هل السيارة شاهين بصفة عامة:
1- سيارة ملائمة للأجواء المصرية سعرها مناسب
2- سيارة ملائمة للأجواء المصرية غالية الثمن بالنسبة لامكانياتها
3- سيارة شكلها مش ظريف وخشنة
عرض للطباعة
هل السيارة شاهين بصفة عامة:
1- سيارة ملائمة للأجواء المصرية سعرها مناسب
2- سيارة ملائمة للأجواء المصرية غالية الثمن بالنسبة لامكانياتها
3- سيارة شكلها مش ظريف وخشنة
أهم ميزة هى قطع الغيار الرخيصة و الصاج الناشف
الشاهين سيارة ممتازة....وناعمة مش خشنة ومريحة بس زي ماقال ابو السباع في وصفة الدقيق للسيارة انها تمتلك الحد الادني من الرفاهية...
بس انا برضة لسة حاسس ان سعرها مرتفع نسبيا اذا ما قورنت بالفيرنا مثلا....(انا باتكلم عن الشاهين الـ 1600)...
لكن من ناحية الصاج وقطع الغيار تعتبر اكثر من ممتازة خصوصا لبلد زي مصرنا الحبيبة وشعب جامد زي الشعب المصري....
الشاهين :ما لها وما عليها
لها: شاسيه رائع فى التجاوب مع سطح الشوارع المصرية، عفشة ممتازة بشرط تغيير بعض الأجزاء مع استلام السيارة، عزل صوت الشارع عن الكابينة ممتاز، محرك ناعم هادئ استاجابته جيدة جدا، صاج خارجى غير سهل التأثر بالأحداث اليومية التى تحدث فى شوارع مصر من الإستناد والجلوس على السيارات ولعب المحروقة كرة القدم، تحكم ممتاز فى السيارة وثبات جيد جدا على الأرض ، الرؤية الأمامية ممتازة والروية الخلفية جيدة جدا، احساس بالقوة والمناعة يشعر به سائق الشاهين يضاهى احساس سائق ال 4x4، سهولة المناورة فى الأماكن الضيقة لسهولة رؤية اطراف السيارة، مناسبة جدا لقصار ومتوسطى القامة، رخص قطع الغيار وتوافرها، شبه منعدمة المشاكل ويعتمد عليها بشرط دوام الصيانة،سهولة تكنولوجيا المحرك، ارتفاع العزم على السرعات المنخفضة، المحرك معمر، تبدو اكبر من حجمها الفعلى ،جميع موديلاتها الحالية مزودة بعداد RPM وفوانيس شبورة امامية وخلفية واربعة لمبات اضاءة بالصالون وساعة رقمية وكاسيت، وهى كماليات نتقص سيارات كثيرة
عليها: شكل خارجى معتاد جدا ودائما يذكر الناس بسيارات التاكسى، شكل التابلوه قديم، نسب تخفيض الجير قليلة(على الخامس 3300RPM مع 100 كيلومتر فى الساعة) مشاوير الغيارات قصيرة،دواسة الدبرياش ثقيلة قليلا، عصا الفتيس تكون ثقيلة والسيارة باردة،غير مريحة لطوال القامة، مساحة كبيرة داخل السيارة مهدرة لخدمة منظومة الدفع الخلفى(مكان الجيربوكس فى الصالون وتنك البنزين خلف الكنبة الخلفية، بعض مكونات السيارة عندا خروجها من المصنع سيئة او قصيرة العمر ويجب تغييرها واخص بالذكر المساعدين الأماميين والكارتيرات البلاستيك فى الرفرف الأمامى وتوجد احتمالات لطلمبة المياه وواحتمالات للمقصات الامامية على عمر حوالى 50 الف كيلومتر وان كانت هذة الأجزاء رخيصة جدا، السرعة القصوى الفعلية التى يمكن الوصول لها 150 كيلومتر فى الساعة، الحساسية المفرطة لمنظومة الجر (ألفتيتس والكورنا) لأى تسرب للزيت
