البيكانتو من الامام عاملة زى ما يكون عيل شاف عفريت او فيل طائر مثلا قام جاله حالة ذهول وعينيه اتسعت ذهولا وفتح بقه من الإنذهال
الماتيز والشيرى Qqبيفكرونى بالفار جيرى
الشاهين من الأمام بتفكرنى بموظف الحكومة ابو نضارة كعب كباية
العربية اللانسر الكريستالة بتفكرنى بسمكة القرش ، خصوصا لما يكون لونها فيرانى، ولو متركب لها سبويلر من ورا بحس انه زعنفة القرش
العربية الفورد توراس اللى كانت موجودة فى مصر فى التسعينات بتفكرنى بصابونة الوش
ال128 المعدلة ذات الفانوس المربع شكلها من قدام بيفكرنى بالطالب المجتهد
البيجو 504 شكلها من قدام بيحسسنى انها واحد بيحتشد للعدائية بس لسة موصلش لمرحله اظهار غضبه
اللى بحس انها فعلا شخص عبر عن غضبه وكشر عن انيابه هى البى إم الجديدة بكل فئاتها
الميتسوبيشى باجيرو بتفكرنى بكلب البولدوج
ال 132 والبى إم موديلات التمانينات بحس فى شكلها انها كانت يخت جار عليه الزمن وتحول الى سيارة
اللانوس من بعيد شكلها بيفكرنى بالمكنسة الكهربائية لدرجة انى احيانا لما اشوف واحدة منها وعقلى مشغل فى مسالة آخرى، عقلى الباطن يفرض على ذهنى صورة خرطوم متركب فى الشكمان بتاعها
الماتريكس بحس انها مكواه بالبخار
التويوتا لاند كروزر بتفكرنى بالبقرة الحلوب المرسومة عى علب السمنة الهولندية
العربية الفولكس البيتلز، شكلها بيفكرنى بست بيت مصرية قاعدة تخرط ملوخية او تقور بتنجان للمحشى
العربية ال126 شكلها بيفكرنى بالفار الصغير قريب جيرى الذى كان دائم يظهر فى افلام توم وجيرى مرتديا حفاظة
العربية الكيا برايد هاتش باك بحس انها طالبة جامعة من النوع اللى بيلبس نضارة ويعمل شعره كحكة وتمشى بخطوة عسكرية وهى محتضنة الكتب ومالهاش دعوة بحد
الرينو كليو سيدان بحس انها كائن انتجته الهندسة الوراثية نصفه الامامى سمكة ونصفه الخلفى بطة
الرينو ميجان هاتش باك بتفكرنى بمنظر براد الشاى الإستانلس ابو صفارة
البيجو 405 انا متأكد ان اللى عملها كان عاملها اساسا للإستخدام فى الجهات الأمنية لأن شكلها ظابط شرطة، لما بشوف البيضاء منها عينى بتدور على عدد النجوم الموجودة على كتفها
الفيات بونتو التسعينات بتفكرنى بمترو الانفاق (القديم -المرحلة الاولى)
الهامر بتفكرنى بثور المصارعة الأسبانى
المفضلات