الحمد لله وبفضلة استلمت الكارينز هاى لاين يوم الخميس الماضى من عند محمد زكى بالقطامية طبعاً هذا اليوم كان مطر شديد ومر على الفصول الأربعة وأنا راجع بالسيارة وطبعاً قلت فرصة كويسة لإختبار السيارة فى الظروف الصعبة وخصوصاً أنا من كفر الدوار بجوار الأسكندرية يعنى مشوار حوالى 230 كم نبدأ على بركة الله:-
السيارة كنت حاجز اللون الجافا براون ثم الأسود ولكن اشترطت أن يكون اللون الداخلى للسيارة أسود المهم صليت إستخارة حتى وفقنى اللة للون التيتانيوم سيلفر بلون داخلى أسود وقد إستلمت السيارة بعد طبعاً مسحة خفيفة من العمال وتوكلت على الله طبعاً التقييم هذا مبدئى وأنا لسة بأتعود على السيارة كمان دى أول مرة أشترى أوتوماتيك نأتى للتقييم:-

* الإتساع الداخلى رائع والجلوس أروع تحس كأنك فعلاً شايف الطريق من كل زاوية مع إرتفاع وضعية الجلوس داخل السيارة أضف لذلك الجنوط 16" أدت لزيداة فى إرتفاع السيارة مع إرتفاع الخلوص عن الأرض وبدأت التحرك طبعاً شعور حلو العربية كبيرة والجو ممطر وسترك يارب يالا على البنزينة وتفويل السيارة 92 وعلى الطريق الدائرى حوالى 48 كم لغاية بداية الزراعى.
الثبات ممتاز التسارع بالنسبة للاتوماتيك لو دايس بنزين بالراحة فهو جيد جدا ولكن لو دوست جامد شوية أو كأنك بتعمل كيك داون (وسع لوحش الكارينز)
طبعاً صوت الموتور هادىء نوعاً ما ولكن العزل الداخلى للسيارة بالنسبة للمحرك نقدر نقول جيد جداً وليس ممتاز
* وصلنا الزراعى والدنيا زحمة والجو ممطر المهم ومش عارف أسحب أو أجرب زى ما أنا عايز المهم بعد فترة الطريق أصبح فاضى وإحساسى فى المطبات الصغيرة إن العربية ناشفة شويتين تذكرت ضغط الكاوتش إنة أكيد عالى طيب على أقرب بتاع كاوتش لقيت الضغط 50 نزلتة لغاية 30 وبصراحة فرق كتير والنعومة للعفشة زادت وفعلا تحس بجمال ونعومة العفشة بالنسبة لحجم السيارة .
* إزداد المطر وبدأ الثلج يتساقط وبدأت الفرصة المثالية لإختبار السيارة من ناحية الثبات والفرامل طبعاً نجاح بدرجة إمتياز الدنيا بتمطر مش بتمطر العربية زى ما هى طبعا الفرامل ال أية بى أس لم يكن هناك مجال لعمل إختبار لها.
* الملخص:-
- إتساع داخلى رائع.
- زاوية رؤية ممتازة.
- وضعية جلوس رائعة.
- صوت محرك هادىء نوعاً ما ولكن ليس مثل اليابانى مع الإعتبار أن السيارة فى التليين.
- العزل الداخلى بالنسبة لصوت المحرك كان هناك الأفضل ولكن إجمالاً نعتبرة جيد جداً.
- العزل الخارجى بالنسبة للأصوات المحيطة ممتاز.
- الثبات رائع فى كل الظروف المناخية وكل الطرق.
- الفرامل من غير إستخدام الاية بى اس ممتازة فما بالكم لو إستخدمناها كمان.
- التسارع بالنسبة لحجم السيارة فى الوضع الاتوماتيك جيد جداً مع الإعتبار أن السيارة فى التليين.
- السيارة إجمالاً أكثر من رائعة بمعنى الكلمة وربنا يبارك لمن إشترى ويوفق المنتظر.
والأن لغاية ما ورق العربية يجهز ذهبت للسروجى بمدينة الحرفيين بالأسكندرية وأهو نستفاد بالوقت كمان فى حاجة الكاسيت اللى نازل مع العربية مش متوافق مع المالتى فانكشن لذلك قبل ما أجربة عند محمد زكى هم اللى قالوا لى على هذه المعلومة وسوف يغيروة بأخر خلال شهر إن شاء الله .
طبعاً معهلش مافيش صور لظروف الجو فى ذلك اليوم وإن شاء اللة بعد السروجى سأقوم بتجهيز بعض الصور.
أسف للإطالة وتحت أمركم فى أى سؤال وأرق تحياتى.