الموضوع: عيد ميلاد نايل موتورز الثالث 23 ابريل بالاسكندريه الدعوه عاااااااااامه

إخوانى الأعزاء خالد أبو رقية ومحمد شنورى والدكتور / أحمد بحرى الناس اللى بتتعب جداااا عشان تجهزلنا كل حاجة من أكل وشرب وحلو وشاليه وناقص كمان يروحوا كل واحد لبيته .
اسمحولى اولا أشكركم على المجهود الرهيب اللى بتعملوه فى كل مقابلات المنتدى فى اسكندرية واللى اكيد بيظهر فى مستوى التنظيم
ثانيا : فى اقتراح مهم وارجو من كل الأعضاء اللى هيشرفونا فى عيد ميلاد المنتدى انهم يتجاوبوا معايا عشان نحاول نساعد اخوانا اللى بينظموا المقابلات وساعات كتير بيتحملوا مبالغ مالية كبيرة من جيبهم الشخصى فأنا وبعد عدة مقابلات بقترح على شنورى انه بعد ما يتحط ميزانية تقريبة للمقابلة و فى اعتقادى هتكون بمتوسط 100 جنيه أى عضو من الأعضاء المحترمين عايز يحضر المقابلة هيقوم بتحويل المبلغ عن طريق مكتب البريد لمحمد شنورى أو خالد ابو رقية ويكون اخر معاد لتحويل المبالغ يوم 19/4/2010 عشان يقدروا يحجزوا السمك اللازم للمقابلة ويتفقوا مع مطعم انه يحضر السمك فى شكل وجبات كل فرد وجبة ويحجزوا كمان تورتة عيد الميلاد اللى هتحتاج انها تتحجز قبل المعاد ب يومين على الأقل ولأن من خبرة مقابلات سابقة فسامحونى فى ناس كتير قوى بتقول انها جاية وما بتجيش وبيتعمل حسابها فى اكل وحلويات وفى الأخر الحاجات دى بتترمى وبيتحملها ناس مالهمش اى ذنب وعلى أى حد من الاعضاء المحترمين لو حب ييجى يوم المقابلة من غير ما يكون حول الفلوس فى الوقت المحدد انه ومع بالغ اسفى هيكون مسئول انه يتغدى بمعرفته .
انا اسف ممكن يكون كلامى حاد شوية بس فعلا الناس اللى هناك دى ما تستاهلش اننا نبهدلها ونخليها كمان تتحمل فلوس من جيبها ويصحوا من الفجر يروحوا يشتروا سمك و ينضفوا ويشوو وبعدين وهما جايبين الأكل ناس تفتكر انها عايزة تاكل سمك فيرجعوا تانى ويجهزوا وفى الأخر تقريبا ما قعدوش معانا ساعتين على بعض .
فأرجو اننا نتعاون مع بعض عشان نخرج المقابلة فى احسن صورة وما نرهقش الناس اللى بتستضيفنا عندهم أكتر من اللازم وكل سنة ونايل موتورز بخير .