المحصلة : سيارة ممتازة للخدمة الشاقة ولا تفتقر للنعومة ومتعة القيادة، لكنها فى النهاية ذات اداء "رجالى" الى حد ما حيث انها تعطى افضل ما لديها مع الأسلوب الرياضى فى القيادة(كثرة الغيارات مع القيادة على RPM مرتفعة)، مع التأكيد على انها ليست خشنة وحصوصا المحرك الذى وجدت بالتجربة انه انعم واهدا بكثير من محرك الأكسنت الشكل القديم مثلا ، ليست مناسبة لمن يحبون القيادة الهادئة ،و إلا فإنها ستكون بطيئة جدا مع القيادة الهادئة، تحتاج للصيانة بشكل اكثر قليلا من مثيلاتها والإهتمام باحكام ربط اجزائها ومنع تسرب الزيوت
رأييى فى السعر، زمان كانت بسعر الأكسنت القديمة ويعتبر سعرها مناسب، حاليا ارى ان مساواتها بالفيرنا فى السعر شئ مبالغ فيه الى حد ما، خصوصا مع افتقار الموديل المساوى للفيرنا فى السعر الى التكييف والباور ستيرنج
انا شايف ان الشاهين توبها فى الوقت الحالى هو ال50 ألف، وفى هذة الحاله هتستقطب فئة كبيرة جدا من السوق
اتفق معك يا أستاذ سبعاوى فى كل ما قلته عن الشاهين الا انى لا أرى أن محركها هادىء بل يعتبر مرتفع الصوت قليلا, مثل كل سيارات فيات و ألفاروميو التى تلتزم بالطابع الرياضى أكثر من أى شىء أخر.و لكن المحرك ناعم جدا و متجاوب الى حد كبير.
و أراك لمست مشكلة الشاهين الأساسية و هى علبة تروسها ذات النسب القصيرة جدا, أعتقد أن علبة تروس الشاهين أقرب الى سيارة نقل منها الى سيارة ملاكى :), الحقيقة أنه لا توجد أى مشكلة تزعجنى فى سيارتى سوى النسب القصيرة تلك.
و أعتقد أن سعر فئة ال1400 مبالغ فيه فعلا بالنسبة لسيارة بلا كماليات, أما سعر ال1600 فهو منطقى جدا, هى أغلى قليلا من الفيرنا و هى فى رأيى أفضل من الفرنا على صعيد الجودة و الاعتمادية و الاسم فهى فى النهاية تحمل اسم فيات العريق و أرى انه لو تم تزويد موديل ال1400 بمكيف هواء و مساعد للمقود لأصبح سعرها منطقى جدا بل و مغرى أيضا.
غالية الثمن
وأظن أنها بدأت في الفشل في المنافسة بهذا السعر المبالغ فيه لنوعيها 1400 1600
مشكله الشاهين هيه الشكل الخارجى و التابلوه والمساعدين غير كده انا شايف انها احسن من اللانوس والفيرنا
كان معانا شاهين موديل 93 وبعناها فى 2007 وجبنا الصنى وكان موتورها معدى ال200 الف وكان لسه بخيره وهيه عربيه اعتماديه لاقصى حد
بس انا شايف ان سعر ال1600 غالى حبتين ومفروض تنزل شويه على الاقل تبقى زى اللانوس او ارخص
انارايي انها سيارة مناسبة جدا ويعتمد عليها وانا اشتريتها ب 65000 الف فى الوقت دة كانت الانوس ب 63000 هاف اوبشن وهى فى راىى لها مميزات اكتر من السيارات اللى فى الفءة السعرية بتاعتها
منـورين جميعا :D
الف شكر علي التقرير الشامل والمفصل عن الشاهين يادكتور / سبعاوي :D
الشاهين قطع غيارها متوفره ومش محتاجه دكتور اي صنايعي يستطيع التعامل معاها بكل سهوله ..
