الموضوع: حكايتي مع النيو اكسنت وغبور-ما حدث وماأتخذته من اجراءآت وما سوف اتخذه

اللي حصل حتى الان - ان جهاز حماية المستهلك اتصل بيا وقالي ان على شكواي فلي الحق ف حاجه من اتنين - استبدال او استرجاع - رغبتك ايه
فقولتله الاسترجاع طبعا - هو انا ينفع اتعامل معاهم تاني - فقالي انتظر مكالمه من التوكيل
بعد يومين اتصل تاني و قالي ان اللي هيكلمني من التوكيل هيتكلم النهارده
تاني يوم جاتلي مكالمه كوميديه جدا :
واحده ماسكه نفسها من الضحك بالعافيه بتقولي : معاك فلانه من توكيل جي بي اوتو ممكن اعرف رقم الموتور و الشاسيه - فقولتلها عليهم
قالتلي حضرتك بتحب تعمل صيانات عربيتك فين ابو رواش و لا قليوب و لا فين - قولتلها صيانات ايه يا ست العربيه دي عامله الف كيلو و عليها مشكله
قالتلي طيب شكرا على وقت حضرتك و قفلت - وهي بتقفل ضحكت الضحك اللي كانت كتماه و مش مخليها تعرف تتكلم

طبعا قمة المسخرة
المهم انا قولتلهم ف الجهاز اخرتها ايه - ما هو لو ليا حق نخلص ماليش قولي ان ماليش - قالي لا ازاي و قالي اعمل حاجه تانيه - هقولكم هي ايه بكره - مع اني حاسس او متأكد انهم ف التوكيل بيعرفوا قبل ما انا اعرف

طبعا كل الكلام ده كان حتى يوم الخميس
وزي ما قولتلكم قبل كده انا كنت بتصرف من نفسي عشان مش عايز ازعل والدي لو عرف
بس انا جالي اتصال من ناس عايزه تساعدني وقالتلي على اجراءات قانونيه و على انهم هيئه حقوقيه وطبعا الناس دي اللي عايز يعرفهم انا ممكن اقوله عليهم - للعلم التوكيل عارفهم كويس جدا و بعد ما كانوا بيساعدوا ناس قبل كده فجاءة سابوهوم في نص الطريق
وبعد الناس دي ما اتصلت بيا كان لازم اعرف والدي - المهم انا كنت معاه امبارح بناقش و نشوف كل انواع القضايا و خطواتها من الالف للياء حتى الهيئه الحقوقيه دي انا شوفتهم و قابلتهم

طبعا فيما يخص القانون - للي عايز اني اساعده في اي حاله مشابهه - انا كنت نزلت قانون الحمايه من ع النت و قريته لكن والدي قالي ان كمان فيه قانون تشكيل المحاكم الاقتصاديه و فيه النيابه الماليه و لو رفعت ايه يودي على فين و لو رفعنا حاجه تانيه تودي على فين و - بيني وبينكم حسيت ان القانون اللي كنت فرحان اني نزلته من ع النت ده نقطه فبحر من كذا قانون كلهم يجيبوا ليا حقي بس لازم فعلا تتصرف بيهم صح

طبعا اي حاجه هتحصل هقولكم عليها و عن قريب قوي - بس هقول عليها بعد ما تحصل مع ان التوكيل على ما انا عرفت من بابا هيوصله انزار الاول
و اي اجراء انا بعمله بعيد تماما عن جهاز حماية المستهلك يعني موضوعهم ماشي براحتهم

طبعا اليوم اللي هيصدر فيه قرار من حماية المستهلك و كمان اليوم اللي هنعمل فيه اي قضيه هيصاحبه نشر من احد الصحف
وعشان اطمن التوكيل مش نفس الصحيفه اللي نشرت موضوع امير عشان متروحوش تيجيبوا الصحفيه اللي عملت الموضوع وتظبتوها - اطمنوا صحفي لا تعرفوه و لا هتوصلوا له

معلش يا جماعه لو تعرفوا الاحساس اللي جوايه - عربيه جايبها بدم قلبي بيفككوها مية حته قدامي - و ناس بيوقولوا ليك مفيش غير كده - وعربيه مرميه بدل ما اركبها و اشوف حالي كل يوم حالي واقف بسببها - تعرفوا انا قد ايه عايز ......

بص يابومارو يابنى انا متابع الموضوع من زمان لكن انا رأيى امشى فى اجراءاتك عاااااااااااااااادى وطلع عين ابوهم اذا مش وصلت معاهم لحاجه ع الأقل هتوصلوا لنقطة تراضى بينكوا وان مش وصلت معاهم لحاجه خالص سلم امرك لله واركب عربيتك وانسى لان العالم دى حيتان وهيطلعولك ميت خزوق فيها وهيطلعوا زى القرعه من الضفيره لانى احب اقولك ان العيب اللى فى عربيتك مش جوهرى وبالنسبه للتليين العربيه انت خايف لتكون مش لينتها صح لكن احب ابشرك ان التليين مش قضيه لان العربيات الجديده كلها بيبقى فيها خلوص يعنى ملينه خلقة ربنا من المصنع
ولك تحياتى

المشاركة الأصلية كتبت بواسطة eino666

يا صديقى العزيز
ما ضاع حق وراءه مطالب
وانت على حق واحنا كلنا معاك واهم حاجة لا تيأس و لا تقنط من رحمة الله وان شاء الله حقك هتاخده تالت ومتلت باذن الله غصب عن اتخن تخين فى التوكيل
وحسبى الله ونعم الوكيل فى كل من ظلمك وتجنى عليك فى حقك لاننا ما بنلاقيش الفلوس فى الشارع لآلآ احنا بنطفح بيها الدم
............................
محمود عينو

حسبي الله و نعم الوكيل فكل واحد ظالم و بيقبل على نفسه و على ولاده مال حرام

المشاركة الأصلية كتبت بواسطة m_mekkawy

بص يابومارو يابنى انا متابع الموضوع من زمان لكن انا رأيى امشى فى اجراءاتك عاااااااااااااااادى وطلع عين ابوهم اذا مش وصلت معاهم لحاجه ع الأقل هتوصلوا لنقطة تراضى بينكوا وان مش وصلت معاهم لحاجه خالص سلم امرك لله واركب عربيتك وانسى لان العالم دى حيتان وهيطلعولك ميت خزوق فيها وهيطلعوا زى القرعه من الضفيره لانى احب اقولك ان العيب اللى فى عربيتك مش جوهرى وبالنسبه للتليين العربيه انت خايف لتكون مش لينتها صح لكن احب ابشرك ان التليين مش قضيه لان العربيات الجديده كلها بيبقى فيها خلوص يعنى ملينه خلقة ربنا من المصنع
ولك تحياتى

انا فعلا همشي عادي ف الاجراءات بتاعتي عادي - انا بس بشارك الناس كلها علشان يعرفوا اللي حصل - بس انا عايز اقول لسيادتك حاجه - ان العيب اللي فعربيتي عيب جوهري بدليل ان تصليحه استدعى تفكيك السياره و هي لسه ع الزيرو و كمان انا من حقي ان لما اشتري عربيه تكون سليمه 100% و اي عيب و لو بسيط مش جوهري يديني الحق ف رد السياره فورا - انا مش مشارك غبور ف الشركه عشان يديني عربيه هو جايبها بايظه
وبعدين اقول لحضرتك حاجه انا مستحيل اركب العربيه لاني متأكد انها هتبوظ تاني و تالت - بس مش ده السبب و بس - السبب الرئيسي اني طلعت لراجل محترم فمكتبه و قالي ان مفيش قانون 14 يوم على السيارات و قالي انها حاجه بسيطه تتحل بمسمارين و انا زي العبيط صدقت و شوفت بعيني المسمارين شوفت ال80الف اللي بقالي كذا سنه بعمل حسابي عليهم عشان اجيب العربيه دي واحد عامل ماسكهم وبيفكك و يصلح مصيبه واحد تاني غيري عاملها و في نفس اليوم عرفت ان قانون ال 14 يوم يمشي ع العربيات و الطيارات كمان واي عيب سواء صغير او كبير هو مسؤلية الشركه بالكامل و من حقي فورا ارجاع السياره - يعني انا عبيط عبيط عبيط - يعني اللي شافني كده استغباني و استهيفني و استعبطني و استحل مالي عشان يصرفه ف الحلال على بيته طبعا - كان كل همه يلزقلي العربيه متجاهلا تماما اي حق ليا - بس على رأي واحد صاحبي فنفس اليوم قالي انت فاكر نفسك ف المدينه الفاضله
هما حيتان بقى او اسود اللي اعرفه اني اقوى منهم مليون مره عشان الحق معايا
شوف انا لغاية الاسبوع اللي فات كنت عايز العربيه ترجع وبس - لكن بعد اللي بيحصلي ده - انا هاخد حقي من كل واحد ظلمني

عزيزي ابو مارو.. ربنا يوفقك وينصرك عليهم وبإذن الله تسترد حقك وأنا لو مكانك أعتقد كنت هاعمل زيك تمام ده شقى سنين مش فلوس بنلاقيها عالرصيف

ياعم خلاص باة اركب و عيش


تم حصولك على " إنذار " لمخالفة القاعده 13

مشرف هيونداى 2