ... المهم عرفت الطريق و إنه المفروض إنى كنت أدخل من الفتحة اللى بعد كارفور مش اللى قبلها .... طريق يدغدغ أجدعها عربية بس أخوكوا سواق ههه .... وصلت المنطقة الصناعية ... إنى ألاقى يافطة واحدة لكيا .... مفيش .... المهم ولاد الحلال دلونى و قالولى إنها جنب جريدة النبأ ... طبعا مرسيدس و تويوتا و سبيرانزا كانوا مرشقين الشارع لافتات علشان تدلك على الطريق ... إنما أختنا العزيزة كيا - لا حياة لمن تنادى ..... المهم من بعيــــــــــــد لمحت يافطة 4 متر فى 4 متر متعلقة على عامود مكتوب عليها كيا .... و كانت بعيدة عن التوكيل ب ييجى 2 كيلو ... و دى حاجة تخصم درجة من التقييم لأنه المفروض يكون فيه لافتات أكتر من كدة لأن شركة كيا مش شوية ... دخلت طبعا الساعة 10:20 يعنى متأخر عن معادى تلت ساعة
3- الدخول:
طبعا اسمى كان على البوابة و دخلت برقم الحجز ...
..
..
..
ادونى رقم كدة لزقوه على العربية و دخلت لقيت المنظر الحلو ده
..
أكتر من ييجى 20 عربية كيا سيراتو كوبيه و كان شكلهم زى العسل و هم واقفين جنب بعض ... طبعا كل اللى كانوا جايين يعملوا صيانة كارينز و سيراتو .... الإنطباع الأول هو إنى دخلت مكان فخم و يليق بكيا بصراحة ... فضلت واقف ييجى 5 دقايق كدة على ما نظموا المرور جوة و جالى عامل من الجراج و ظبطنى على الجراج و قاللى انزل يا باشا .... و بعدها ب 10 دقايق جه المرشد أو الموظف اللى هو أ.محمد و معاه جهاز كدة زى كشاف النور و فيه شاشة تاتش و أخد كل بيانات العربية و رقم الحجز و الرخصة و محتويات العربية و الخدوش اللى فى العربية (حتى لو كانت دقيقة علشان مترجعش تقولهم انتوا اللى خربشتوها) و قاللى اتفضل معايا جوة ... دخلت فى التكييف يا معلمين و استقبال حلو الحقيقة و طبعلى الورقة دى و قاللى هتتكلف 320 جنيه
..
قلتله هو مش المفروض 268 جنيه و لو هغسل يبقوا 303 .... قاللى لأ احنا هنحطله زيت 5000 علشان تجيلنا تانى عند ال 10000 كيلو و تنتظم فى الصيانة و الاسعار شاملة المصنعيات و الفلتر و كله ... قلتله طب اشتغل بس و بعدين نتكلم - قاللى طب اتفضل تحت فى الاستراحة على ما تخلص - هتخلص امتى يا استاذى قاللى 2:00 مع إن العربية داخلة 10:42 يعنى 3 ساعات فى تغيير زيت و فلتر - أدى تانى درجة من التقييم طارت لأنهم المفروض يشغلوا Channels أكتر من كدة
4- الاستراحة:
..
مكان حلو و واسع أوى تحت الأرض فى التكييف ... تليفزيون و كافيتيريا و انترنت وايرلس و ام بى سى 2 و مكان تصلى فيه و حمام و كمان شاشة LCD فى كل دور علشان تبص على اسمك و تعرف العربية وصلت لحد فين فى الصيانة و خلصت ولا لسة ... بضرب بعينى يمين كدة لقيت القطة دى واقفة قلت لازم أقوم أصورها لأنها متتسابش
..
..
..
كانوا عارضيين 5 عربيات تحت و طبعا تتوسطهم الوحش الأحمر كيا سيرتو كوبيه الجميلة دى ... لقيت كمان الورقة دى
..
و اللى لحد دلوقتى مش عارف أفسرها لأنى مش مصدق إنه فيه سيراتو EX بفتحة سقف و سمارت كى !!!!! - شفت كمان سيراتو كدة لونها أبيض و التابلوه لونه رصاصى فى بيج و مصنوعة من خامات حقيرة حتى مكانش فيه لا نواكل و لا سى دى شاشة ولا حتى العلبة اللى بين الكرسيين و الفرش كان لونه مقرف... عرفت بعد كدة إن دى سيراتو LX Automatic وكيل
قلت أطلع أبص على باقى العربيات فوق شفت الأتى
1- كارينز فيها جى بى اس و دى فى دى بشاشة فى الكونسول و معاها ريموت دى فى دى
2- كارينز بإزاز فيميه فابريكة اللى هو مسموح ترخيصه
3- سيراتو LX Manual - و كانت رديئة جدا الحقيقة و الفتيس بتاعها شكله مختلف تماما عن اللى موجود على الويب سايت
4- سيراتو SX - Highline جنوط مختلفة بقى .... و هو ما سمحلى إنى اتعرف أكتر عن الجنط ال 17 اللى مجنن الدنيا فى الشمس و هو عن قرب بصراحة جنط مبالغ فيه و شكله شاذ جدا على العربية و كبير و مش متناسق مع شكلها ... رغم إنه شكله جميل بس كان هيبقى أحلى لو كانوا عملوه نفس الشكل مقاس 16 .... معظم العربيات اللى كانت هناك كانت جنط 15-16
5- شفت كمان الريو .... عربية حلوة بس مش فخمة أوى من جوة مقارنة بالأفيو
6- أختفاء تام للكيا سول
7- عدد مهول من الكيا سيراتو كوبيه و هو ما سمحلى إنى أبصلها أكترعن قرب
8- الكيا أوبيتما عرفت إنها غالبا مش هتنزل مصر و لو نزلت سعرها هيعدى ال 200000
9- شفت كيا سورينتو و كانت عربية نجدة - عربية حلوة أوى برضه
5- الملل:
الوقت مش عايز يعدى و انا لواحدى و مش معايا اللابتوب - نمت و انا قاعد من كتر ما المكان مريح و هادئ تحت فى الاستراحة - شوية نوم و شوى أقوم اتمشى و شوية أقوم أبص على الشاشة - المهم الوقت عدى بسلام بعد أن قتلنى الملل
6- الاستلام و الدفع:
طلعت تانى للأستاذ محمد قاللى الورقة جاهزة فى الحسابات ... رحت الحسابات .... كام يا عم .... 355 جنيه قلتله ليـــــــــــــــــــــــ ــــــــــــــــه احنا متفقين على 320 و أصلا انا لسة موافقتش على 320 غير لما أخد فاتورة مفصلة ... المهم اديتله 400 قاللى معاكش 5 .... رديت ببرود "لأ" قاللى خلاص خليها علينا .... انا بصراحة قلت مش خسارة فى العربية اللى شايلانى خصوصا إن أول صيانة مش غالية أوى يعنى المهم التقيل اللى هييجى بعد كدة .... طلعت أستلم لقيتهم غسلوا الموتور بالفوم .... من غير ما انا أطلب ده أساسا .... شدوا فرامل اليد ..... برضه من غير ما انا أطلب ده بس انا كنت هطلبه الحقيقة و نسيت هههه .... العربية من جوة تضرب تقلب بس مش مشكلة .....أدى كمان درجة كمان تضيع من التقييم المفروض إنه كان يقوللى على التكلفة الحقيقية من الأول ... المهم كله تمام لكن جه على بالى سؤال ملح خلانى أرجع تانى لأستاذ محمد
7- سؤال أخير:
انت ليه محاسبتنيش على 268 أو 303 زى ما انتوا عاملين إعلان على نايل موتورز ... قاللى علشان انت عربيتك خليجى .... قلتله أفندم ايه التفرقة العنصرية دى ... هى كيا صينى ولا ايه .... قاللى لأ بس احنا مش بنعمل عروض إلا للعملاء بتوعنا بس "بمنتهى قلة الذوق و انا اسف إنى بقول كدة" ... حسيت من كلامة إن اللى راكبين جابر عبد الشهيد دول يهود مثلا و إنهم ميستحقوش حتى الصيانة حتى لو دفعوا 1000 جنيه - هو انا مش عميل ولا انا جاى مع عفش العروسة ولا ايه ؟؟؟؟؟؟
..
رد عليا قاللى بصراحة احنا بناخد من الخليجى ضعف الوكيل
أدى درجة كمان طارت من التقييم المفروض لأنهم بيفرقوا بين العملاء ... هو المفروض يتصرف كوكيل لكيا مش وكيل لنفسه
طب صيانة ال 10000 و ال 20000 و 30000 هيتكلفوا كام يا استاذ
قاللى 500 - 950 - 500 قلتله شكراااااااااااااااااااااا ا ... معتقدش إنى هكمل عندكم لحد 10000 دى لو بقت عضمة فى قفة مش هعمل صيانة هنا تانى - إنشالله أعمل الصيانة عندى فى الجراج فى البيت - و بعدين ختمت دليل الصيانة و مشيت
8- بعد الصيانة:
الحق يقال إن العربية صوتها قل جدا و العزم زاد جدا جدا- فرامل اليد قافشة بس أحسن من الأول بكتير - الموتور اتغسل غسلة حلوة بس كتيير عليه 35 جنيه غسيل لأنه المفروض فى أى محطة بنزين غسيل الفوم مش بيتكلف أكتر من 10 جنيه - الغربال الجديد له شدة - ماشى يا عم بس برضه انا خارج من هناك و انا بقول أه يانى يانى يانى مش هعمل صيانة هنا تانى
بعد ما روحت كلمت صاحب المعرض اللى جبت منه العربية ... قالى انت ايه اللى يوديك هناك خد ده عنوان مركز الخدمة المعتمد بتاع جابر عبد الشهيد
9- التقييم النهائى:
6 من 10
10- الخلاصة:
محدش يعمل هناك صيانة إلا اللى تبع التوكيل بس .... لأنهم هيسفحوك لو انت خليجى .... من غير خناق ولا حاجة زى ما احنا سمعنا بس الفلوس هتطلع من جيبك يعنى هتطلع حتى لو هتدفع الضعف و ادى الفاتورة - 160 جنيه زيادة على تمن الصيانة لمجرد إنى خليجى
بالنسبة للعربيات اللى شفتها هنا ... ثبتلى إنه الخليجى يكسب ألف مليون مرة ... انا لحد امبارح كنت بقول مفيش فرق بس لما شفت على الطبيعة ... لأ لأ لأ ... و الله ماهو علشان انا راكب خليجى بس الخليجى يكسب مليون مرة ... خامات أفضل بكتير بكتير بكتير ... و اوبشنز أكتر
أدى عنوان مركز الخدمة المعتمد بتاع جابر عبد الشهيد و اياكم حد معاه خليجى يعمل صيانة فى التوكيل .... و الله يسامحه بقى العضو اللى قاللى اتكل على الله و روح اعمل صيانة فى التوكيل .... و ياريت منسمعش أى كلام أى حد يفتي فيه
43 شارع أبو داوود الظاهرى - متفرع من مكرم عبيد - مدينة نصر
رقم العضوية : 2548
تاريخ التسجيل : 10Oct2007
المشاركات : 1,009
النوع : ذكر
الاقامة : cairo
السيارة: Cerato 2011
السيارة[2]: Jetta high line
دراجة بخارية: لا
الحالة :
تشكر يا عمر باشا على المجهود دا وعلى الموضوع الرائع
((لا إله إلا أنت سبحانك إني كنت من الظالمين))
رقم العضوية : 40298
تاريخ التسجيل : 14May2009
المشاركات : 5,965
النوع : ذكر
الاقامة : Heliopolis- Masr El Gedida
السيارة: I do not have
السيارة[2]: لا
دراجة بخارية: I do not have
الحالة :
شكرا على التقرير الرائع
[img3]http://s11.postimg.org/5u651o4eb/bsmlhe41104899dnj0zx5.gif[/img3]
رقم العضوية : 56754
تاريخ التسجيل : 23Dec2009
المشاركات : 3,492
النوع : ذكر
الاقامة : القاهره
السيارة: ميني كوبر 1979
السيارة[2]: كيا بيكانتو 2012
الحالة :
تقرير جميل جدا جدا
بس يعني انت مخمنتش انهم هيقلبوك جوه عشان خليجي
دي حاجه و الحاجه التانيه
انت ليه بتذم في خامات العربيه الوكيل و كمان في المانيوال ؟
عشان بس محدش من ملاكهم يزعل منك
رقم العضوية : 46059
تاريخ التسجيل : 03Sep2009
المشاركات : 856
النوع : ذكر
الاقامة : Cairo Nasr city
السيارة: Logan 2011
السيارة[2]: mercedes model 82
الحالة :
43 شارع أبو داوود الظاهرى - متفرع من مكرم عبيد - مدينة نصر[/quote]
ده امير و جوزيف صح اصل مفيش مركز صيانة فى المنطقة دى غيرهم
لكل فاسد في بلادي سجن .... طره بينادي
رقم العضوية : 1716
تاريخ التسجيل : 12Aug2007
المشاركات : 12,834
النوع : ذكر
الاقامة : Egy
السيارة: ex polo ex lancer
السيارة[2]: Kia Cerato
الحالة :
هو حضرتك تشكر على الموضوع الجامد طبعا
بس أنا عندي تعليقين
خامات الخليجي و الوكيل الداخلية واحد ومش ممكن تفرق عربية خليجي أو وكيل غير من الكماليات .
