الموضوع: اية رايكم فى استخدام الغاز الطبيعى

انا معايا فيرنا و ماشى بيها عاز بقالى حوالى 100 الف كيلو
-المميزات
1- طبعا التوفير كبير اوى لانى كنت بستهلك بنزين بحوالى 500 جنيه ف الشهر
2-سحب العربيه بالظبط زى البنزين هو ممكن يكون اقل شويه بس جامد برضه
بالتكييف او من غير التكيف السحب حلو
حاسس ان العربيه صوتها اهدى و هى على الغاز
-نيجى بقى للعيوب
1-طبعا الشنطه صغرت اوى و دى كانت اكبر حاجه ف الفيرنا اصلا
2-العفشه اللى ورا بدا تلخبط و فيها صوت طبعا من الحمل المستمر عليها
3- اهم عيب بقى لما ابقى واقف امون و يجى عيل تييييت راكب عربيه تعبانه و بيمون بنزين 80 و يقف يشاور عليا كده :pointi~2[2]: ببقى عايز اروح اموته
بس كده بس ف الاخر العربيه ماشيه تمام الحمد لله
المهم الصيانه و خلاص

انا والدي معاه مرسيدس 230 موديل 80
يعني موتور كبير 2300 سي سي
شنطه كبيره
عفشه بسم الله ما شاء الله

والله العظيم يا جماعه الغاز دا دمر العربيه
العربيه مش بتسحب ,,,, بتاكل زيت ,,,, العفشه اتكسرت
العربيه بتسخن ,,,, الموتور صوتو عالي زي عربيات الجاز
البوجيهات مش بتعييش

مع العلم والله العظيم والدي كان عاملها عمره قبل الغاز مكلفاه 5500 جنيه
و غير كل حاجه لدرجه ان البساتم اتغيرت ,, و عملها عفشه جديده ,, كاوتشات جديده
دلوقتي والله العظيم العربيه بقت علبه صفيح
بلاش بلاش بلاش افتكاسات
والله اللي وفرناه في الغاز حندفع ادو 10 مرات علشان العربيه ترجع زي الاول

المشاركة الأصلية كتبت بواسطة مواطن مصرى

انا حولت سيارتى الريجاتا للعمل بالغاز الطبيعى من ساعه ما البنزين 90 غلى اول مره و بقى بـ 130 قرش بدل جنيه واحد (فى سنه 2005 على ما اذكر) و فى شهر 7 القادم هاكمل 5 سنين مع الغاز الطبيعى

الميزه الرئيسية للغاز هى التوفير لو بتمشى بالعربيه كثير و بتستهلك كثير
يعنى مثلا تفويلة الغاز (15 متر مكعب * 45 قرش للمتر = 6.75 جنيه) بامشى بيها 200 كيلو داخل القاهره فى عز الزحمه و بالتكييف كمان و من 250 الى 270 كيلو فى السفر (من مصر لاسكندريه و لف فى اسكندريه مثلاً) لو انت هتمشى بنزين يبقى هتفول 30 لتر بنزين 80 = 30 جنيه او 25 لتر بنزين 90 = 43.75 و اسيبكم انتو تطرحوا الفارق فى مشوار واحد

الناس اللى معترضه على الغاز معترضه على شويه حاجات هاحاول اشرح لها وجهه نظرى

1- تكلفه التحويل ( 5000 للسيارات الكاربيراتير و 5500 للسيارات الانجكشن) جنيه غاليه :
كان فيه موضوع لزميل فى المنتدى حاسب فيه بالورقة و القلم انت هتسترد الخمس الاف جنيه (من فارق السعر بين الغاز و البنزين) بعد حوالى 50 الف كيلو او يعنى بعد حوالى 4 سنين لو بتمشى الف كيلو فى الشهر (انا بامشى اكثر من 20 الف كيلو فى السنه علشان شغلى فيه حركه و سفر)

و كمان انت ممكن تشترى عربيه زيرو و تصرف اكثر من الخمس الاف دول على حاجات اسف فى الكلمه هايفه زى الجنوط و الكاوتش الكبير و الدى فى دى و السماعات و البازوكا و السنسورز و هلم جرا


2- الغاز فيه كبريت بيضر الموتور :
اول حاجه لازم نعرفها ان اى منتج بترولى لازم يكون فيه كبريت
يعنى البنزين كمان فيه كبريت بس بنسبه اقل من الغاز و الكبريت ده برضو مضر

ثانى حاجه لازم نعرفها ان الرصاص الموجود فى البنزين اخطر على الموتور من الكبريت الموجود فى الغاز (الغاز مفيهوش رصاص) و خطورته ان تأثيره بيبقى اسرع بمراحل بدليل انك لو جبت عربيه جديده و حطيت لها بنزين 80 (اعلى بنزين فيه رصاص) هتسمع اصوات التسقيف و الكركره و هتبوظ الدنيا جوه الموتور بعكس لو حطيت لنفس الموتور غاز طبيعى مش هتسمع الاصوات دى و الضرر مش هيبقى زى البنزين 80

ثالث معلومه هى ان المضر فى الغاز مش الكبريت لوحده (و لو كانت دى المشكله كانت اتحلت من زمان لان فى السعوديه و ايطاليا توصلوا لتكنولوجيا يخففوا بيها نسبه الكبريت الموجوده فى الغاز الطبيعى بس الطريقه دى هتغلى تكلفه متر الغاز 50% ) و لكن المضر هو درجه الاحتراق العاليه للغاز (درجه احتراق متر الغاز = درجه احتراق 1.2 لتر بنزين) مع وجود الكبريت فى صوره ماده مش فاكر اسمها للصراحه الماده دى دى بتعمل نوع من الترسب على اجزاء الموتور الدخليه و تهلكه على المدى الطويل

طبعا النتيجه معروفه لو الموتور اتهلك = عمره موتور او نصف عمره

الموضوع ده له 3 حلول تؤخر موضوع العمره لحد كبير جداً جداً ان لم تكن تتلافاه كمان

الحل الاول : متركبش غاز لعربيه موتورها مش تمام (لازم حاله الموتور تكون 70% مثلا) لانك كده هتهلكه اسرع
و لو كانت العربيه زيرو متركبش غاز طبيعى من الزيرو و لكن انتظر 5000 كيلو اشتغل فيها بنزين الاول علشان البنزين بيكون طبقه كربونيه على اجزاء الموتور الداخليه (البساتم و الاسطوانات) تحميها من الاحتكاك العالى و بالتالى الاهلاك

الحل الثانى : استخدام زيت موتور مخصص لمواتير الغاز الطبيعى (زى زيت visco ngv فى محطات كارجاس بـ 57 جنيه و يتغير كل 4000 كيلو او التعاون جازكوب فى محطات التعاون بـ 50 جنيه و يتغير كل 3000 كيلو ) الزيوت دى فيها مواد كيميائيه تتفاعل مع الغاز الطبيعى و تقلل من اهلاك الموتور عن الزيوت المعدنيه العاديه

الحل الثالث : فى الشتاء شغل العربيه و سخنها بنزين الاول و بعد ما تمشى عشر دقائق كده اطفى البنزين و حول غاز (فيه مفتاح سويتش بيركبوه فى التابلوه بيحول) و دى نصيحه قالهالى مهندس فى كارجاس لما حولت العربيه و ماشى عليها لغايه دلوقتى


و بعدين لاحظوا حاجه مهمه جداً :
تكلفه عمره الموتور او نصف العمره بالقياس لتكلفه التوفير الناتج عن استخدام الغاز الطبيعى هتبقى صفقه رابحه
اقولكم ازاى
انت مثلا بتوفر قد ايه كل شهر من استخدام الغاز ..
قول مثلا 200 جنيه على الاقل
يعنى فى السنه 2400 جنيه و فى السنتين 4800 جنيه و فى الثلاث سنوات 7200 جنيه و فى الاربع سنوات 9600 جنيه

و اظن ان تكلفه العمره لو كان موتور مرسيدس مش هتتعدى 5000 جنيه يعنى انت كده كده كسبان فى الموضوع (توفير البنزين + العمره نفسها هتجدد المكنه + هيتبقى فلوس كمان)

3- كفاءة الغاز الحرارية اقل وبالتالى سحب اقل وعزم اقل :
اول معلومه تدحض هذه التهمه هى ان درجه احتراق متر الغاز = درجه احتراق 1.2 لتر بنزين اى ان كفاءه الغاز الحراريه اعلى من البنزين
العزم و السحب الاقل فهو ناتج من موضوع تانى خالص الا وهو ان المواتير كلها حالياً مصممه للعمل بالبنزين اللى بيدخلها مباشره عن طريق صمامات او رشاشات و يحترق مباشره جواها و علشان تتحول غاز لازم تركب مجموعه تحويل تنقل الغاز من الاسطوانه الى الموتور بطريقه معينه و بأجهزه معينه و فى توقيت معين كمان و بالتالى الغاز بيحتاج وقت اكثر من البنزين علشان ينتقل من الاسطوانه الى المحرك و بعدين يحترق احتراق كامل داخل غرفه المحرك و يطلع الطاقه اللى جواه زى البنزين و بالتالى هتلاقى ان استجابه السياره لزياده السرعه (السحب) فى السيارة اللى شغاله بالغاز هيكون أبطأ شويه من سحب السيارة اللى شغاله بالبنزين

طيب و ايه الحل ؟!
الحل عملوه فى اوروبا و الدول المتقدمه و هو انهم صنعوا مواتير سيارات مصممه للعمل بالغاز الطبيعى فقط (و دى بالمناسبه سحبها اعلى من مواتير البنزين المكافئه لها فى السعه اللتريه) و فى مصر استوردنا مواتير من دى بس لاتوبيسات النقل العام الزرقاء الجديدة فى القاهره و اتوبيسات النقل الجماعى فى الاسكندريه و شغاله زى الفل و بيقولوا انهم هيعمموها على كل الاتوبيسات فى مصر

و بعدين فى الزحمه الخانقه اللى فى مصر انت محتاج تشد و تجرى فين و ازاى و امتى ؟!
جرب اركب عربيه تاكسى جديد من اللى شغالين بالغاز الطبيعى و بص جنبها على عربيه تانى ملاكى من نفس النوع شغاله بالبنزين هتلاقى مفيش فرق بين العربيتين و هما ماشيين زى السلاحف فى صلاح سالم او ميدان الجيزه مثلاً


4- الاسطوانه مش امان و ممكن تنفجر او يتسرب الغاز منها :
انصح اللى بيقول كده يروح اى محطه تحويل غاز طبيعى و يسأل فى المعلومه دى بنفسه
فيه علم كامل اسمه (الامن الصناعى) له مقاييس عالميه اثبت ان اسطوانات الغاز الطبيعى غير قابله للانفجار تحت الضغط او الحريق او انقلاب السيارات او حتى لو ضربت عليها رصاص حى

اما بالنسبه لتسرب الغاز فده نسبته واحد لكل 400 الف حاله و لو حصل فالاسطوانه فيها محبس امان من جوه هتقفل نفسها و لو المحبس ده كمان باظ الغاز الطبيعى كثافته اقل من الهوا فهيتسرب لاعلى فى الجو مش هيقعد على الارض زى غاز البيوتان (بتاع اسطوانات البوتاجاز) او الغاز الطبيعى المستخدم فى البيوت (لان غاز البيوت ماشى فى مواسير مش مسال فى اسطوانه امنه)

5- الاسطوانه تؤثر على عفشة السيارة الخلفية :
وزن الاسطوانه فاضية 50 - 60 - 70 كيلو (فيه اكثر من نوع)
ووزنها مليانه هتضيف كمان 15 كيلو يبقى وزنها 65-75-85 كيلو
خلينا فى الوسط 75 كيلو و اعتبر ان واحد راكب معاك فى الكنبه ورا
هل العفشه هتتأثر بواحد راكب ورا الا لو كانت العفشة اصلا بايظة او مش بتعمل لها صيانه دوريه باستمرار ؟!
اترك الاجابه لكم ......


طبعاً الكلام اللى فوق لا يعنى ان الغاز الطبيعى كويس 100% ..
اكيد الغاز الطبيعى فيه عيوب و عيوب كثيره كمان ممكن محدش يكون واخد باله منها الا اللى محول عربيته غاز من فتره كبيره

1- الاسطوانه بتاكل جزء كبير من مساحه الشنطه حتى لو كانت الشنطه كبيره
عندى مثلا الشنطه يادوب واخده الاسطوانه و الاستبن و شنطه العده و جركن مياه احتياطى و لو حبيت احط فيها حاجه انسى يا عمرو
الموضوع ده له حل بس مش موجود فى مصر و هو نوع من اسطوانات الغاز المبططه (بالبلدى) تركب تحت العربيه او خلف الكنبه فبالتالى متاخدش حيز كبير من مساحه الشنطه

2- تفويلة الغاز الطبيعى 15 متر مكعب فقط لا غير (سعه الاسطوانه تقريياً 16 او 17 متر) و دول يعادلوا اقل من صفيحه بنزين و بالتالى معدل ذهابك الى محطات الغاز هيكون اكثر من معدل ذهابك الى محطات البنزين لو انت بتمشى كثير زى حالاتى


3- قله محطات تموين الغاز فى المحافظات خارج القاهره
فى كل محافظه محطه او اثنين بالكثير و فى المراكز الرئيسيه كمان
اديلكم مثال على اللى ممكن يحصل لو انت مسافر خارج القاهره الى الاقاليم : فى مره كنت مسافر شغل بلد اسمها طما فى سوهاج (اكثر من 450 كيلو من القاهره) و مونت فى النص من محطه كارجاس على الطريق الصحراوى بتاع الصعيد و لما وصلت طما اقرب محطه غاز طبيعى هناك كانت فى طريق اسيوط الزراعى على بعد 40 كيلو متر (و هترجعهم لورا كمان)


4- اغلب السيارات العامله بالغاز تاكسيات
و ده بيعمل مشكله فى التموين من المحطات (بالرغم من كثرتها فى القاهره و الجيزه) لانك هتروح هتقف فى طابور (ده لو كان فيه اصلا نظام) مع مجموعة من البلطجيه و ارباب السوابق بالرغم من ان القانون يلزم كل محطه ان يكون فيها مكنه لتموين الملاكى لوحدها لكن طبعا انت اكيد فى مصر


اخيراً و ليس آخراً :
انا حبيت بس اقول وجهه نظرى بصفتى من مستخدمى الغاز الطبيعى و اكيد وجهه النظر دى تحتمل الصواب و الخطأ و ارجو من الجميع الاستفاده من المناقشة الدائره حول الموضوع ككل


مع خالص تحياتى

انت فنان عفو أستاذ ولا أقولك ردكتور رئيس قسم !
اه ده ايه الابداع ده
والله اخجلتنا بكرمك ومجهودك !

المشاركة الأصلية كتبت بواسطة medoxmedox

انا والدي معاه مرسيدس 230 موديل 80
يعني موتور كبير 2300 سي سي
شنطه كبيره
عفشه بسم الله ما شاء الله

والله العظيم يا جماعه الغاز دا دمر العربيه
العربيه مش بتسحب ,,,, بتاكل زيت ,,,, العفشه اتكسرت
العربيه بتسخن ,,,, الموتور صوتو عالي زي عربيات الجاز
البوجيهات مش بتعييش

مع العلم والله العظيم والدي كان عاملها عمره قبل الغاز مكلفاه 5500 جنيه
و غير كل حاجه لدرجه ان البساتم اتغيرت ,, و عملها عفشه جديده ,, كاوتشات جديده
دلوقتي والله العظيم العربيه بقت علبه صفيح
بلاش بلاش بلاش افتكاسات
والله اللي وفرناه في الغاز حندفع ادو 10 مرات علشان العربيه ترجع زي الاول

بص اللي انا فاهمه منك ان العربية كده موتور خفيف والموتور الخفيف ده بياكل زيت وبيبوظ البوجيهات وبيسخن بسرعة وصوته بيبقى عالي !
السؤال المشاكل دي ابتدت تظهر امتى ؟
بعد كام كيلو متر ؟

المشاركة الأصلية كتبت بواسطة mahmoodallam

بص اللي انا فاهمه منك ان العربية كده موتور خفيف والموتور الخفيف ده بياكل زيت وبيبوظ البوجيهات وبيسخن بسرعة وصوته بيبقى عالي !
السؤال المشاكل دي ابتدت تظهر امتى ؟
بعد كام كيلو متر ؟

والله والدي في الاول شد العربيه
عملها عمره تمام (حتي البساتم اتغيرت) ,, كلو الماني اصلي جديد
و سمكره و دوكو و عفشه و اربع فرد كوتش جداد
العربيه كانت حاجه جامد اخر حاجه
الموتور ملوش صوت ,,,, سحب ممتاز ,,, المطبات والله مش بنحس بيها
والله العربيه كنت ماشي بيها 170 كم/س زي الفل
بس طبعا العربيه لسه طبعا 2300 سي سي كربيراتير يعني حراقه في البنزين
لغايه ما واحد صاحب والدي شار عليه الشوره الطين دي ,,, قالو بما ان العربيه بقت كده ,,, بالمره اقلبها غاز ,,,و كدا بقي تبدا تعدلها عمر جديد ,,, و للاسف والدي سمع كلامو
والله والله يا جماعه العربيه بقت علبه صفيح ,,, علي فكره والدي دكتور ,, من البيت للمستشفي و من المستشفي للبيت ,,, و اخويا ساعات قليله يروح بيها الجامعه ,,,, العربيه اتدمرت
بلاش بلاش بلاش غاز ,,,,, والله نصيحه خالصه لوجه الله