خناقه حريمى !!!!!

**mada121977** · 30-12-2007 01:16 PM

الموقف كان كالتالى
كنت خارج من الشغل و قدام وزاره الخارجيه على الكورنيش وفيه قدامى عربيه اسبرنزا و قدامها عربيه دايو ماتيز والاتنين سايقينهم بنات حوالى 25 سنه كده و طبعا الطريق زحمه فى المنطقه دى و كل شويه العربيه تقف ولكن صاحبه الاسبرانزا ريحت شويه على صاحبه الدايو و لمست اكصدامها الخلفى .. صاحبه الاسبرانزا نزلت تشوف عربيتها مع نزول صاحبه الدايو و صاحبه الاسبرانزا لقيت مافيش حاجه فى عربيتها قامت راكبه تانى ولا اكن فيه حاجه حصلت و بدون ما تعتذر لصاحبه الدايو طبعا صاحبه الدايو اتجننت و قالت لصاحبه الدايو انتى مش محترمه و مهزأه و انتى لازم تعتذرى و انتى قليله الادب و كلام من العينه دى قامت صاحبه الاسبرانز نازله و شدت صاحبه الدايو من هدومها و دفعتها جامد و ردت عليها بكلام مماثل و ركبت تانى العربيه فصاحبه الدايو اتجننت اكتر ووشها جاب الوان الطيف فى ثوانى راحت رايحه على صاحبه الاسبرانزا و قعدت تخبطلها على الازاز وهاتك يا شتايم و التانيه نزلت تانى و مسكوا فى بعض وكل ده والناس اللى فى الشارع كلهم قاعدين يتفرجوا و منسجمين جداا من اللى بيحصل كأنه فيلم عربى و بالرغم ان المرور اتعطل بس كله كان متابع الموقف و مش مشكله الطريق :) ... ياريت بقى اى حد بيسوق جنب واحده ست يخلى باله احسن الستات دلوقتى بقوا مفترسين و بينافسوا الرجاله فى الخناقات :) :) :)

**Hossam_Hassan** · 30-12-2007 01:28 PM

من حوالى سنة فوق الكوبرى اللى فى صلاح سالم عند العباسية و الطريق برضوا واقف واحدة ست ريحت بسيط على عربيتى من ورة، نزلت بصيت لقيت مفيش أى حاجة، فرحت بصتلها و قلتلها (حصل خير) و كان ردها بكل برود (و لو محصلش؟)، للأسف الشديد حظها كان حلو و كنت ماسك أعصابى و سكت و مشيت، بجد الواحد لما بيشوف المناظر دى بيحمد ربنا على تربية زوجاتنا و أخواتنا.

**محمد عز** · 30-12-2007 01:45 PM

للاسف اخلاق المصريين عموما بقت فى الحضيض
يعنى يكون الواحد غلطان ويقعد يشتم ويزعق بدل ما يتاسف ويقعد يبرر موقفه وانه مش غلطان ابدا ، ويفتكر انها شطاره وفهلوه لكن للاسف ده بلطجة وقلة ادب

**Ahmed Samy** · 30-12-2007 03:16 PM

و أنا برضه
خبطت بنت بعربية بولو 99
و نزلت لاقيت الاكصدام قشر حتة قد الكف و تحتها معجون (لأن اكصدام البولو طري)
قولتلها أنا غلطان يا فندم وأنا أسف
- أعمل بيها ايه اسف دي.؟؟
- طلبات حضرتك
- انت خبطت العربية
- ما واخد بالي و علشان كده باقول اسف و طلبات حضرتك , لو تحبي أصلحها أنا تحت أمرك ممكن تسيبيها و أنا هابعت حد يصلحها و يجيبها لحد البيت . و لو تحبي تصلحيها حضرتك و أنا أحاسب في أي مكان . أو تاخدي فلوس تصليحها دلوقتي
أنا معايا بولو و عارف اللون ده و الحته دي رشها مش هياخد يوم و لا هايعدي ال 70 جنيه .
- ايه ده ؟؟ انت نازل تشترينا يا افندي انت مش بوظت العربية ؟؟(بصوت عالي)
- أولا أنا مش أفندي , و العربية ماحصلهاش حاجة دي بوية و قشرت , و مش فلبريكة يعني .. دي مرشوشة قبل كده , و بعدين بشويش لأ.....
- بشويش ؟؟؟؟ يا برودك يا أخي انت مش .....
ركبت العربية و قلتلها
- كده حضرتك غلطتي .. عندك نمرة العربية و الناس شهود معاكي اني فرمت الs بتاعتك . و قدام شوية في قسم شرطة , و أعلى ما في خيلك . و طلعت 100 جنيه و اديتهم لصاب محل (أنا أعرفه) و قولتله لو خادتهم خادتهم ولا مارضيتش حطهم في أي جامع .
و مشيت

**معتز** · 30-12-2007 03:25 PM

بالمناسبة دى بقه.........مرة كنت سايق فى الزحمة العادية بيتاعتنا فى طريق صلاح سالم ....والطريق كان واخد اتجاه صعود.....عربيه قدامى مع الحركة والفرامل بدأت ترجع للخلف بدون شعور السائقة (على ما يبدو)... رحت مديها كلاكسات... .ولكن لا حياة لمن تكلكس لها.....المهم العربية ريحت بدون اصابة والحمدله..........مشيت 1 متر وراحة عمله نفس الحركة.........فى ثالث مره لقيتها بتزعق من العربية وتقوللى انت عمال تخبط فية ودوشنى بالكلاكسات وشوية برطمة...........حاولت طبعا بالاشارات افهمها انها هى البترجع ومش واخده بالها بس تقول ايه .والطريق سلك وبعدت عنى..
.نصيحة: لا تسير خلف اتوبيس - مايكروباس - سيارة تقودا ست
ويكفيكم الشر يارب