لمن يرغب في شراء سياره جديده تناسب الشارع المصـري عليك بالشاهين .. نصيحه لوجهه الله :D
أنا مش اشد المعجبيين بالشاهين بعد ماشوفت سياره جاري الشاهين موديل 1997 .. بيقولي مصرفتش عليها غير كاوتش وانا عارفـو بخيل ويعملها :D
أنا أخترت التانية
سيارة خدمة شاقة سعرها مرتفع بالنسبة لامكانياته
لأني عتقد ان السيارة ممتازة للطرق المصرية تماما فهي سيارة قوية ذات موتور جيد جدا في الأداء و لكن عيوبها كماليتها القليلة و صغر حجم الصالون الداخلي و الأفتقار إلى الجمال في التابلوه و الشكل الخارجي
و لكن إجمالا هي سيارة جيدة و يعيبها السعر المرتفع قليلا
انا معايا سياره شاهين موديل 96 - اللى هى 1300 سى سى
و انا اتفق مع حضراتكم فى انها قليله المشاكل و الاعطال
و بالمناسبه فانا خلال الايام القليله كنت بدور على سياره فى حدود 60 الى 65 الف جنيه
و قعدت اقول اشترى فيرنا ام افيو
و لقيت نفسى فى الاخر اشتريت شاهين 1400 - مو 2008
و ذلك لكل الاسباب اللى انتو ذكرتموها
موفق انشاء الله..............بارك الله لك فيها
أنا اخترت الثانية
لانى مش مقتنع بسعرها ده أبدا لأنهم مغلينها كتير
يعنى 1600 ليه أدفع فيها 70000 جنيه ؟؟؟
وهى هى نفس الشكل والإمكانيات بدون اى تغيير
وكذلك الـ 1400 بدون كماليات وبـ 60000 جنيه ؟؟
بصراحة هى غالية
وبعدين بالنسبة لحكاية الصاج الشاهين صاجها مش قوى للدرجة اللى الزملاء كتبوها يعنى مش زى صاج الادا 2107 مثلا برضو بيتأثر من الخبطات جامد
والاكصدامات ضعيفة لأنها فيبــر وماتستحملش خبطتين هى خبطة واحدة والتانية تلاقى الاكصدام اتشرخ
أنا معايا شاهين وعارفها كويس
انا معايا شاهين 2001 بقالها 7 سنوات.. العربية زي الفل لكن زي ما الاستاذ سبعاوي قال هي تمتلك الحد الادني من الرفاهية
الشاهين في رأيي مش خشنة لكنها مش ناعمة و كمالياتها ليس بالدرجة المطلوبة لكن رخص الصيانة وقطع الغيار و الدفع الخلفي وعلوها عن الارض يخلي الواحد يفكر فيها بجد
بصراحة لو انت مش لازمك الرفاهية العالية ومش بتحب تسوق بسرعة ( انا اكتر سرعة جبتها في ساعة تهور 130 كم / س ) تبقي الشاهين عربية مناسبة جدا
انا لسة ما بعتهاش و ساعات الشيطان بيوسوس لي اني الغي فكرة البيع ويقوللي( يا عم هو يعني كتر فلوس مالها الشاهين دي زي الفل بلا اوبترا بلا كلام فاضي ) ومازال الصراع النفسي علي اشده
فكر بعقلك قبل اى حاجه و يا ريت اهم حاجه تفكر فيها هى احتياجاتك
1- هل كل احتياجاتك انتهت حتى تفكر فى تغير سيارتك و تدفع مقابل ذلك مبلغ من المال ليس هين
2- هل تغير السياره مهم بالنسبه لك ككماليات حتى تصبح مثل باقى الاصدقاء ( تكيف - زجاج كهرباء - ... )
3- هل سيارتك بها ما يجعلك طقهان و زهقان منها ( كل شويه ميكانيكى و كهربائى و خلافه ) ام ما زالت بحاله جيده
فكر فى ما تحتاجه
من النهايه انا بعتبر ان السياره سلعه استهلاكيه مثلها مثل غيرها ( ثلاجه - تكييف - تليفزيون - ... ) و المطلوب منها هى توصيلى الى المكان المراد باقل تكلفه و اقل مجهود
الشاهين دي كانت حلوة أول متنزلت من 70 سنة
لكن دلوئتي بقت خلاص زمن وعدى وسعرها غالي جداااااااا وديقة جدا من وره
وأنا معايا دوجان 1.6 لسه 90 ألف كيلوا وطلعت عين أهلي مافيش حاجة مغيرتهاش ومكيفها زي الزفت وعفشتها أنشف من اللانسر وتمشي على 140 تلاقي العربية بتطلع في الروح وطبعا غيرت الكرونه يعني قطع غيارها رخيصة بس حنتغير كل حاجة
كل ده كوم وصوت متورها كوم تاني خالص صوته مزعج جدا جدا جدا ده ياعم كفاية إنها عربية تكاسي
أنا بس إلي مصبرني عليها إني بعمل 100كيلوا كل مشوار الجامعة يوم ومش عايز أجيب عربية جديدة أهلكها
وانا لا اؤيد واسحب نوبل ومعاهم الجواز المصرى وروحو عيشو فى اسرائيل انعم لكم واريح لنا
ليه يا باشا ؟
هو الشاهين إختراع مصري وإحنا مش واخدين بالنا واللي يرفضها يبقى جاسوس إسرائلي رافض لإختراع بلده !!!!!
