صيانة الـ 20 الف كم ومفاجأة - موضوع جامد جدا -حصريا على نايل موتورز
بسم الله الرحمن الرجيم
اصدقائى الاعزاء ...... أهلا بيكم
من كام يوم وتحديدا يوم 6 مارس عربيتى السيراتو بلغت من العمر سنة و 8 شهور (وهتسنن ) :C_laugh[1]: ههههههه
وعملت فيهم (20,000) كم بالتمام والكمال وحان موعد صيانة العشرين
اتصلت حجزت ميعاد للصيانة يوم 8 الساعة 8 صباحا
نرجع فلاش باك لموضوع اختبار قيادة النيو سيراتو كنت طلبت من خالد بك فاروق مدير الصيانة فى كيا
انى فى موعد صيانة العشرين محتاج اصور العربية اثناء اجراء عملية الصيانة علشان اعمل موضوع
متكامل عن الصيانة ومراحلها المختلفة داخل الورشة والرجل تفضل مشكورا بالاستجابة لطلبى
وقد مر على هذا الوعد مايقرب من شهرين فأتصلت به لتذكيره ولكن لم احقق اتصال فا ارسلت له ميل
اذكره بالموضوع واسئله عن امكانية تركيب بوجيهات بلاتنيوم بدلا من العادية – تانى يوم الصبح
اتصل بى المهندس خالد بعد ان قرء الميل واستجاب لطلبى وتحديد موعد الصيانة فى صباح اليوم التالى
صحيت اليوم ده السادسة صباحا ونزلت من البيت الساعة 7 كنت امام التوكيل الساعة 8 الا عشرة
ومافتحوش الابواب حتى الان وكان امامى 6 سيارات وانا السابع (جم امتى دول ؟؟؟!!! :Ob_mak1[1]: )
وكان العاملين بالتوكيل يتوافدون تباعا ...
جاء رجل من الامن يسئلنى ان كنت حاجز ؟؟ وباسم مين ؟؟ وتأكد من الحجز ووضع رقم 7 على سقف السيارة
ودخلت السيارات تباعا طبقا للارقام فى ساحة التوكيل ....
السيراتو فى لانتظار وعليها الرقم 7
فى هذه الاثناء دخل المهندس خالد بسيارته وشاهدنى والقى على التحية ,تركته لمباشرة
عمله وبعدها وجدته فى ساحة التوكيل فتوجهت اليه وسلمت عليه وسئلنى اذا كان حد من
مهندسى الاستقبال معى ولا لاء واشار الى احدهم حد يجى يتابع السيارة دى ويجبلى الشيت
جأت مهندسة استقبال... ما فيش صباح الخير حتى .... هتعمل ايه ؟... انا بكل لطف صيانة ال20 الف ... هتكلفك 800 جنيه.!!! :dzey:
انا اسقط فى يدى وما نطقتش ... وحدثت نفسى مش مهم هشوف الموضوع مع خالد بك ..
وقلتلها هركب بوجيهات بلاتنيوم ...هى : ماينفعش... انت قلت للمهندس خالد؟ ايوه – راحت
سئلته ... قالها ايوه ...هى فين البوجيهات .. اتفضلى .. حطيتها على تابلوه العربية
كتبت فى الشيت اللى معها بوجيهات من طرف العميل –
خالد بك قالى اتفضل دخلت معاه الورشة تابع حديثه مع بعض العاملين
واثناء ذلك جالى رجل الامن :انت بتعمل ايه هنا ؟؟؟
انا مع المهندس خالد يا سيد .... القى نظرة على المهندس خالد ... وقالى مع المهندس
خالد ؟!!! ... ايوه ... سابنى ومشى .!!!!!
المهندس خالد ... اتفضل يا بشمهندس العربية هتكون على اخر كوريك.
شكرا ياباشا ... روحت للعربية واتعرفت على الفنى اللى هيشتغل فيها
اسمه أحمد ... شاب مهذب وقليل الكلام ... وعرفتوه بنفسى
وابتدى الشغل فى العربية واليكم التفاصيل .......
