يا جماعة حد يساعدنى عندى مشكلة بخصوص اللوجان

**spiderman1987** · 20-02-2010 02:49 PM

انا عندى اللوجان من شهرين تقريبا و من اسبوعين كدة كل لما اجى ادوس فرامل جامد او سعات لما اجى ارجع reverse اسمع صوت حاجات بتخبط فى بعض جامد اوى تحت فى العفشة صوت خبط حديد فى حديد فا يا ريت لو اى حد حصلو المشكلة ديه او يعرف حد يقولى ايه الموضوع بالظبجط و شكراااااااااااااااااااا

**frhateg** · 20-02-2010 02:55 PM

لو الصوت ده مستمر معاك انصحك تروح التوكيل .

**gebreel** · 20-02-2010 02:59 PM

انا مش فاهم الصوت بيطلع ازاي او تشبيه ليه

**alfa_we** · 20-02-2010 04:05 PM

الصوت دا عبارة عن طقة بمجرد الضغط على الفرامل وانت راجع للخلف بتسمعه ؟
لو هوا دا الصوت يبقى خزان الفرامل

**ramy_gamal** · 20-02-2010 04:07 PM

ممكن تكون حاجه بسيطه مفكوكه يعنى الفبرة بتاعت العجل او الستارة مسمار مفكوك منها يعنى وديها التوكيل احسن واسرع وقت

**mostafabakry** · 20-02-2010 04:14 PM

يا ريت تروح التوكيل في اقرب فرصة
انا حاسس انها حاجة في الفرامل نفسها

**zkralla** · 20-02-2010 04:39 PM

أنا هحكى لحضرتك موقف حصل معايا وكان هايجننى
كانت العربية ماشيه معايا زى الفل المهم اتخبطت خبطه فى الرفرف الى ورا رحت عند البيت ظبت الرفرف ومشيت بالعربية واسمع صوت تخبيط فى الطلعه كل شويه
الواحد على طول دماغه ببيروح للاحتمال الاسوء
ده مساعد
لا ديه قواعد ماتور
لا ديه مش عارف أيه وهاروح التوكيل واضيع يوم كامل غير الشقا والمشاوير
المهم استعنت بالله ورحت
قعدت اطلع بالعربية على التالت قاصد من كده عشان اخلى العربية تترج واركز الصوت جاى منين حسيت أنه جاى من الشنطه
المهم ربنا الهمنى - مبحبش خالص حد يقول فككاه منى ونباهه لا ده فضل ومنه من ربنا- أن ممكن يكون السمكرى استعمل الكوريك وما ربطهوش كويس رحت راكن وفتحت الشنطه والمفاجاءه أن كلامى طلع صح الكوريك سايب مش متارط عليه

نصيحتى لحضرت تفكر الاول فى الاحتمالات البسيطه ولو ما وصلتش تطلع زى ما الاخوه قالولك على التوكيل
أتاكد كويس أن مفيش حاجه فى العربية جوه الصالون او فى الشنطه يعنى (ممكن تلف كل حاجه فى غطا العربية كويس وتزنقها فى اى حته )
بعد كده بص على الكوريك ( ومفتاح العجل واى حاجه ممكن تعمل صوت فى الشنطه وبص بصه كمان جوه الكبوت على أى حاجه مش مربوطه كويس الخراطيم طلمبه ميه ... الخ واستبعد اى احتمال تكون فيه حاجه محطوطه فى العربية هى الى بتعمل الصوت ده
وفى مكان هادى وأنت قافل التسجيل جرب شويه اطلع قدام وارجع ورا وركز بالظبط الصوت جاى منين وطمنا يا باشا

وأن شاء الله يطلع موضوع بسيط

**DR/WAFEK** · 20-02-2010 05:05 PM

على فكره كان عندى صوت تخبيط ورا وكان مجننى وكان مبيجيش غير فى المطبات والطرق المكسره كنت مفكر فى حاجه فى العفشه لحد ما واحد كان بيورينلى الكوريك بيشتغل ازاى ولما خلص حطه بص مقرتش عليه لقيت الصوت زاد خالص قمت شايا الكوريك الصوت اختفى فممكن فعلا تكون حاجه بيسطه بس كون انها مع الفرامل فلازم تتطمن عليها فى التوكيل