الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

المشاركة الأصلية كتبت بواسطة husseinoo

السلام عليكم ورحمة الله وبركات
اللهم صل على محمد وعلى آله وصحبه أجمعين

انا هاكلم على مشاكل اليوتيرن من وجهة نظرى

اظر الى الصورة التالية


بافتراض ان العربية الزرقاء ترغب فى الدخول الى اليوتيرن

1- التزم الحارة اليسرى"من الأول" لانه داخل على اليوتيرن

2- ترك مسافة كافية بينه وبين العربية اللى امامه
"زى ما استاذ محمد قال: اترك مسافة عشان لو العربية اللى امامك عطلت تقدر تعدى منها"
طبعا المسافة دى موش هاتسمح لحد يدخل امامك لانها موش كبيرة قوى ولا صغيرة

3- بالنسبة لى انا عشان مبتدأ
بمجرد ما دخلت على منطقة ازدحام
اترك العربية تسير واتحكم فى السرعة بالفرامل فقط
عمرى ما ادخل على الزحمة ورجلى على البنزين "استحالة"
وكمان رجلى التانية على الدبرياج "احيانا كثيير بكون ضاغط كمان على الدبرياج "
بحيث لو ضغط فرامل عمر العربية ما هاتعطل وتقف
واستطيع نقل الغيار مرة ثانية على الغيار الاول واستمر فى السير بدون مشاكل

انظر الى الصورة التالية


4- لازم ادخل اليوتيرن بسرعة هادئة جدا
اوعى تدخل على اليوتيرن بسرعة عالية
وكمان
اوعى تهدى سرعتك جامد "مرة واحدة" ممكن اللى وراك يخبطوا فيك
عشان كده نسمع كلام الاساتذة لما قالوا " اضغط على الفرامل خفيف قوى" بحيث اللى وراك يشوف نور الفرامل" ويعمل حسابه انك هاتهدى جامد او احتمال انك تقف

انظر الى السيارة الزرقاء ... تقريبا فى المكان ده بالضبط لازم تكون السيارة سرعتها هادئة جدا
ودى تحتاج تدريب فى مكان فاضى
تمشى فى الشارع بسرعتك العادية وعندما تقترب من اليوتيرن .. تهدى السرعة تدريجى وفى المكان المناسب كما هو موضح فى الصورة

5- اعطاء الإشارة
فيه ناس بتخاف على الماكينة بتاعة الإشارات " وعايز تشغل الإشارات متأخر قوى
أنا عن نفسى اشغل الإشارة بدرى شوية عشان اللى ورايا يعرف انى داخل اليوتيرن

6- انظر فى المرايا اللى فى وسط العربية وكمان المرايا اللى على اليمين
اشوف مين اللى جاى ورايا ... احتمال يكون ميكروباص او عربية نص نقل او سائق متهور ... يبقى اعمل حسابى واتوقع انه يعمل اى حركات ويرمى على
طبعا النظرة خاطفة واوعى تسرح وتفضل باصص فى المرايا هههههههههههههه

7- انظر فوق كتفك اليمين
نفس الكلام نظرة خاطفة شوف مين اللى جاى من على يمينك
احتمال يدخل هو كمان اليون تيرن ويعمل لك مشكلة لا قدر الله

انظر الصورة

8- فى اللحظة اللى العربية الزرقاء بتدخل على اليوتيرن
دخل معاها العربية الحمراء ولم تلتزم بالحارة الخاصة به
فى الصورة حدف على العربية الزرقاء
وده خطأ متوقع من المتهورين واللى ماعندهمش صبر واللى موش مقدر خطورة اليوتيرن
وده الخطأ اللى لازم تتوقعه وانت داخل على اليوتيرن "ان واحد يرمى عليك" وانت بتلف
طبعا لو رجلك على الدبرياج والرجل التانية على الفرامل
ببساطة هاتهدى او هاتقف بالعربية "عشان صاحبنا المتخلف يعدى ويبعد عنك" .. اما لو دخلت ورجلك على البنزين واتهورت وخفت "احتمال ان العربية الزرقاء تخبط العربية الحمراء فى اى حتى فى عربيته" ربنا يستر مع الجميع
وزى ماالاصدقاء ما قالوا ... على الاقل كلاكس جامد "عشان تقولوا حرام عليك اللى بتعملوا ده"


انظر الى الصورة


9- فى الصورة نفس الكلام
صاحبنا بالسيارة الحمراء "مستعجل"
وموش قادر ينتظر السيارة الخضراء انها تكمل اليوتيرن
راح رامى عليه وعايز يدخل قبله
طبعا لو العربية الخضراء موش متوقع حاجة زى كده النتيجه انه هايخبطه
دى من الاخطاء اللى بنقول لازم نتوقعها

انظر الى الصورة

10- السيارة الزرقاء فى نفس هذا المكان بالضبط
لازم تنظر الى العربيات القادمة من اليمين
سوف تجد السيارة الحمراء دخلت فى الحارة اللى بتلف فيها العربيات "وده طبعا خطأ"
يبقى الافضل على السيارة الزرقاء انها تنتظر "لحد ما سعادة الباشا يعدى" .. واصبر انا شوية وبعدين ادخل وراه على طول

طبعا ممكن تتمرن فى مكان فاضى على الموضوع ده
خصوصا انك تنظر بطرف عينك على العربيات القادمة
نظرة سريعة وترجع تانى تنظر امامك


