الموضوع: نيفا 1700 الشكل الجديد 1994

اخ هشام
العربيه عامله كم كيلو وحاله الموتور ايه والمعاينه فين
وبالمناسبه السعر لازم تعيد النظر فيه كتير اوي
مع الشكر

انا مش عارف هيا عاملة كام الف لان عداد مسافات الكيلومتر بايظ لكن عداد السرعة شغال
لكن موتورها خفيف يعنى اعتقد يطلع خمسين او ستين فى المية بس كنت بافكر اعملها طقم شنبر بس الميكانيكى قاللى مش محتاجة لكن هيا الحمد لله ماشية معايا كويس وانا نسيت اقول انى ركبتلها كربراتير 132 2000 وده فرق فيها فرق السما من الارض وعلى فكرة التعديل ده بيعملوه على النيفا بره يعنى بعد ما ركبت الكربراتير كانت التانى مثلا بيجيب سرعة 60 بسرعة جدا لكن برضو ما اقدرش اقارن اوى لانى ما ركبتش نيفا تانية غيرها
لكن الميكانيكى بيقوللى ان حالتها حلوة اوى.
اما بالنسبة للسعر ف هو قابل للتفاوض برضو لكن فى حدود مش كبيرة لان الموديل ده نادر جداااا ومفيش حد عنده زييها تقريبا غير قليل اوى وانا عارف انى مش هاعرف اجيب زييها تانى لكن مضطر ابيعها وهيا اتفصلتلى ب 30 فعلا من اتنين عندهم نيفا برضو بس القديمة بس هما مش بيشترو لكن قالولى ماتقلش عن 30
بالنسبة للمعاينة ف انا ساكن فى وسط البلد قريب اوى من التحرير.

والله يا استاذ عبد البر كلام كويس بس برضه مفيش حد هيشتري النيفا بالسعر ده!! بس دور على حد من اللي بيشتغل في الصحرا (المقاولات او بترول ولا حاجه ) ده ممكن يحتاجها بس مش بالسعر ده
ربنا يوفقك

ربنا يكرمك انا متشكر جدا على ردك واهتمامك
طب رايك انها تساوى فى حدود كام مثلا؟ علما بان الموديل القديم اللى هيا 84 مثلا منغير تكييف بتبقى اعتقد فى حدود 21 او 22 ف انا قولت فرق عشر سنين موديل والتكييف والموتور الاكبر يفرق عنها شوية.
ولكن طبعا متشكر اوى على اهتمامك وردك.

هيا العربية انا اشترتها فى شهر 2 اللى فات ولما رفعتها فى المحطة ما كانوش متاكيدن راشة جوه ولا لا الحوض يعنى
ف انا مش متاكد اذا كانت رشة حوض ولا لا بصراحة
لكن هما قالو حالتها حلوة ومفيهاش اى خبطات او اصلاحات فى الدواخل
اما من بره هيا حالتها كويسة وممكن اصورهالكو لو تحب

ربنا يكرمك يا استاذ مرسى بالعكس رد حضرتك هو اللى يدل ان حضرتك انسان محترم جدا وعلى خلق اوى و ذوق جدا كمان وبجد متشكر جدا على ردك الجميل ده وفرق معايا كتير والله
ربنا يكرمك.
وبالمناسبة بقى انا عاوز اخد رايك فى الموضوع انا كان عندى قبل ما اتجوز (عربية والدى اساسا يعنى)
ستروين ax واول ما اتجوزت جبت النيفا على اساس النيفا تبقى ليا انا ومراتى والستروين لوالدى ووالدتى واخويا الصغير (13 سنة) لكن بعد التجربة ابويا ما بقاش يحب يسوق ف بقينا نركب كلنا فى عربية واحدة
ف الستروين صغيرة علينا اوى (مع انى بحب العربية دى جداااا) والنيفا بحبها اوى برضو لكن مش مناسبة عشان والدى ووالدتى. فقررنا نبيعهم الاتنين ونجيب عربية واحدة كبيرة والحمد لله بعت الستروين وباقى النيفا وكنا بنفكر فى النوبيرا لكن ماجربتهاش قبل كده اوى يادوب ركبتها مسافة كيلو واحد بس وماسوقتهاش. انا بتكلم فى حدود مبلغ 50 او بالكتير 55 الف.
الاختيار التانى شاهين 1600.
الاختيار التالت انى اجيب ستروين zx فى حدود 26 الى 30 واغيرلها الموتور واحط بقيت الفلوس فى البنك.
ف يا ترى ايه رايك؟؟

ومتشكر كمان مرة على ردك الذوق ده واسف انى طولت عليك.