ده تقييم واحد عامله لسيارة نيو اكسنت
--------------
اشتريت نيو اكسنت 2007
واخيرا ما بقتش باسرق سياره والدي
السياره بشكل عام جميله
واجهتها تشبه الي حد ما الكورولا
ومن الخلف تشبه الياريس
خطوطها غريبه
الموتور 1600 سي سي
112 حصان
جنط 15
سي دي jvc سوبر سي دي يشغل السي دي 750 دقيقه اغاني وليس 80 دقيقه
طقم الصوت معقول بس بشرط ما ترفع الصوت اكتر من النصف
واسعه من الداخل
اكبر عيب ليها اكتشفته هو يوم ما رحت ارخصها في المرور
ان انتظرت ساعه ونص عما الموتور برد علشان ناخد بصمه الشاسيه
العيب التاني ان المارش دي سوسته لقدام مكان الاول مش لورا زي الفيرنا او العربيات العاديه
التمن 78000 جنيه
اللون نبيتي يعطيك الفرش بيج وهذا اختياري
اما اللون الفضي فوجدت الفرش سماوي وما عجبني بصراحه
التسارع
الاول من 0 ال20 بمنتهي الراحه
التاني من 20 الي 50 بمنتهي الراحه وما تتعدي 2.5 لفه للموتور
التالت من 50 ال75 تمام جدا
الرابع من 75 ال 100 تمام جدا
الخامس فتحت بيه لغايه 150 بس الطريق بدا يموج هنا وبما انني خبرتي قليله شويه فخفت وهديت لكن ما زال الموتور يعطيك الكثير
ليا صديق قالي انه جاب بيها 190 مرتاح
هي عدادها 220
عيبها اللي خانقني جدا ان البلاستيك بتاع حظام الامان بيخبط في البودي بتاع السياره ومش عارف ابعده او امسكه
الشنطه واسعه جدا جدا جدا
التابلوه في وسائل راحه جميله منها ان في مكان احتفاظ بنضاره طبيه وكمان الشماسات فيها مرايات علشان لو بتضبط حاجه في وشك او كده وخامات صناعه التابلوه عموما جميله جدا وانضف من الفيرنا بكتير وتكاد تكون مثل الافيو والاوبترا
ميزتها عن الفيرنا انها اشيك وتقفيل كوري ميه الميه وتكييفها تلاجه بجد انا بشغله علي 1 في عز الحر تلاجه
الباور تمام جدا واحسن من الفيرنا
الفرامل افضل من الفيرنا والماتريكس كمان
الفتيس جيد ولكن فتيس الفيرنا واغلب السيارات افضل منه لانه سوسته وكمان خشن شويه يا ريت حد يعرفني الحل ايه لانني خبرتي قليله جدا
معدل التسارع جيد الي حد ما لكن هناك سيارات افضل مثل اللانسر 1600 ولكن الفرق كبير 22 الف جنيه
شخصيا اري انها افضل من السيارات الاتيه ومن غير زعل
بيكانتو
فيرنا
افيو
ياريس
ماتريكس
لانسر 1300
اوبترا
السياره الوحيده اللي افضل من النيو اكسنت في حدود الاسعار الاتيه هي الجين 2 كامله ب94 الف جنيه بتاريخ 20/7
وكمان النيسان صني 1300 سي سي بس نفس الاداء ومكنه ياباني وتقفيل مصري
ان شاء الله شهر كده واركب جنط 16
وافيم العربيه
السياره ككل سعرها مش غالي مثل ما يقال
80000 لا يكفي لشراء اي سياره جديده من نوع تويوتا او لانسر او هيونداي الا الفيرنا فقط
بصراحه انا كنت ناوي اوبترا بس بعد ما ركبتها لقيتها ضيقه رغم منظرها الوهم من الخارج وكمان سحبها عالطريق مش حلو هي سياره رجال اعمال وليست للشباب محب الانطلاق
المهم انني طلعت يوم 19/7 الاسكندريه اتفرج عالسيارات في توكيل هورس
كنت ناوي يا فيرنا يا ماتريكس
الماتريكس جميله بس مش اللي ادفع فيها 84990 جنيه
فقلت فيرنا
المهم شفتها وقلت عالبركه اشتري وروح ضبط ب10000 الفرش لانه ما عجبنيش
فبصيت عالالنترا وعيطت وقلت يا ريتني معايا فلوس
ببص بقوله لو سمحت هي دي نيو اكسنت كام؟
قالي 1400 سي سي
قلت له موجود 1600 كامله نبيتي
قالي اجيبلك
المهم ركبتها من جوه عجبتني
قبلها باسبوع مش كنت راضي اركبها لان معرض المصريه اللي شغال فيه شويه ناس ما بتفهمش في العربيات لقيت طالع من الاكصدام الامامي الحلقه بتاعت لما العربيه تعطل تتشد
فسالته قالي دي جايه فيه علشان لما تعطل
قلت لنفسي هما ناويين عالاعطال من الاول تغور النيو اكسنت
الراجل ما فهمنيش انها بتتفك وتتركب
لما رحت هورس لقيت انها بتركب بطريقه البريمه عادي وتتفك وكمان في غطا بلون الكصدام علشان لما تفكها ما يبانش الدايره بلون مختلف
المهم اتفقت عالتمن
وروحت دمياط
جهزت الفلوس
واتكلت علي الله
وما شاء الله
السياره عامله لغايه دلوقتي 1500 كيلو
واخر تمام
بس في حاجه فظيعه فظيعه
العربيه مفيش فيها عداد حراره
اه مفيش فيها عداد حراره
لما تسخن وتوصل لمرحله الخطر يطلعلك علامه حمرا تقولك اقف
طبعا ده عيب فظيع وخطير جدا
انا فهمت موضوع العلامه ده من الكاتالوج الخاص بالسياره
المهم انني مش عارف اعرف ان مروحه التبريد شغاله ولا لأ ازاي وكمان في علبه مكتوب عليها engine cooler
جواها سائل ومكتوب احتفظ بمنسوب السائل ده بين L - F
فيا ريت حد بس يطمني في موضوع التبريد ده
------------------------------------------------
عايز تعليقاتكم...................
المفضلات