الشاهين زي غيرها سيارة إنتاج بلاد غيرنا وبنجمعها زي ما بنجمع اللادا والمرسيدس والصيني
الإختراع المصري الصميم في السيارات قاعدة عجلاته مكونة من عجلتين فقط والجزء الأمامي محمل على عمودين (أكسين) يتم وضعهم فوق كتفي دابة مثل الحصان (تصنيع وتوليد مصري 100%)
مش مهم يكون اختراع مصرى المهم ان فية مصنع مصرى مشغل كام الف عامل ومفيش فرق بين شاهين واى سيارة تصنع جزئيا داخل مصر من حيس الفكرة او المبدآ وانا قلت اسرئيل واقصد اى مكان خارج مصر علشان تحس بالوجع يوم تتخلى عن مناصرة اخوانك فى تلك المصانع حتى لو كانت مصانع جلد وورق زى مبتقول
أنا معاك إن تشجيع صناعة بلدي الجيدة واجب عليا
لكن تشجيع الصناعة من أنواع الغشاشين والحرامية ممنوع (والنوعية دي منتشرة أوي أوي)
في شركة مصرية لإنتاج الأجهزة المنزلية إسمها ينيفرسال
إشتريت منها بوتاجاز وسخان غاز
في أقل من سنة الإثنين باظو وصلحتهم أكثر من مرة
ورقم خدمة العملاء لا يرد أبداً
تفتكر هذه الأخلاق لهذه الشركة وهذه الجودة الهابطة والمنحطة لديهم تستحق تشجيع ؟؟؟!!!
يا اخى احمد ماهو انتة لازم تكون زكى وانته بتشترى اى شيى وتحاول تختار افضل شيى فى المتاح امامك وامام جيبك واذا لم يتوفر اى شيى فية الحد الادنى من غرضك ساعتها ممكن تفكر فى المستورد ولكن اجزم انة فى معظم المجالات فيه منتج كويس والحمدلله
انا عندى سخان صناعة محللى على ماعتقد اللومبك لة تقريبا عشر سنين بس استخدام متقطع.
فى مواضيع البيع والشراء يفضل انك تسال متخصص فى المجال مع التوضيح انك تريد استخدام منتج محللى جيد.
عندى ايضا مراوح نيو ناشنال محللى ما شاء الله .10/10
وهكذا فى كل شيئ لا اشجع ولا اتفاخر بالمستورد وهواتة يجب التريآة عليهم وليس العكس كما تراة فى هذة الايام. ولا نحط من قدر الصناعه الوطنية لاسباب ممكن تكون موجودة فى المستورد ولك تحياتى
يا أستاذي إحنا مش في وضع محاربة الصناعة المحلية وأنت بتحمي حماها
كلنا بنحمي حماها ونشجع تطورها
ولكن لازم نفضح الغشاش والحرامي من الصناع المحليين الذين يسيؤون لنا ولبلدنا
مش معنى إننا نفضحهم ونحذر إخوانا منهم إننا هنروح نشترى مستورد
حضرتك بتقول إنك إشتريت منتجات مصرية وطلعت كويسة (كلام سليم 100%)
لكن مش معنى كده إن لو غيرك جاب منتج مصري وطلع مغشوش والشركة الحرامية تبرأت منه وشرب المقلب لما ييجي يحذر الناس من المنتج ده (إسم منتج بعينه مش صناعة البلد كلها) تقول عليه محارب لصناعة بلده !!!
يا أستاذي مجرد إني تخليت عن مناصرة صانع مصري حرامي غشاش وفضحته فهذا معناه أني إنتقلت لتشجيع صانع مصري آخر ولكنه أمين متقن لعمله
يعني أفدت صناعة بلدي أقوى إفادة (شجعت الصانع الأمين وأدبت الصانع الغشاش الذي لن يجد طريق آخر إلا التوقف عن الغش والسرقة)
لكن لو دفنت رأسي في الرمال سيظل ذلك الغشاش السارق يسيء لبلدي ولأهلها ولسمعتها في الداخل والخارج
من وجهه نظرى الشخصيه و بناء على انى كنت من ضمن مالكى الشاهين مسبقا لانى كانت معايا شاهين 1300 سىسى موديل 96 تركى اؤكد ان الشاهين عربيه ممتازه جدااااا فى قدرتها على التحمل و ممتازه جداااا فى رخص قطع الغيار و ممتازه جدااا فى تكنولوجيتها البسيطه و سهوله اصلاحها وصيانتها عند اى ميكانيكى ولا يعيبها اطلاقا انها تاكسى بل على العكس ده دليل على قوه تحملها و خدمتها الشاقه ( العربيه الشاهين اللى كانت معايا دايما بافتكرها بالخير وليها ذكريات رائعه معايا وعمرها ما عملت اى فصل بايخ غير مره واحده كان مشط الاسبراتير قطع منى على الطريق الزراعى وانا راجع من الشغل فى القاهره الى المنصوره وكنت باسافر 5 ايام فى الاسبوع على الطريق ده والحمد لله كانت بتستحملنى جدااا وكنت فى المقابل لازم اعملها صيانه على طول يعنى اى حاجه محتاجه تغيير لازم تتغير على طول وبغير الزيوت قبل ميعاده بفتره وكل امور الصيانه المعتاده .
بالنسبه للسعر فهوا يعتبر عالى شويتين يعنى كان واحد صاحبى معاه اسبرانزا 516 مو 2007عاوز شاهين زيرو و روحت لواحد صديق ليا عنده معرض قالى ان ال1600 دلوقتى بقت ب 71 الف ودى كانت مفأجاه كبيره ليا
انا عن نفسي .. عطيت صوتي لل سيارة خدمة شاقة سعرها مناسب ... ببساطه زي ما اخونا سبعاوي قال نقط الضعف المساعدين الاماميه و الطنابير .. و دي حلها سهل .. انا عمي عنده دوجان 97 اس ال اكس فول اوبشن .. عاوز يبيعها و انا اقنعته مايبعش .. كل عيوبها ممكن تتعالج شويه شويه .. انما عيوب الشاسيه ماتقدرش تعالجها .. العربيه مناسبه جداً للاستخدام الشاق (احنا بنستخدمها هنا في كل حاجه .. تاكسي , عربيه غيط , مع المقاولين ...) .. و انا مع فكره انهم ينزلوا منها موديلات اسبور .. 16 صباب مثلاً من المواتير الفيات الجديده .. او 2000 سيسي تيربو .. حاجه ليميتد ادشن كده ولا حاجه .. و مع فكره انهم ينزلوا منها 7 راكب كمان .. لو نزل منها 7 راكب هاتكسح البيجو من السوق ...
انما ده مجرد رأي انا الشخصي ..
طيب احنا بنتكلم عن الشاهين تحديدا وفئة كتيرة بتشكر فى العربية وانا واحد منهم وعن تجربة لما يطلع واحد كارة نفسة وعايذ يعيش على اخر صيحة بس مش من جيبة - من جيب والدة او يقسط علشان اخر صيحة داة نقول لة اية - نقول لة روح عيش هناك عند بتوع الاخر صيحة - وكدة هيريح نفسة ويريجنا - وداه مش معناة اننا نتخلى عن الحديث لاكن لازم نبنى من القاعدة الاول - الطرق تكون مناسبة - الورشة اللى جمب بيتك يكون فيها امكانات لاصلاح عربيتك الحديثه علشان متحطش رقبتك تحت رحمه الوكيل وعلشان انته شارى عربية تخدمك مش انتة تخدمها وتسافر علشان تجيب قطهة غيار من بعيد - وفى الاخر لو %40 من الناس قالو العربية كويسه ان هحط 10 رافه من عندى واقول العربية كويسة - عايز ياخى افيد بلدى زىماهى بتفدنى - انا لففيت بلادكتير وملقتش راحتى غير فى البلد دى - برغم كل المشاكل وربنا يهدى الجميع
الشاهين مش عربية رفاهية خالص (امتلك شاهين منذ 10 سنين) لكن بالنسبة لى هى عربية مناسبة جيدا لإمكانياتى وشوارع مصر المحروسة ، وخلينا نتكلم بمنطق عايز تشترى تليفون تتمنظر بيه وتقولى اصلى هستعمل البلوتوث فى نقل الداتا واصور اصحابى فى الشارع انت حر ولك مطلق الحرية اشترى تليفون ب3000 جنيه ، عايز تليفون علشان تقول الو اشترى تليفون ب300 جنيه وهكذا ، الشاهين متينه ، تشعر سائقها بالأمان ، اقتصادية ، تصلحها فى اى حته وبأى فلوس ، حافظ عليها واشترى قطع غيار اصلية ، مُوفره فى البنزين (بعد 10 سنين استعمال 1 لتر = 15 كيلو طريق مصر اسكندرية) تقول يا بيع تلاقى 1000 واحد يشترى ، وان شاء الله هتوصلك مشاويرك بأمان ، عايز المنظره برده لك مطلق الحرية ، وما تنسوش منطق التسويق والاعلانات فى اقناع المشترى بان كل الكمليات اصبحت اساسيات ، وفى النهاية القرار لك .
+100000000000اقتباس:
فكر بعقلك قبل اى حاجه و يا ريت اهم حاجه تفكر فيها هى احتياجاتك
1- هل كل احتياجاتك انتهت حتى تفكر فى تغير سيارتك و تدفع مقابل ذلك مبلغ من المال ليس هين
2- هل تغير السياره مهم بالنسبه لك ككماليات حتى تصبح مثل باقى الاصدقاء ( تكيف - زجاج كهرباء - ... )
3- هل سيارتك بها ما يجعلك طقهان و زهقان منها ( كل شويه ميكانيكى و كهربائى و خلافه ) ام ما زالت بحاله جيده
فكر فى ما تحتاجه
من النهايه انا بعتبر ان السياره سلعه استهلاكيه مثلها مثل غيرها ( ثلاجه - تكييف - تليفزيون - ... ) و المطلوب منها هى توصيلى الى المكان المراد باقل تكلفه و اقل مجهود
و احب اضيف ان تقييم العربيات كعربيات تقييم مدروس ، حقيقية ما ينفعش في مصر ، هنا عندنا السوق مشوه عربيات تعبانة سعرها في العلالي و عربيات زي الفل و سعرها في الارض ، احنا هنا عالم تاني غير العالم .
أنا شايف ان استخدامها للبنزين 80 الايام ديه راح يعوض فارق السعر وهوه ده الي رافع سعرها مع قطع غيارها الرخيصه في الايام السوداء ديه
راااى العربيه ككل مش قد كده
قعدتو تقولوا اراكم
و النهارده الحكومه بتقول هتبيع النصر للسيارات
و غبور قاعد مستنى ( لقمه الباشا ) اللى هتديهالو الحكومه هديه
و مش هيكون فى حاجه تانى اسمها شاهين
السيارة شاهين ممكن تكون سيارة الخدمه الشاقه بس مهما كان انت راكب سيارة من الماضي وككل هي عربيه شكلها مش ظريف وتعتبر مافيهاش اي وسائل للترفيه وخشنه والشاسيه بتاعها مش كويس والسعر مبالغ فيه جدا لا 70الف في 1600 سي سي ممكن يجيبو لانسر 2004 بومه مستعمله وفي حاله حلوه ومن رأيي ان شركه النصر مش عارفة تتطور في العربيه وانها ماشيه علي الايطالي في العربيه 131 بدون تغير من موديلا السبعينات وانها بتكمل مشوار الدوجان التركي ولو لاحظتوا انا البودي بتاع الشاهين بنسبه 95 % هو بودي131 مع اختلاف شكل الفوانيس والتابلوهده حتي التابلوه بتاع الشاهين في التسعسينات هو هواه بتاع ال131 والشاهين والادا اخرهم التاكسي اوتجاوزا شركات التغذيه والأدويه انما في سفر بعيد متعبه وغير كده ان الشركه لسه مانزلتش منها موديل فيه حتي لو شباك واحد زجاجه كهرباء فمعقول انك تدفع 60 او70 الف في عربيه مفيهاش ابسط الكماليات
وبالنسبه للبنزين 80 الدايو بتمشي ببنزين80 والفيرنا ومش هاتصدقوا لو قولتلكوا ان لانسر بومه 2007 مع واحد صاحبي بقالها 7 شهور ماشيه ببنزين 80 وعادي فالشاهين مفيهوش الا ميزه رخص قطع الغيار
الشاهين والادا و128 عربيات انتجها كان لازم يقف علي الاقل من13 سنه
واكبر دليل من رأيي علي فشل العربيات التلاته دي ان شركه النصر لم تفلح في تصديرهم الي اي دوله حتي الصومال مع انا الادا لولا انها انتاج حربي مكنتش نزلت لانها مخصوصه للبهدله في الجيش
واخر حاجه هاقولها ان الشاهين سياره من الماضي
لو حد عنده تعليق علي كلامي ده يرد عليا
عندي شاهين 1400 موديل 2001
الشاهين عربيه لها احترامها واحب ان اذكر نقاط لأكون منطقي بالكلام
1- ضريبه السياره عند الشراء (( تعتبر اقتصاديه ))
2- عند الصيانه وقطع الغيار (( تعتبر اقتصاديه ))
3- ملائمه الشارع المصري (( تعتبر اقتصاديه ))
4- الملائمه والرفاهيه (( تعتبر ممتازه للانسان العادي القنوع وسيئه لمن يستهوى الدلع ))
5- السعر للجديد (( ارتفع فقط بسبب قوانين المرور الجديده وقانون الغاء التاكسي القديم )) لكن سعرها مناسب .