اول حاجة فك غطاء المحرك البلاستيك
حتى يتمكن من تغير شمعات الاحتراق (البوجيهات) ودى ليها قصة تانية هنتكلم عليها فى اخر الموضوع
اثناء اجراء تلك العمليات انضم لنا مشرف الورشة اسمه "احمد حسن" ايضا (بقينا 3 احمد)ودار بنا
حديث عن البوجيهات البلاتنيوم وان النوعية الموجودة فى السيارة افضل من ناحية
استهلاك الوقود وبعد جدل منى ومنه... قال ان البلاتنيوم هيكون عمره اطول بس استهلاك
البنزين هيكون افضل بالنسبة للنوعية الموجودة بالسيارة عن البلاتنيوم - والحديث مع
احمد كان ممتع لانه فاهم ... واتكلم عن الكورسات اللى بياخدها الفنينين والمهندسين من الشركة الام وهى
كورسات متدرجة يستلزم النجاح فيها لمتابعة الكورس الذى يليه حتى درجة تسمى الماستر وانه على مدار فترة عمل
تصل الى 25 سنة فى توكيلات عديدة منها توكيل فورد وان نمط شركة كيا فى الاهتمام
"بالاستاف" ممتاز ... الخ - والحقيقة الحديث معاه شغلنى عن التصوير شوية - عذرا
بعد ذلك نأتى لمرحلة تغير الزيت والفلتر - رفع السيارة لتفريغ الزيت
بعد فك فلتر الزيت
اثناء تفريغ الزيت تم تربيط العفشة
يشير لمكان الانبعاج البسيط فى الشداد
احمد حسن اكتشف اعوجاج بسيط فى الشداد الخلفى نتيجة مطب او مقب او حجر
من شورعنا الجميلة والنظيفة والمتطورة :dzey:
وانه يجب تغيره علشان ما "يبوظشى" الزاويا الخلفية وبتالى تأكل الكوتش الخلفى ..!!!!!
المرحلة التالية تم خفض السيارة بالكوريك لمستوى الاطارات فك الاربع اطارات بواسطة الدريل
الطنبورة الامامية وديسك الفرامل
تعليق الدرم الخلفى بالعكس تمهيدا للتنظيف بالهواء المضغوط
طبعا كشف على التيل الامامى وقالى انه "خلاصان" ولازم يتغير ....
الحقيقة انا شايف ان "سمكه" معقول وممكن يقعد فترة كمان فرفضت تغيره خاصة انى عامل 20,000 كم فقط
طبعا أحمد حسن قعد يكلمنى على الامان واننا يجب ان لا نتهاون فى تغير التيل وانه خلص علشان استخدامى
للفرامل كتير وخاصة انها اتوماتيك وان فيه ناس بتغير على ال15,000
فبرضه رفضت . فكتب فى الشيت - رفض العميل التغير
تابع باقى شغله من رجلاش الفرمل الخلفية وتنظيفها بالهواء المضغوط – ثم ربط
العجل والربط بأستخدام مفتاح العجل وليس بالدريل مثل الفك .... واحمد قال انها
تعليمات المهندس خالد لان الدريل ممكن يتلف صواميل ربط الاطارات.
بعد كده ركب فلتر الزيت وطبة الكرتيرة ونزل الكوريك .... وعبىء الزيت وزود مياه تبريد ومساحات
بعد كده رش الموتور بالفوم وقفل الكبوت .... شغل كل الانوار وشيك عليها وبعدين خرج بالعربية خارج الورشة
فى الاثناء دى كنت متابع الحديث مع احمد حسن وفجأة اكتشفت انه بيغسل الفوم بالماء فى ساحة غسيل السيارات
طبعا انا لو عارف كده كنت رفضت اغسل بالفوم :dontudear: - بس انا مطمن نسبيا انه
غسيل بواسطة التوكيل ...
رجع بالعربية لمنطقة الصيانة جفف المحرك بالهواء المضغوط وركب فلتر الهواء الجديد
راجع على شيت الاستقبال مالاقش اعمال كهرباء فقط اعمال سورجى ... كرسى السائق بيزيق
شكرت الرجالة على تعبهم و وقتهم ... وسيبت العربية لمتابعة اعمال السروجى
وتوجهت للمهندس خالد فى مكتبه
وشكرته على اعطائى الفرصة للتواجد داخل الورشة ....
ودار بينا حديث حول سعر الصيانة ليه 800 جنيه هو قال لاء مش كده الرقم وجاب
قايمة اسعار الصيانات وحسبنها وطلعت تقريبا 555 جندى بدون ضريبة المبيعات
واتكلمنا على تيل الفرامل الامامى واهمية تغيره ....
وقال انه من الافضل تغيره بالمرة والعربية لسه جوه الورشة ... فخرجت لموظف قطع
الغيار قال انه ب 370 + ضريبة المبيعات يوصل لـ 405 جندى
اتصلت بالجندى وسئلته على تيل الفرمل للعربية قال ان عنده 3 انواع ب 80 و90 والاورجينال 225 جندى
فخدت قرار انى اجيبه من عنده بس بعد فترة رجعت للمهندس خالد لقيته امر بصرفه والشباب بيركبوه فى الورشة
وانى بس اروح ادفع ( ادبست يا ابو حميد :khd:) ما كنش ادامى غير ان اشكر الراجل على جهده واهتمامه خاصة
انه لازم يمشى بدرى وكان مهتم انه يخلص كل حاجة بنفسه وكمان كان عامل معيا
واجب جامد انه شال حساب الزيت والمصنعيات وفقط دفعت اثمان الفلاتر
وتكلمنا فى موضوع العفشة التى تصدر صوت وخاصة فى الصباح قالى هخلى احمد
حسن يجربها ولو فيها حاجة هنغير المساعدين واستدعى احمد و وصاه يشوف
الموضوع وو صى احد الرجال بمتابعة عملية الغسيل
واستأذن انه يمشى شكرته بشدة على كرمه واتاحته تلك الفرصة لنايل موتورز
واحب اقول له جزاك الله كل خير يا باش مهندس خالد وانت بالفعل نجم نجوم كيا وتأخذ على عاتقك اشياء
كثيرة جدا ويتبقى العامل البشرى لباقى افراد التوكيل منهم من يحب عمله ويجيده
ويراعى ضميره ومنهم من يعمل فقط فى اطار من المراقبة الصارمة فيتهاون فى عمله
بمجرد تخفيف تلك الرقابة
تحياتى الشخصية وتحيات نايل موتورز لشخصك الكريم وتمنياتى بدوام الرقى وان اشاء
الله نبارك لك على قيادة توكيل اعلى مرسيدس ولا بى ام دابليو
نرجع لمتابعة اليوم التوكيل بره فى الوقت ده زحام غير عادى قابلت احمد حسن وسئلته ايه اخبار العفشة ....
أجابنى على استعجال دلوقتى هنشوفها ... وسابنى ومشى ولحد الان ما شفتوش :ma:
عملت جولة داخل صالة العرض قتلا للوقت ونتيجة الجولة هتلاوقها فى اخر الموضوع ...
قابلت الرجل اللى خالد بك وصاه على غسيل العربية وسئلته ايه الاخبار ؟ قالى فى الغسيل وهتطلع على طول ( الراجل مبتسم وبشوش)
ذهبت لمنطقة الغسيل لقيت صديقنا بتاع الامن ... :policeman: رايح فين يا استاذ ؟؟!! رايح اشوف العربية فى الغسيل ...هو ماينفعش
ياسيدى ينفع.. ما انا كنت مع م/خالد الصبح وسئلتنى .... هو : مش انا ..يمكن حد
تانى ...يا سيدى انت مش انت قابلتنى فى الورشة الصبح؟
هو: اه صحيح ... ماشى اتفضل ... اتفضلت ... لقيت العربية لسه فى الدور انتظرت
حوالى 20 دقيقة ورحت لقيتهم بيجففوها .....
واخيرا خرجت خدت العربية ولقيت انهم
حطين قطع الغيار المستبدلة فى اكياس بيضاء البوجيهات وفلتر الهواء وتيل الفرامل
وتيل الفرامل سمكه معقول جدا وفى تقديرى الشخصى انه كان يكفى 10,000 كم
كمان ...!!!! بصراحة أضيقت :120146b .
