يمكن يكون العيب في الاسبراتير نفسه؟
عرض للطباعة
يا اخي الفاضل كل اللي انت عملته في الكربراتير مالهوش اي لازمه ولاحتي سيلك البوجيهات
انت لازم تراجع الاتي بمنتهي الدقه
1- اذا كانت طلمة البنزين كهرباء يبقي لازم تراجع توصيلات الكهرباء وانها مثبته جيدا خصوصا الارضي.
2 - توصلات البوبينه مثبته جيدا
3- لو هي مازدا 323 يبقي السبب بسيط جدا عندك روزيته صغيره في الجانب الايسر علي الكارتيره امام السائق فيها 3 كباري من سلك حراري عالي الاحمال منهم جوز عموميات لو واحد منهم مهزوز او متأكل يبقي ثبته كويس او استبدله وانسي المشكله تماما وده عن تجربه اكيده
حاول تراجع كهرباء السيارة لان غالبا فية سلك سايب بيفصل مع الاهتزاز
ممكن حتى الميكانيكي يعملك وصلة خارجية من البطارية للموتور و تمشي بيها لفتين كويسين و تجرب
لان ممكن الكونتاكت مع الاهتزاز بيفصل كهرباء او بيرعش او البك الكهرباء بتاع الكاربراتير او الالاسلاك اللي واصلة بين الاسبراتير و الالكتروني او اي جزء تاني في الدائرة الكهربية
انت بس قول للميكانيكي بتاعك الكلام دة و هوة او الكهربائي حايعملك توصيلة خارجية من البطارية للبوبينة للبك الكهرباء في الكاربراتير و غيرة و تجربها تجربة كويسة الف بيها مثلا ربع ساعه في مطبات و حفر و تشوف
لو مابطلتش يبقى فية عيب في الكهرباء بين البطارية و علبة الفيوزات و الكونتاكت و البك و.........
لو برضة بطلت يبقى الميكانيكي راجع تاني عالاسبراتير و الكاربراتير و .....
ياباشا كان عندى نفس المشكلة بالظبط فى كيا برايد 1997 مانيوال هاتش باك ودوخت على الحل (غيرت البوجيهات - والفلاتر والخراطيم ونضفت الكربيراتير وبعدين غيرته خالص وكل ميكانيكى أروح له يفتى فى حاجة "من غير علم") لحد ما ربنا هدانى فى راجل سواق عجوز وطلع جرب معايا العربية قالى الآتى:
ربط الفرامل كويس وارفع الدبرياج وبعدين لما تروح تمون حط فى تنك البنزين (Positive power) وإملا نص التانك بس واعمل بيها مشوار ما يقلش عن 12 - 15 كم والحمد لله انتهت المشكلة تماما بعد ما دوخت بيها حوالى ثلاثة شهور.
حاول تجرب الحكاية دى يمكن تحل مشكلتك زى ما حلت مشكلتى.
او ممكن يكون الردياتير ناقص مياة مثلا ههههههههه
يا سيدي الفاضل مع كا احتراماتي لا الدبرياج و لا الفرامل ولا اضافات البنزين تعالج تبطيل السيارة مع المطبات والاهتزازات
بالمنطق كدة العربية بتتهز في المطبات ... بتبطل .... يبقى اية اللي يسبب كدة .... اكيد مش الدبرياش واطي .... و لا الفرامل تتربط .... و لو اني مش فاهم الفرامل تتربط ازاي .... انا اعرف ان العفشة هي اللي بتتربط ..... و اوكتين البنزين كذلك و اساسا دي عربية كاربراتير يعني مافيهاش حساس اوكسيجين في الشكمان يميز رقم الاوكتان مثلا .ممكن يكون بيقطع مع انة برضة مايسببش كدة
التفكير المنطقي يقول ان اكيد سلك بيتهز فا بيفصل الكهرباء عن البوبينة تقوم العربية طافية
والله انا قلت لكم ان فيه سلك مهزوز وهو اللي بيعمل كده وممكن قوي يكون عمومي او ارضي ودي مش شغلة ميكانيكا خالص دي شغل كهربائي ولازم اول ماتقف تخللي اي كهربائي يكشف عليا فورا ويحدد لك ايه اللي قاطع كهرباء واحتمال كبير جدا يكون الكونتكت نفسه او البوبينا خاجه منهم لما بتسخن تقطع واول ماتبرد تشتغل تاني
الحل الغريب جدا لاني كان مره معايا مازدا 323 واللي اخدتها منه كان عامل لها صيانه ومغير جوانات الموتور كامله بما فيها جوان وش السلندر قبل ما اخدها والميكانيكي المحترم بتاعه ضيع صاموله من عامود التاكيهات وركب له بدالها صاموله 10 عاديه من غير ورده صينيه واكون مسافر زي الفل وعلي غفله مافيش موتور وطلعت عيني شهر ونص وخربت لي المصيف وفي اسكندريه عند ميكانيكي جامد راجهعناها كلها دورة البنوين كامله ومافيش فايده تمشي فل وعلي غفلة تنااااااااااااااااام المهم في اخر يوم وانا نازل القاهره عملتها بس انا اتغابيت عليها لقيتها عدت 3 وكان فيه حلل في الموتور رزع وقلت في ستين داهيه هارميها باي سعر او ارمي الموتور ورحت للميكانيكي بتاعي تاني يوم فكينا غطا التاكيهات لقينا صاموله بلدي بتعمل ايه بقي؟؟؟؟؟
مع حركه التاكيهات الصاموله تعلق التاكيه بتاع البنزين فالغرفه تتملي بنزين ومافيش حرق كفايه فتغرق البوجيه ويقطع فتقف مع العلم انها ماكانتش تعد 3 قبل ماتقطع كانت بتموت من غير كلام ولا تحذير المهم حليناها باننا غيرنا الجاويد كله بصامولته الاصليه من موتور قديم وخلصت المشكله نهائي بس برضه بعتها واللي اخدها بيدعي لي وكلمني اكتر من مره مبسوط ونفسه يخدمني في اي حاجه هي قرف طلعت عيني وربتني وغيري الله يبارك له مريحاه قسمه ونصيب
روح لميكانيكى عنده ضمير ينظف البيك وكمان يشيك على الاسبراتير ممكن يخليها تنتش ده فى حالة عدم وجود ريت على البوجهات
انا عندي مازدا 323 وفيها نفس المشكلة اللي واخده 9 صفحات دي:whtauwant:
رحت عند عم بلبل مازدا نظف الكاربراتير مرتين وكان بيعلي الموتور ..... كانت تتظبط شوية بس ترجع تاني
تنتيش في الغيارات الاول والثاني وتبطيل ساعات لما تكون العربية سرعتها قليلة وازود بنزين تعمل رجرجة ولو مالحتقش ادوس دبرياج تبطل مني .:fdsa: (ومرات قليلة كنت اجي ادور المفتاح يعلق .. ساعات مع المحاولة بيشتغل ومرتين اضطريت ازق )
انا لسه منظف كاربراتير تاني امبارح ومغير فلتر البنزين .
من ساعتها ما بطلتش ولا مرة بس لسه فيها تنتيش بسيط .
تفتكر مشكلتي تبقى في السلوك اللي حضرتك بتقول عليها ؟؟؟؟
ولا انا قصة تانية ؟؟ ومشكلة كاربراتير ؟؟:rfds:
الف شكر للجميع لاني بصراحة قريت الموضوع والردود واستفدت جدا
علما باني زيرو في ميكانيكا السيارات
رغم اني مهندس ميكانيكا :colsmil: