الموضوع: ((((أسئلة انترفيوهات الخطوبة قواعد و شروط )))))

المشاركة الأصلية كتبت بواسطة nakkash

اسمحيلى سيادتك إنى أرد عليكى و بمنتهى الحيادية
أولا : حضرتك بتقولى إن من الإسلام إن العريس هو اللى يتحمل كافة نفقات تجهيز مكان الزوجية وان فى الزمن ده بقى فى ظلم على البنت وأهلها عشان بيتحملوا جزء من المصاريف وإن المهر بيكون هدية من العريس للعروسة لكن حاليا أبو العروسة بياخد المهر عشان يكمل عليه عشان الجهاز .
أنا متفق معاكى تماما فى إن الإسلام الزم الزوج بتجهيز منزل الزوجية ولكن فى حدود إمكاناته يعنى المفروض لو حبينا ناخد حاجة من الدين ناخدها كلها على بعضها مش ناخد اللى على مزاجنا ونسيب الباقى على طريقة ولا تقربوا الصلاة , الإسلام فعلا الزم الزوج بتدبير منزل الزوجية لكنه ما فرضش عليه انه يكون فى مكان معين ومساحة معينة ومستوى تشطيب معين ويكون العفش من امريكان فيرنتشر و يكون فى تليفون وتليفزيون ومايكروويف وتكييف ...... الخ وخدامة فلبينية ؟
مغالاة الأهل فى طلباتهم هى اللى بتخلى الموضوع شبه مستحيل وموضوع المهر اللى ابو العروسة بياخده عشان يكمل عليه فده كان ايام جدتى وجدتك كان العريس بيدفع مبلغ والد العروسة بيحدده وبيكون هو المسئول عن تجهيزات الشقة وموضوع ان المهر هدية للعروسة فأحب اوضح نقطة مهمة بتختلط على ناس كتير فى مفهوم الدين المهر هو صداق المرآة ولا يصح العقد بدونه وقد يكون مسمى أو غير مسمى وتستحقه المرآة فى حالات معينة لسنا فى مجال ذكرها الأن لكن فى عصرنا هذا المهر أصبح غير الصداق اللى بقى اسمه المؤخر فلازم تجيب شبكة بكذا عشان هى مش اقل من بنت عمها وبنت خالتها وبنت عم عبده البقال (ما اعتقدش انه من الدين فى شئ أن هدية العريس اللى بيجيبها لعروسته تتحدد قيمتها من اهل العروسة ) ونيجى للقايمة اللى طبعا اهل العروسة عايزين يكتبوا فيها كل حاجة حتى العريس نفسه وطبعا مفيش حاجة فى الإسلام اسمها قايمة ولا نايمة لأنه مش من العدل انى اكون شارى الحاجة بفلوسى واتسجن لو بعتها منتها العدل فعلا!!!!!!!!!!

