الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

المشاركة الأصلية كتبت بواسطة husseinoo

اهلا وسهلا بحضرتك

بالنسبة لموضوع اللف بجوار الرصيف

يجب ان تراعى التالى:
1- تعطى اشارة بدرى شوية عشان اللى خلفك يعرف ان السيارة هاتدخل ناحية اليمين او الشمال

2- التهدئة من السيارة بشكل تدريجى

3- اختيار الغيار المناسب .... يعنى لو السيارة كانت متوقفة تماما ... يبقى على طول اختار الغيار الاول ... واذا كانت تتحرك بشكل بطىء يبقى اختار الغيار الثانى ... واذا كانت السيارة تتحرك بشكل مناسب والطريق امامها سالك يعنى مافيش اى توقف ... يبقى الافضل انى اترك السيارة تسير والفتيس يكون "ممور" يعنى بدون اى نقلات
واترك السيارة تسير بقوة الدفع ورجلى تكون فوق الفرامل اتحكم فقط فى سرعتها
واذا حدث وكان هناك اى توقف ... على طول هاضغط على الفرامل ولان رجلى موجودة اساسا فوق الفرامل ... فى الحالة دى سوف اتوقف بلا تردد وبسهول تامة
بالنسبة للرصيف

لازم اكون بتحرك بجوار الرصيف على بعد مسافة كافية ... يعنى على الاقل نصف متر بعيد عن الرصيف
واول ما مقدمة السيارة تعدى من الرصيف ابدآ فى كسر العجل
مع مراعاة انى لا اغير الحارة التى اسير فيها اثناء الالتفاف حول الرصيف
يعنى لازم التزم بالحارة التى اسير فيها
واراقب السيارة التى تسير بجوارى ... واحترس لان ممكن السيارة التى تسير الى جوارى تدخل امامى ... فى الحالة دى اهدى العربية شوية ... لانى لو حاولت ابتعد عنها هاطلع فوق الرصيف

يفضل التدريب فى اماكن خاليه ... واكثر من مرة
يعنى تجرى بالعربية من مسافة بعيدة
وبعدين عند اى منحنى تبدأى فى التدريب على الالتفاف حول الرصيف
التدريب ده هايعلمك انك تهدى العربية بشكل مناسب وفى توقيت مناسب وفى المكان المناسب
وكمان هاتدربى على الرؤية الجيدة
يعنى وانا بلف بالسيارة لازم انظر جيدا على الطريق
ممكن اجد سيارة قادمة فى نفس الحارة اللى انا داخل فيها
وممكن الاقى ناس متوقفة بجوار الرصيف
او سيارة راكنة بجوار الرصيف
او اى سبب ... لازم اكون جاهز ونظرى جيد ... ونظرتى للطريق واسعة وشاملة
يعنى لا انظر امامى فقط ....
لازم اتعلم انظر فى المراية ... واشوف مين اللى جاى خلفى ... واخد باله منى ... ولا بيجرى وخلاص

واعمل حساب الموتوسيكلات والدراجات
واوسع لهم شوية بجوار الرصيف
لان اى غلطة هاتلاقى الموتوسيكل مقلوب امامك لا قدر الله
لازم تدربى كويس جدا

لازم اشغل حاسة السمع
يعنى اول ما اسمع موتوسيكل على طول احاول اوسع له شوية بجوار الرصيف


واعتقد ان فيه مشاركات كثيرة مصورة وفيها صور توضيحية ممتازة بخصوص الموضوع ده
وانا تحت امرك

مع اطيب التمنيات
اخوكم حسين غزالة

الف شكر على الرد السريع
انا فعلا بحاول ادرب خصوصا انى خلف البيت فية مكان مناسب جدا و الحمد لله
بس و انا بلف بلاقى ائما العربية راحت بعيد
يعنى انا بالف بكون قريبة من الرصيف اول ما اعدل الدركستون بلاقى نفسى فى نصف الشارع تقريبا و بظطر اعدل من و ضع الدركستون شمال او يميين
و ساعات كمان بحس انى بدخل بسرعة على الرصيف ممكن دة لانى بضغط بنزيين اول ما الف
يعنى الافضل اخلى العربية هادية لحد ما تعدل و بعديين ادوس بنزيين