موضوع ان الوكيل يعمل أوفر للعربيات اللي هو بايعها بس ده عادي جدا و حقه ...انه يعامل الخليجي بشكل مالي محتلف أنا شايفه عادي برضه
المهم انه ما بيستهبلش لأن في ناس بتضرب في اتنين فعلا وفي اللي بيغلس
و يدي مواعيد بعد شهر
وفي اللي بيرفضها خالص
أنا راكب عربية خليجي و مبسوط منها
بس برضه حرام نقول الوكيل وحش في الصيانة
ده غير ان حضرتك بتقول ان العربية خرجت من الصيانة "تضرب تقلب" و كلنا عربياتنا خرجت مغسولة جوة و برة و متلمعة كمان
دي غالبا حظك كان وحش اليوم ده
أما موضوع اليفط
حضرتك لو دخلت من جنب القرية الذكية - اللي هو الطريق الطبيعي- هاتلاق يعلى كل عامود يافطة كيا
كل عامود ...ازاي ما شوفتهمش ؟؟ أو حضرتك رحت من سكة تانية بقى
الف مبروك على الصيانة و عقبال الـ100 الف
رقم العضوية : 21864
تاريخ التسجيل : 11Oct2008
المشاركات : 49
النوع : ذكر
الاقامة : cairo
السيارة: KIA Cerato SX
السيارة[2]: shahin
الحالة :
معلش ما تزعلش مني . بس انا كده مبسوط جدا (مش شماته ولا حاجه والعياذ بالله)مبسوط لان الوكيل صدق لاني انتظرت العربيه 7 شهور و مره سألتهم انا ايه اللي يخليني معطل نفسي منا اروح اشتري خليجي ردوا عليا وقالولي بس مش هاتبقى نفس المعامله لما تيجي تعمل الصيانه
مع احترامي الكامل ليك التفرقه في المعامله هو ده الصح في ظل الظروف اللي مصر فيها
يعني لما شوية تجار ينزلوا العربيه قبل الوكيل بـ 4 او 5 شهور ماهو ده وضع غلط برده
وعلى فكره انا اول مره اروح فرع ابو رواش عشان احجز العربيه وصلت لما تتبعت يفط اعلان كيا اللى بجد مترشقه على عمدان الكهربا من اول القريه الذكيه لحد هناك
الله
رقم العضوية : 56615
تاريخ التسجيل : 22Dec2009
المشاركات : 449
النوع : ذكر
الاقامة : 6th of October
السيارة: Mercedes Benz C200 (2013)
السيارة[2]: Renault Fluence E3 2015
الحالة :
بص هى مسألة الخامات دى انا مش قصدى بيها ال sx - ex انا قصدى ال lx الوكيل حضرتك يا ريت و انت هناك تبص بصة على العربيات اللى ذكرتها دى - بجد حطها جنب الخليجى تحس إن فيها حاجة ناقصة - فيه حاجة غلط - كما لو كان دايو سيراتو مش كيا سيراتو - مع الاعتذار لملاك الدايو اللى كنت واحد منهم هههههههههههههه
اما بالنسبة للماديات ... هى مش فارقة فى صيانة الألف إنما سيادتك لما تيجى تبص لصيانة ال 20000 و تدفع 950 جنيه و غيرك يدفع 500 جنيه لأ معلش ساعتها فلوسى هتوجعنى لأنى مش لاقيها فى الشارع
رقم العضوية : 56615
تاريخ التسجيل : 22Dec2009
المشاركات : 449
النوع : ذكر
الاقامة : 6th of October
السيارة: Mercedes Benz C200 (2013)
السيارة[2]: Renault Fluence E3 2015
الحالة :
مهم انا و انا خارج لقيت العمدان اللى بتتكلم عليها - بس للأسف كانت مرشقة يفط تويوتا - انا اتخميت فيها الأول و افتكرتها كيا لأن لونها أبيض فى أحمر :-)
اما بالنسبة للمعاملة فخلاص الحمد لله لقينا عنوان واحد يعملنا صيانة الخليجى بنفس سعر الeit ولا الحوجة ليهم - و برضه eit شغلها زى الفل و انا مبعيبش فيها
رقم العضوية : 56615
تاريخ التسجيل : 22Dec2009
المشاركات : 449
النوع : ذكر
الاقامة : 6th of October
السيارة: Mercedes Benz C200 (2013)
السيارة[2]: Renault Fluence E3 2015
الحالة :
لعلم حضرتك انا كمان استنيت شهرين على ما استلمت عربيتى .... و رحت اخترتها بمزاجى و جابولى واحدة و معجبتنيش علشان كنت شاكك فى حدفة و رجعت تانى و جبت غيرها و ده ميزة الخليجى ... من كام يوم ماشى عند الحصرى واحد وقفنى و سألنى هى عربيتك دى خليجى؟؟؟؟
فيه ايه يا جماعة و الله عربية و بتمشى على 4 عجلات و زى الفل ما شاء الله .... لا بتولع وهى ماشية ولا ماشية تفك فى الشارع .... كل الناس مرعوبة من الضمان و معاهم حق ... بس انت بتشترى عربية ب ميت الف يبقى لازم تستنى
المفضلات