ثانيا : انا متفق معاكى فى إن أى واحد بيتقدم لواحدة فى جواز صالونات لآزم يكون عنده الحد الأدنى من الإمكانيات اللازمة للزواج ولكن ما هو الحد الأدنى المطلوب ؟؟؟؟؟
انا فى مرة رحت مع واحد صاحبى عشان نخطبله واحدة كانت طالبة عنده فى احد الكورسات والبنت زى ما هو قالى ان والدها خريج أزهر وخطيب مسجد تصدقوا اول حاجة والدها المحترم اتكلم فيها إيه؟؟؟
يا بنى قبل ما نتكلم فى اى حاجة ولا نعرف حاجة عنك ولا عن أهلك أو إمكانياتك احنا عندنا شرط عشان نكون على نور عايزين شبكة ب 20000 ج و مؤخر 30000 ج وقايمة ب 150000 ج عشان نكون متفقين من الأول !!!!!!!!!
طب يا حج مش تعرف ظروفى الأول ؟ مناسب ليكم ولا لأ ؟ اهلى كويسين ولا عندكم إعتراض على حاجة ؟
و انا بصراحة كان عندى كلمتين عايز اقولهم بقوله يا حج انا عرفت ان حضرتك خطيب مسجد فين بقى تيسير الزواج وعدم المغالاة فى المهور وإن جاءكم من ترضون دينه وخلقه فزوجوه ؟؟؟
قالى يا بنى الكلام ده بنقوله على المنبر بس !!!!!!! ولا تعليق
فبصراحة مقدرتش اقوله غير حاجة واحدة هو حضرتك عندك بنت للجواز ولا عارضها فى سوق الجوارى ؟
ثالثا : زى ما المفروض ان البنت بتكون عايزة خطيبها يهتم بيها ويجيبلها حاجات كتير عشان يبينلها إزاى هو بيحبها و مهتم بيها ؟
المفروض هى كمان تراعى ربنا فيه و تقف جنبه عشان يخلص المسئوليات الكتير اللى عليه مش يبقى مقياس حبه واهتمامه هو الهدايا اللى بيجيبهالها ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟
و انا عايز اسأل حضرتك سؤال ليه حضرتك معترضة ان العريس يكون عنده قدرة مالية انه يعمل فرح وما يعملهوش ؟ هو ده برده من فروض الإسلام إن الفرح يتعمل فى فندق أو نادى ويتكلف الاف مؤلفة ويبقى الواحد ابتدى حياته الجديدة بمعصية ؟
مش الفلوس دى ممكن يبتدوا بيها حياتهم بلاش ممكن يسافروا يعملوا عمرة وتكون دى أحسن بداية لحياتهم الجديدة أو حتى يسافروا تركيا مثلا يعملوا شهر عسل محترم بدل ما يصرفوا الفلوس فى تفاهات و فى الأخر مهما عمل ما بيعجبش حد.
أسف على الإطالة وبعتذر عن أى حدة ممكن تكون موجودة فى كلامى

حيادية؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟هي فين الحيادية دي؟؟؟ ده انت كل كلامك هجوم!!!!!!!!!!!!!!! بس عموما أنا برضه حرد عليك عشانك و عشان الاخوة اللي مبسوطين أوي بردك لأن واضح انكوا لسة شباب صغير فواخداكوا الجلالة قوي.

أولا: أنا لما قلت ان المفروض ان العريس أسلاميا ملزم انه يجهز بيت للزوجية قلت كمان بالمعقول طبعا. يا ريت تقرا الكلام كويس قبل ما ترد. المعقول ده بقى نسبي اللي انا أشوفه معقول غيري يشوفه قليل و واحد تالت يشوفه مبالغ فيه. يعني متروحش لواحدة أبوها مليونير مثلا و تقول بيغالي في طلباته...مش كدة؟؟

و بعدين موضوع المهر اللي أبو العروسة بيكمل عليه عشان يجيب الجهاز ده واقع أنا شوفته في مليون جوازة....هو فيه عريس هو اللي بيجيب كل العفش؟؟؟ هي حاجة من اتنين يا بيدفع مهر و أبو العروسة يجهز, يا اما بيجهزوا بالنص, ده اللي انا أعرفه و اللي شوفته في في حوالي 10 جوازات على الاقل لناس مقربين ليا.

موضوع الصداق في الاسلام هو هدية خاصة بالعروسة محدش يشاركها فيها سواء اهلها او جوزها و بيتقسم لمقدم و مؤخر او يكون كله مؤخر. طيب هو فيه عروسة بتاخد الصداق ده؟؟؟؟؟ حتى المؤخر حضرتك تعرف انه ده دين على الزوج لمراته المفروض يسدده لما يتوفر معاه و لو مات المفروض تاخده الأول قبل تقسيم التركة؟ فيه واحد بيدفع لمراته مؤخرها و لا كله بيستنى لما يطلقوا و بعدين يقولها روحي خديه بالمحكمة؟؟

بالنسبة لموضوع القايمة ده انا عمري ما أقتنعت بيه و لا أبويا كتب قايمة و لا على جوزي و لا على ازواج اخواتي الاتنين.

ثانيا: موضوع الحد الأدنى لأمكانيات الراجل لما يروح يتجوز جواز صالونات ده زي ما قلت قبل كدة نسبي. بس على الأقل لازم يكون عنده تصور هو حيعمل ايه في موضوع البيت و الجهاز و الحاجات دي و يعرض عليهم امكانياته بمنتهى الوضوح. موضوع انهم يقبلوا أو يرفضوا ده راجع للعروسة و أهلها و انا مش شايفة ان أي حد ليه الحق انه ينتقد اختيارهم لو رفضوا حتى لو السبب الماديات. كل واحد في الأخر مسئول عن اختياراته و بيتحمل نتيجتها. يعني اللي ترفض واحد أخلاقه كويسة و محترم عشان واحد أقل منه في الشخصية بس أعلى ماديا غلط مية في المية بس هي اللي حتتحمل الغلط ده لأنها هي اللي حتعاشره. زي بالظبط الراجل اللي يشوف واحدة مؤدبة و متدينة و من عيلة محترمة و يفضل عليها واحدة مش على نفس المستوى ده من الأخلاقيات عشان بيضا و عنيها ملونة, و لا ما بيحصلش؟؟؟ اشمعنى بنتهم البنات بالسطحية؟؟

ثالثا: انا مقولتش ان البنت متكونش مهتمة بانها تراعي خطيبها و ماتتقلش عليه, أنا قولت انها لو بتطلب حاجات امكانياته تسمح بيها ممكن يكون من باب العشم و انها عايزاه يبقى بيحاول يسعدها مش من باب الطمع.

و بعدين و اضح ان موضوع الفرح ده مزعل حضرتك قوي. لو أعرف كدة كنت رجعت خمس سنسن لورا عشان معملوش
لأ بجد, بص أنا معاك ان فلوس الفرح فيه مليون حاجة أهم ممكن تتعمل بالفلوس. بس ناس كتير - وأنا منهم - شايفين الفرح ده مرة في العمر و ما يتعوضش. أحنا هنا مش في مجال للنقاش الفرح صح و لا غلط. النقطة الوحيدة اللي كنت أقصد اثيرها و انتوا مفهمتوهاش ان ممكن نفس الأب موقفه يتغير حسب ظروف العريس. يعني لو العريس امكانياته تسمح يطلب منه أكتر من واحد تاني معندوش امكانيات عشان ده الطبيعي ان كل واحد بيعمل حسب امكانياته. وبعدين انا بقولك ان لما والدي طلب من جوز أختي يعمل فرح شاركه في المصاريف, يعني مش موضوع طمع هو بس نفسه يفرح ببنته. و على فكرة أنا أعرف واحد قريبي كان بيتحايل على والده ميعملوش فرح و يديه الفلوس يعمل بيها حاجة تانية و أبوه أصر يعمل الفرح, يعني هي مش حكاية ولد و بنت.

المشاركة الأصلية كتبت بواسطة dr.amr

مش عارف اقولك ايه بصراحه
الرد ده مفروض يتثبت في الاجتماعي فوق واي حد يقراه قبل مايخطب

المشاركة الأصلية كتبت بواسطة medo_2060

بصراحه كلامك ميتقالش بعده ولا كلمه واحده

المشاركة الأصلية كتبت بواسطة nakkash

يا باشا ربنا يخليك ده مجرد رأى ونتاج تجارب كتير فى المجال ده كله فى الأول بيشترى راجل وبعدين بتتعذب عذاب الهدهد

ربنا يخليك يا شنورى وسلملى عليها كتير قوى وأكيد هجيلك قريب إن شاء الله ومتشكرين يا باشا على الكلام الكبير ده كله

ربنا يكرمك على الكلام الجميل ده ويرزقنا بالزوجة الصالحة اللى تحفظنا وتحافظ علينا ما يكونش كل همها الشقة التمليك والعربية و اللذى منه ...........................

المشاركة الأصلية كتبت بواسطة akramlail

القرضاوي
على الأب بدل من أن يطلب 50 ألف أو 100 ألف كما يُطلب هنا بل ييسر عليه، فالرسول زوج ابنته بأقل الأشياء وتزوج هو بأقل ما يمكن، وسيدنا عمر حاول أن يوقف هذا وقال: لو كان مكرمة في الدنيا أو مثوبة في الآخرة لزوج النبي بناته أو لتزوج نساءه بالمهور الغالية، فأول شيء المفروض أن نيسر في هذا، فعلى الآباء ألا يطلبوا هذه المبالغ، وبعض الناس فعلاً تريد أن تأخذ من مال المهر، والمهر في الأصل هو حق الفتاة وحق الزوجة، الله تعالى يقول: (وآتوا النساء صدقاتهن نحلة)، فالمهر من حق المرأة، والأب غير محتاج إلى شيء، من الممكن لو كان محتاجاً أن يأخذ منه ولكن الأصل أنه حق للمرأة (وآتوا النساء صدقاتهن نحلة) يعني عطية ومودة (فإن طبن لكم عن شيء منه نفساً فكلوه هنيئاً مريئاً).