**kareem_Ashmawy** · 30-12-2007 03:46 PM

طيب ايه رأيكو بأه يا جماعة ان فى ستات فى مصر بتعرف تسوق
و سواقة بفن و حرفنة
امبارح كنت راجع من مدينة نصر السعة حوالى 9 و ربع الصبح
و كوبرى اكتوبر فاضى
أنا كنت ماشى على 90 الى 100 كم/س
و منزل شبرا كده كنت طالع من العربية اللى على يمينى عادى
و ببص فى المراية بالصدفة لقيت عربية لانسر 98 خضراء لازق فى الاكصدام بتاعى
وش كله مستعجل على الاخر
المهم اول ما تجاوزت العربيى اللى على يمينى لقيت الانسر راح واخد عرزة من ورايا لليمين و لعدين قدامى و طار و ببص على العربيى لقيت اللى سايقاها واحدة بنت حاجة و عشرين سنة كده
طبعا انا كبرت فى دماغى ازاى بنت تعمل فيا كده
قرصت وراها و خدت اربع خمس غرز و جيت اطلع منها لقيت العداد بتاعى على 120
يعنى الاخت الفاضلة كانت ماشية 120
قلت يمكن مستعجلة و لا حاجة
و انا فضلت ماشى 120 و مكمل طريقى و هى ورا
لقيتها جت من اقصى اليمين و طيارة و راحت واخدة غرزتين كده فى السريع ( ايوة على 120 -130 كم /س)

طبعا انا مهمدش الا لما طلعت منها و بمسافة كمان
بس أنا كنت منبهر بحرفنتها و تحكمها فى العربية جدا
لأنى متعود اشوف ستات معطلة الدنيا على طول
قرصت اكتر لغاية

**tmz9111** · 30-12-2007 03:50 PM

المشاركة الأصلية كتبت بواسطة معتز

بالمناسبة دى بقه.........مرة كنت سايق فى الزحمة العادية بيتاعتنا فى طريق صلاح سالم ....والطريق كان واخد اتجاه صعود.....عربيه قدامى مع الحركة والفرامل بدأت ترجع للخلف بدون شعور السائقة (على ما يبدو)... رحت مديها كلاكسات... .ولكن لا حياة لمن تكلكس لها.....المهم العربية ريحت بدون اصابة والحمدله..........مشيت 1 متر وراحة عمله نفس الحركة.........فى ثالث مره لقيتها بتزعق من العربية وتقوللى انت عمال تخبط فية ودوشنى بالكلاكسات وشوية برطمة...........حاولت طبعا بالاشارات افهمها انها هى البترجع ومش واخده بالها بس تقول ايه .والطريق سلك وبعدت عنى..
.نصيحة: لا تسير خلف اتوبيس - مايكروباس - سيارة تقودا ست
ويكفيكم الشر يارب

حلوة النصيحة فى الاخر

**oshy** · 31-12-2007 04:20 AM

أنا مره كنت رايح الجامعه بتاعتى فى القطاميه و أنا ماشى على الدائرى كنت مستعجل أوى عشان كان ورايا ميد تيرم المهم كنت ماسك الشمال و ماشى 150 و الله فعلا 150 و ببص فى المرايا الشمال لقيت عربيه لانوس لونها أزرق جايه زى الطياره و بترعشلى نور قمت جيت يمين شويه عشان أخليه يعدى و العربيه معديه من جنبى بصيت على اللى قاعد على الدريكسيون لقيتها بنت فى العشرينات بنت بتسوق كده بسم الله ما شاء الله مع انها كانت ممكن تعدى من يمينى لكن فعلا طلعت عارفه أصول الجرى و الغرز

**dr_3eshoo** · 02-01-2008 11:01 PM

طب مش هتصدقوا دي
مره كنت على محور اكتوبر و بعربيتي و لقيت بنت تعدي من على شمالي ماشيه 130 و بعربيه اكسنت
طبعا اخدتني العزة و قلت ازاي وراها
عربيه اكسنت و بنت كمان يا عم اديها
معرفتش اعديها الا لما جبت 170 و عديتها بالعافيه
مره تانيه في راس البر بنت بماروتي مكنتش عارف اطلع منها و بعدين وقفت على اليمين و قالتلي ايه رايك قلتلها ممتاز قالتلي تاني قلتها لا مش بحب اجري انا كنت بجرب العربيه بس

**Hesham A.Megid** · 02-01-2008 11:44 PM

من يومين كنت راجع من الكليه و كانت السكه واقفه عشان كان في قطار طالع من علي القضيب بتاعه....عربيه Pajero اللي سايقها اتخنق من الزحمه راح كاسر الدريكسيون و طالع علي الجزيره العاليه جداااا! طلع بأول عجله وجه يطلع بالتانيه ماطلعتش، راح نازل و بص قصاده لقي مطب راح دايس بنزين جامد و طالع علي المطب و من المطب علي الجزيره و من الجزيره نزل الناحيه التانيه.....الصدمه بقي لما العربيه نزلت الناحيه التانيه بان اللي سايقها......واحده ست!!! :)