الموضوع: بفكر اركب زينون .... حد عنده اقتراحات

طيب متشكر اوى يا جماعه على المعلومات دى :)
عندى سؤال دلوقتى اللى حيركب حيقطع فى الفيش بتاعت الفانوس ولا حيركبه ازاى؟

لأ مش محتاج يقطع فى أي حاجة، كلها فيش بتركب فى الفابريكة
نصيحة لو تركب عدسات يكون أحسن عشان تاخد أفضل أداء و تضرش حد

طيب والعدسات دى مين اللى بيعملها ؟
ولا اجيب فانوس بعدسات احسن؟

ممكن تركبها عتد "جو" بتاع محمد عثمان بس حيعمل تعديل فى الكشاف! خسارة طبعا
ممكن تركب كشافات بعدسات، حتلائى عنده إختيارات كتير

هى العدسه حتفرش احسن من الفانوس العادى مش كده؟
ولو عندك صور للفوانيس اللى هنا فى مصر اكون شاكر جداً ليك لو نزلتها :)

مش هتقطع فى الأسلاك عشان الفيش إنما هتقطع عشان الكتاوت ، ويستحسن تحط الكتاوت فى حتة قريبة وأمان بعيدة عن المياه ، يعنى مثلاً فوق شوية ناحية الكنترول ، وابعد عن الكتاوت أبو 3 جنيه اللى مكتوب عليه تركى عشان هو صينى وبيضرب على طول والغريبة إنه كان بيخرف معايا أحياناً ينور العالى مع الواطى وأحياناً يفصل الواطى لما أولع العالى كدة بمزاجه والله من غير أى لعب !! :) ، فيه واحد تركى بجد ب 17 جنيه وحجمه أكبر ونضيف

المشاركة الأصلية كتبت بواسطة otefa

ايه لزمة الكتاوت!!
انا مركبه كذا مرة ولا مرة احتجت كتاوت

الكتاوت بالذات انت ونصيبك ، هو الكتاوت اسمه بالإنجليزى relay وهو وظيفته إيه ؟ هو بيفصل ويوصل بين دايرة الحمل الأساسية ودايرة المفتاح بدون تلامس بينهم ، يعنى إيه ؟ يعنى أنا ممكن بزرار صغير أوى ماشى فيه سلكة شعرتين تلاتة أشغل دايرة كبيرة ماشى فيها لمبات كبيرة أو تكييف مثلاً ، بس لو التيار بتاع الدايرة الكبيرة دى مشى فى المفتاح الصغير ده المفتاح مش هيستحمله وهيسخن وهيتحرق ، عشان كدة بيركب الكتاوت كوسيط يعمل على فتح وغلق الدايرة بدون كونتاكت فعلى بين دايرة المفتاح ودايرة الحمل الأساسية ، بتبقا عن طريق مجال مغناطيسى صغير بيشد ريشة صلب فيعمل توصيل ولما تفصل المفتاح المجال المغناطيسى يروح والريشة ترجع تانى فتفصل الدايرة ، يعنى بتوصل وتفصل زى ما قولنا بدون تلامس فعلى يعنى بدون ما التيار الكبير يمشى فى المفتاح
معلش على المقدمة بس ضرورية عشان التوضيح ، إجابة السؤال بقا إن غالباً المفتاح اللى هو دراع النور فى حالتنا بيبقا متصمم على حمل اللمبات الفابريقة 55 وات مثلاً فلو انت ركبت لمبات 100 وات مثلاً المفتاح ممكن مايستحملش الكهرباء الزيادة دى وبتلاقى دراع النور بيسخن وممكن يتحرق ويسيح من جوا ، وممكن برضه يستحمل ومايتحرقش يعنى انت ونصيبك ، بس الأضمن طبعاً إنك بتركب على الدايرة كتاوت عشان تحمى مفتاح النور وخصوصاً إن الكتاوت رخيص وبيحميك من مشكلة كبيرة لا قدر الله عشان زى ما حضرتك عارف مشكلة صغيرة فى الكهربا ممكن تضيع العربية بالكامل

فى الأحمال الكبيرة فى العربية زى مروحة التكييف مثلاً غالباً بيبقا المفتاح راكب عليه كتاوت فى الفابريقة وده تجنباً إنه يضطر يعمل مفتاح كبير ويمشى كابلات تخينة جوا التابلوه

بس كدة