المشاركة الأصلية كتبت بواسطة akramlail

اظن كلام الشيخ القرضاوى واضح
يا اخت hh اقرى كويس وانت تتاكدى

يا أستاذ أكرم هو أنا قلت ايه يناقض الكلام ده؟؟؟ ما هو أنا قلت الراجل هو اللي ملزم بالمصاريف بالمعقووووووووووووووول. المعقول ده محدش يقدر يحدده, كل حسب مقدرته. و كل مستوى اجتماعي بيشوف المعقول ده بشكل مختلف.

بصوا يا شباب, انا حاسة ان انا كلامي كلوا بيتفسر بشكل غير اللي انا عايزاه. أنا بس مش عايزاكوا تكونوا متحاملين على البنات أو شايفين الدنيا كلها وحشة و الناس زي بعضها. زي ما فعلا فيه ناس همها الأول و الاخير المادة, فيه ناس كتير بتفكر غير كدة.

أنا لما أتجوزت اتجوزت في شقة ايجار جديد, و أبويا مخدش مهر من جوزي, هو قاله انت تجهز نص الشقة و احنا النص التاني, و حتى الشبكة جوزي قال له انا حجيب شبكة بكذا ماتناقش معاه, و ربنا اللي يعلم ان قيمة الشبكة دي أقل من نص المتعارف عليه عندنا و أقل من أقل واحدة في قرايبي و معارفي, بس عندي بالدنيا كلها. و موضوع القايمة ده زي ما قلت احنا معندناش حاجة اسمها قايمة. و بالنسبة للفرح اللي انتوا زعلانين ان انا أصريت اعمله, فأحب اقولكوا ان ده حلم أي بنت الفرح و الطرحة و الفستان الأبيض, بس انا عملت فرح صغير على قدنا, و حتى تكاليفه انا عملت جمعية من مرتبي و اديتها لجوزي عشان نعمل بيها الفرح, يعني ما حملتوش فوق طاقته زي ما أنتوا فاكرين. و الحمد لله احنا انهارة بعد خمس سنين جواز ربنا سبحانه و تعالى كرمنا فوق ما كنا نتخيل, و بقى عندنا شقة تمليك و عربيتين و دخلنا اتضاعف خمس مرات - بسم الله ما شاء الله - يعني ربنا سبحانه و تعالى عوضنا خير عشان رضينا بقليله.

حيادية؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟هي فين الحيادية دي؟؟؟ ده انت كل كلامكهجوم!!!!!!!!!!!!!!! بس عموما أنا برضه حرد عليك عشانك و عشان الاخوة اللي مبسوطينأوي بردك لأن واضح انكوا لسة شباب صغير فواخداكوا الجلالة قوي.

إسمحيلى أرد على حضرتك فى البداية إنى إعتذرت فى نهاية كلامى عن أى حدة ممكن تكون موجودة فى ردى على كلام حضرتك والأخوة اللى حضرتك بتقولى عليهم انهم مبسوطين وبيصقفوا عشان قولتلهم كلمتين عجبوهم ما اعتقدش انهم لسه اطفال صغيرين وواخداهم حماسة الشباب وبما انى ما اعرفش سنهم فعليا فكل اللى هقدر اتكلم عليه هو انا والأستاذ محمد شنورى انا عمرى 30 سنة والأستاذ شنورى عمره 32 سنة معرفش ده فى عرف حضرتك نبقى شباب صغير وراكب الموجة وواخدانا الجلالة قوى ولا إيه بس كل اللى اقدر اقوله لحضرتك انى ما بقولش راى مبنى على حكاوى القهاوى أو كتاب الف ليلة وليلة لأ ده من خلال مشاهدات وتجارب كتير من أصدقائى وقرايبى اللى اتجوزا أو حاولوا مجرد محاولة انهم يتقدموا لواحدة .