المهم , طلعت كتيب الضمان علشان اختم
صيانة العشرين ... مهندس على كونتر الختم معاه اكثر من عميل انتظرت لما انتهى
منهم قولتله من فضلك ممكن اختم كتيب الضمان ؟...هو بزهق ...المهندس اللى استفبل
العربية هو اللى يختمهولك ...انا ... شكرا
دورت على المهندسة ولقيتها ... ممكن اختم الضمان؟هى : دفعت ؟؟؟ ايوه ختمت الضمان
وادتهولى بدون كلمة واحدة :fdsa:
-------------------
خدت العربية ومشيت وهنا بقى لينا حكاية
ده مش سحب عربيتى ولا تسارع الاكسلاتير اللى انا متعود عليه ولسه جاى بيه الصبح ايه الحكاية ؟؟؟؟
هو ده اداء البوجيهات البلاتنيوم ؟؟؟ ولا الناس لما ركبوه التيل قافش ولا ايه؟؟
كنت مستعجل وعاوز اروح الشغل ومش ممكن ارجع التوكيل وخصوصا ان خالد بك
مشى يعنى محدش هيعبرنى وخصوصا فى الزحام الشديد
بعدين فى الطريق محتاج اضرب كلاكس ... مافيش .... احاول تانى مافيش ... :H_angry[1]:
اتعكننت .. من تيل الفرامل اللى اتغير والكلاكس اللى قطع وكمان سحب العربية اللى مش هو
بعد نهاية يوم العمل قلت اشوف موضوع الكلاكس الفيوز سليم ...
صوت الكتاوت بتاع الكلاكس بيتكتك وشغال ممكن يكون ايه ؟؟؟؟!!! :U_thin1[1]:
مافضلش غير الكلاكس فكيته و حطيت الفردة الاخرى الموجودة معى " لو فاكرين موضوع اضافة كلاكس للسيراتو "
الكلاكس اشتغل والفردة الاصلية قطعت ( اداى اول اضرار الغسيل بالماء) :120146b
تانى يوم عملت بحث عن البوجيهات البلاتنيوم اللى انا اشتريتها وهل هى المكافىء
للبوجيهات المنزوعة من العربية اكتشفت انها مش هى وان اللى معايا تتميز بطول
"الانود" الطرف الموجب وان الاخرى لاء ....
المهم طبعا علشان الشغل فضلت ماشى كده بالعربية 3 ايام من العكننة وتسارع خانق
روحت اشتريت مفتاح بوجيهات 16مم وقررت انى ارجع البوجيهات القديمة ولاسيما انها كانت فى حالة ممتازة
فكيت وركبت القدام بس للاسف كانو 3 بس والرابع مش بتاعى التايب مختلف (حطوه فى الشنطة غلط او سهو)
فاضريت انى اركب 3 و واحد من بوجيهات البلاتنيوم وركبت وطلعت اجرب
ايوه كده يا وديع ..... :S_thum1[1]:هى دى عربيتى ....
العربية كانت مخنوقة وفاقت وعليه قررت انى اشترى
نفس التايب ولتسقط فكرة البوجيهات البلاتنيوم والاريدوم ...
ساوفيكم بالاخبار بمجرد التغير.
على هامش صيانة العشرين:
توكيل كيا بداء الضغط عليه يزيد وبالتالى هيبتدى يحزو حزو باقى التوكيلات الا اذا تدارك الموقف
خالد بك فاروق نجم نجوم كيا وحبيب الناس كلها فى نايل موتورز وغير النايل موتورز جزاه الله خيرا هو
و مجموعة من الشباب معاه بيخطوا على خطاه
والباقى مش ممكن مهما عمل المهندس خالد هيعدل فى نمطهم وسلوكهم تجاه العميل
تحياتى ليك يا خالد بك واتمنى ان يحذو حذوه باقى الناس فى المبيعات والاستقبال
تقبل شكرى وشكر نايل موتورز مرة اخرى على هذه الفرصة الرائعة التى لا تتكرر كثيرا فى اماكن اخرى.
على فكرة ياباش مهندس رحت للجندى وشوفت عنده التيل ده ب 225 جنيه هو هو
اللى عند التوكيل ب 400 جنيه ...
نتيجة الجولة داخل التوكيل:
سيارة واحدة كارينز سيارة واحدة بيكانتو والباقى نيو سيراتو
عندهم فئة بالجنط 16 انش شكل الجنط - فى رأى - أجمل من الـ 17 أنش
ظهور الوان جديدة على سيارات التوكيل اللون النحاسى واللون الابيض
اول فئة فى الاتوماتيك بنفس امكانيات المانيول ما فيهاش ايرباج ولا ايه بى اس
ولا جنوط ولا فوج ولا اشارة فى المرايا ولا ضوء توقف خلفى وحتى كاسيت سى دى عادى
وبـ 102,900 (بصراحة خسارة فيها الفلوس).