الحب قبل الجواز ...

**أحمد كمال** · 06-03-2010 03:42 AM

المشاركة الأصلية كتبت بواسطة ghazy12

معلش يا احمد بك.... انت ضد رأي وليد انه يكلم والدتها, و لا ضد رأي أنا؟؟؟؟؟

لو رأي أنا, فماحصلش في كلامي كله ان فيه أي قرطسه لأبوها لأني قلتله بالنص..

ده الى جانب اني منغير ما اخلف بنات و مش شرط اخلف علشان اعرف احساس أب ببنته
او بغيرته عليها أو باي شئ من هذا القبيل.... أكيد انا فاهم ده تماما...

لكن السؤال بقى بعد اذنك يا باشا.... هل انت مع ان يتقدم لبنتك طالب لسه بيدرس في الكليه؟؟؟؟

انا ضد كلام وليد مش كلام حضرتك طبعا

و لأ مش هاقبل بطالب في الكلية طبعا ...... على فكرة انا مش اب مادي و عايز شقة مش عارف ايه و شبكة مش عارف بكام ..... بس عايز واحد معاه دخل يفتح بيت ..... انا ايش عرفني الطالب ده مستقبله ايه

و يخطب و يخش و يخرج براحته و بعد التخرج نفترض جاله التجنيد 3 سنين احتياط و لا لأي سبب قعد في البيت كام سنة على ما لقى شغل و لسه بعدها كام سنة بيكون نفسه؟

و لو هيتجوز من فلوس ابوه و ابوه هيفتح له البيت ....... شكررررررررااااااااً ما يلزمنيش لأن بنتي ساعتها هتبقى رقبتها في ايد حماها و حماتها و انا شفت أسر الحما و الحماة بيختاروا لابنهم و مراتوا يشتروا الحاجة منين و يصرفوا في ايه و ما يصرفوش في ايه حتى المصيف بيحددوا لهم يسافروا فين ...... اما تبقى فلوس جوزها هتصرف براحتها بالاتفاق بينهم ....... فلوس أهله ....... شكرا ......

مش قصدي طبعا لو اهله هيدوله الزقة الأولانية في الشقة و التجهيز و كده لأن اكذب عليك لو قلت لك اني ما اخدتش زقة جامدة من اهلي ربنا يبارك لهم و انا اللي كملت ...... و ده طبيعي في بلدنا و ظروف بلدنا ...... بس يبقى معاه دخل هو اللي يفتح البيت ...... مصروف البيت و مصروف جيب بنتي يبقى من عرق جوزها مش من نفحات أبوه و أمه عليهم و أمه تفتكر ان بقى حق مكتسب انها تتحشر في حياة بنتي ......

**الصيداح** · 06-03-2010 03:06 PM

المشاركة الأصلية كتبت بواسطة ainshouka

انا رأى انك تخليك دوغرى وتقطع عرق وتسيح دمه

جاهز يبقى اتقدم

مش جاهز يبقى ابعد تماما وركز فى مستقبلك لغاية متبقى جاهز ولو هى من نصيبك يبقى مش حتعرف تهرب منه ابدا فمتقلقش

لكن الحورات دى عاملة زى اللى رقصوا على السلم ومفيش منها نتيجة

كلام ناشف شوية بس دا اللى مقتنع بيه

عين الصواب
وحتى لا تعصي ربك بمكالمتك لها في السر
فاصطبر لحين الإستعداد
واستعن بالله

**ahmedabutaleb** · 06-03-2010 04:48 PM

بص ياباشا
وَمَنْ يَتَّقِ اللَّهَ يَجْعَلْ لَهُ مَخْرَجاً*وَيَرْزُقْهُ مِنْ حَيْثُ لا يَحْتَسِبُ
وانا متاكد انت عارف الصح فين
وعلى راى عمرو خالد محدش بيتجوز مرات حد
بس والله عن تجربة العلاقات اللى بتكون من ورا الاهل حتى لو محترمة جدا لا تنتهى بنهاية سعيدة

**ابوهاشم** · 06-03-2010 06:29 PM

انا بقى هقولك على رأى مختلف تماما
حكاية اللى ايده فى الميه والنار كل ده كلام مر علينا زمان
وكام قصة حب ايام المراهقه والجامعه وبنات الجيران
وبعد كده لما كبرنا فهمنا انها كانت اوهام صبيانيه
سيبك من الموضوع ده طالما انك لسه مافيش استقرار عندك
كمل دراستك وشوف هتقضى جيش ولا لا وكون مستقبلك
وبعد كده صدقنى هتلاقى نفسك تفكيرك فى الجواز واختيار شريكة الحياه
اتغير كليا للاحسن طبعا
واخيرا الحب الحقيقى اللى بيعيش فعلا هو اللى بييجى بعد الجواز
لانه بيكون حب العشره
اما الحب اللى قبل الجواز بيكون اكثره اعجاب بالشكل
ومسيرك لما تتجوز ويعدى عليك 10 ولا 15 سنه
ان شاء الله هتفتكر كلامى ده