6- الثبات والتحكم (( تمتاز بقوه الاداء ))
7- الشاهين ليست رياضيه ولا تصلح للفرافير ولو تم عمل صيانه جيده لها تتحمل الاعباء
8 - الصالون ضيق شوي ويمكن توسيعه بتغيير الصالون لكني لا انصح به
9- الشاهين سياره من الماضي تتميز بتفوقها على الحاضر ولك الاتي
(( قمت بسواقه Bmw 2007 مع حموله 3 رجال بالخلف + السواق + راكب امامي ))
وبدأت اتحسس المطبات وقمت بتجربه عده سيارات بنفس المنوال ومن خلال معارفي ومن لديهم سيارات وجدت ان اغلب السيارات الفارهه لا تتحمل اكثر من هذا مع العلم انه لا يمكن ركوب 3 اشخاص من الوزن الثقيل
نأتي للشاهين ذهبت بها لفرح احد الاصدقاء
2 بجوار السواق ( رجل كبير متوسط البنيه + ابنه في اعدادي )
6 بالخلف ( 3 سيدات منهم 2 حجم كبير جدا و3 بنات مابين 4 : 5 ابتدائي
ولاحظت ان مستوى السياره لم يهبط كثيرا جدا للدرجه التي تجعلني اخاف المطبات
---------------
هذه احد مميزات الشاهين وكما قال الاخ سبعاوي (( شعور يضاهي ركوب الجيب ))
الشاهين سياره الاجواء المصريه وتحصل على 100% في هذا الامر
لأنها متينه وتتحمل المطبات + لايشترك فيها السرعات العاليه غير المحسوسه
اسباب حوادث السيارات الحديثه عدم الشعور بسرعه السياره نهائيه مما يجعلها تتجاوز المحدد
اما الشاهين فتعطي اداء هادي جدا جدا بالنسبه لنظيرها وبالنسبه لعدد من السيارات وخصوصا الجر الخلفي حتى سرعه 120 بعد ذلك قد يلاحظ علو صوت المحرك
اسف للاطاله
تكمله
مع احترامي لك انت متحامل على الشاهين بشكل كبير
الدايو عربيه زباله والبومه مثيلتها وقمت بتجربتهم (( يكفيك ان تسير بالسياره وانت بتعد المطبات وبتحفظ مكانهم ))
+ ان الدايو شعبيه الان اكثر من الشاهين
+ ان الدايو مشاكلها اكبر في الجسم الخارجي وشكلها السيء جدا جدا جدا جدا بالنسبه لمثيلتها
رأيي اي سياره تصلح للسفر ما دمت تعتني بها .
تجربه شخصيه (( سبرنزا في سفر 200 كيلو جابت وش سلندر )) فمش شرط
كل السيارات في النهايه عباره عن (( أربع فرد كاوتش مليانين بالهواء اذا طارت ذهبت معها الاحلام والاموال وبنا يسترها مع الجميع ))
وما زلت افضل الشاهين للموثوقيه وتوفر الصيانه مع العلم انه توقف انتاجها هذا العام مما اثر على ارتفاع سعرها هذا ما علمته والله اعلم
دلع ايه وفرافير ايه؟؟؟!!!!
ايه الكلام ده...هو انا علشان ابقى راجل جد يبقى اركب عربية نص نقل؟؟!!!