11- انظر الى الصورة

السيارة الزرقاء
صاحبها سرح وهو ينظر الى السيارات اللى على اليمين
لدرجه انه نزل بالعربية نصف الشارع
هههههههههههههه
طبعا الموضوع ده حصل معايا ... لكن الحمد لله اثناء التدريب وكان مكان التدريب فاضى
لازم انظر نظرة سريعة خاطفة وارجع انظر امامى وطبعا السرعة لازم تكون هادئة من الاساس
ورجلى على الفرامل بتحكم فى سرعة العربية
ورجلى الثانية ضاغطة على الدبرياج
ومرة ثانية احترس من الدخول على اليوتيرن ورجلك على البنزين
طبعا فى اى ارتباك هاتضغط بنزين هاتلاقى نفسك فى نص الشارع او خابط اللى حدف عليك او اى مشكل لا قدر الله

لو سرحت ههههههههههههههههه هاتلاقى عربيتك دخلت نص الشارع


12- انظر الى الصورة


فى الصورة السيارة الزرقاء لم يقدر السائق حجم وابعاد العربية
واقترب زيادة عن اللزوم من الرصيف
لدرجة انه اصطدم بالرصيف ... واحيانا يطلع بالعربية على الرصيف
وده ايضا موضوع مهم ... موش معنى انى بتمرن فى مكان فاضى انى بضيع وقتى
لا التمرين الجيد .. يمنع المشاكل لا قدر الله
اعتقد انه لازم يكون فيه مسافة نصف متر على الاقل بينك وبين الرصيف

13- انظر الى الصورة

وطبعا احيانا من كثر الارتباك
يتم اللف بالسيارة زيادة عن اللزوم
لدرجة ان السائق لم يستطيع انه يعدل مقدمة العربية الزرقاء الى الامام
وفى نفس الوقت اللى هو بينظر الى السيارات التى بجانبه او ينظر فى المرايا ... يصطدم بمقدمة السيارة فى الرصيف
ودى ممكن تحصل خصوصا لو كنت بتلف بالسيارة بسرعة
ونكرر مرة ثانية لازم تلف بسرعة هادئة

14- انظر الى الصورة


السيارة الزرقاء
بمجرد ان السائق لف اليوتيرن
راح مغير مكانه من الحارة المخصوصة لليوتيرن الى الحارة الثانية
اولا من غير ما يبص فى المرايه معرضا نفسه والعربيات القادمة من الخلف للخطر
لازم الواحد قبل ما ينقل نفسه الى حارة ثانية ينظر فى المرايه
وكمان كان لازم انه يستمر فى السير الى الامام لحد ما تيجى فرصة للانتقال الى الحارة الثانية
ههههههههههههههههه
الموضوع ده حصل معايا وربنا ستر ... لكن اتعلمت منه
قبل ما انقل نفسى الى الحارة التالية:
انظر فى المرايه اليمين
والمرايه اللى فى الوسط
وانظر فوق كتفى اليمين "اشوف العربيات اللى بجوار الباب الخلفى" الموجودة فى المنطقة العمياء التى لا تظهر فى المرايه
ولو كان فيه زحمة يبقى الانتقال يكون بهدوء جدا جدا "احرك الدركسيون بهدوء جدا" عشان اللى ورايا يعرف انى هانقل نفسى للحارة دى ... وطبعا لا انسى الإشارة


15- انظر الى الصورة

بمجرد ان السيارة عدلت نفسها فى اليوتيرن
امشى الى الامام بدون تردد
وطبعا مادام انت اخترت الغيار المناسب للسيارة قبل ما تدخل على اليوتيرن
خلاص هاتمشى على طول بدون مشاكل
اما لو كنت لسه لم تختار الغيار المناسب للسيارة قبل ما تدخل اليوتيرن
هاتعطل نفسك .. وكمان هاتضرب لخمة بين نقل الفتيس ولف الدركسيون فى نفس الوقت
يبقى الاحسن انك تنقل الغيار المناسب قبل ما تدخل اليوتيرن

لو فيه اى حاجة يا جماعة انا كتبتها خطأ
او معلومة خطأ
ياريت التصحيح
خصوصا من اخوانا الخبراء فى الموضوع ده

المرة الجاية نكمل موضوع اليوتيرن

ولو فيه اى استفسار او اسئلة بخصوص الموضوع ده
يا ريت نكتبه ... بحيث نركز فى مشكلة واحد فى كل مرة
وطبعا كل الاخوة المبتدئين عليهم من الآن التدريب فى مكان فاضى على موضوع اليوتيرن
موش اقل من ساعتين فى كل مرة

انا عن نفسى عندى سؤال مهم
بالنسبة للعربيات الحالية
ينصح دائما انك "لا تعشق السيارة" اثناء الدخول على اليوتيرن عشان تحافظ على كبالن السيارة
يعنى المطلوب انى "امور" الفتيس قبل الدخول على اليوتيرن واعتمد على سرعة العربية وهى بتلف
وبعد الانتهاء من اليوتيرن ... اختار الغيار المناسب واستمر فى السير

طبعا الكلام ده مخالف للى انكتب فى المشاركة
وهو انك تختار الغيار المناسب قبل الدخول على اليوتيرن

طيب ايه الصح فى الحكاية دى

الافضل للسائق المبتدأ "انه يختار الغيار المناسب قبل الدخول على اليوتيرن"
الافضل للسيارة انه يختار الغيار المناسب بعد الانتهاء من اليوتيرن عشان يحافظ على الكبالن
ايه هو الصح وايه مشكلة الكبالن دى

مع اطيب التمنيات
اخوكم حسين غزالة

شرح وافي جدا يا استاذ حسين لليوترن حضرتك بتفيدنا جدا بالدقه دي
انا طبعته علشان ادرس كل حالاته هي المشكله عندي في الأوتوماتيك ان انا لما بهدي العربيه بالفرامل قبل اليوترن بفتره بتهدي قوي بعد اليوترن لدرجة انها تقف بعده على طول بخاف ادوس بنزين تاني وانا بلف اليوترن تسرع مني الاقي نفسي فجأه في الحاره التانيه من الملف