أولا: أنالما قلت ان المفروض ان العريس أسلاميا ملزم انه يجهز بيت للزوجية قلت كمان بالمعقولطبعا. يا ريت تقرا الكلام كويس قبل ما ترد. المعقول ده بقى نسبي اللي انا أشوفهمعقول غيري يشوفه قليل و واحد تالت يشوفه مبالغ فيه. يعني متروحش لواحدة أبوهامليونير مثلا و تقول بيغالي في طلباته...مش كدة؟؟


وهو لما واحد حضرتك بتقولى عنده الحد الأدنى من الإمكانيات يروح يتقدم لبنت أهلها من طبقتنا أو كمان اقل مننا فى المستوى المادى ويفاجأ عايزن شبكة ب 20000 ج وعشان خاطرك هنخليهم 15000 ج بس والعفش كله عليك والموخر 30000 ج ده عشان انت راجل محترم بس فى حاجة الشقة التمليك بتاعتك بعيدة عننا والبنت لازم تكون قريبة من مامتها عشان مامتها تعبانة ولازم البنت تراعيها فلازم تبيع الشقة بتاعتك وتيجى تاخد شقة جنبنا عشان البنت تروح شغلها وترجع على البيت تراعى والدتها وبعد كده لو فى وقت ممكن تبقى تروحلك شوية واهو كله بثوابه
ده نموذج من النماذج الكتير اللى الواحد بيشوفها كل يوم وبصراحة ببقى مستغرب ليه التناكة دى امال لو هتقدم لبنت رئيس الوزراء هيطلب منى إيه عقد لولى وحصان بجناحين و3 تفاحات دهب وساعتها يبقى حقه .

و بعدين موضوع المهر الليأبو العروسة بيكمل عليه عشان يجيب الجهاز ده واقع أنا شوفته في مليون جوازة....هوفيه عريس هو اللي بيجيب كل العفش؟؟؟ هي حاجة من اتنين يا بيدفع مهر و أبو العروسةيجهز, يا اما بيجهزوا بالنص, ده اللي انا أعرفه و اللي شوفته في في حوالي 10 جوازاتعلى الاقل لناس مقربين ليا.


موضوع المهر ده بصراحة ما سمعتش ان فى ناس بتعمله من ايام ما والدى الله يرحمه اتجوز والدتى لكن انا شفت فوق ال 30 جوازة ما شفتش حد لسه بيدفه مهر عشان الجهاز وعامة ممكن يكون ده عرف العيلة عند حضرتك .

موضوع الصداق في الاسلام هو هدية خاصة بالعروسةمحدش يشاركها فيها سواء اهلها او جوزها و بيتقسم لمقدم و مؤخر او يكون كله مؤخر. طيب هو فيه عروسة بتاخد الصداق ده؟؟؟؟؟ حتى المؤخر حضرتك تعرف انه ده دين على الزوجلمراته المفروض يسدده لما يتوفر معاه و لو مات المفروض تاخده الأول قبل تقسيمالتركة؟ فيه واحد بيدفع لمراته مؤخرها و لا كله بيستنى لما يطلقوا و بعدين يقولهاروحي خديه بالمحكمة؟؟

والله لوحضرتك قريتى كويس اللى انا كاتبه كنتى هتعرفى انى قلت إن صداق المرآة اللى احنا بنسميه دلوقت المؤخر واجب على الزوج ولا يصح العقد بدونه وان المرآة تستحقه فى حالات لسنا فى مجال ذكرها لكن لو حضرتك تحبى إنتى والأخوة انى أعملكم دراسة عن النكاح فى الإسلام وما يتعلق به من أحكام وأنواع النكاح الفاسد وأحكام الصداق ومتى تستحق المرآة الصداق كله ومتى تستحق نصف الصداق ومتى لا تستحق أى شئ من الصداق وانواع الطلاق والفرق بين الخلع والظهار والطلاق البدعى والطلاق السنى والطلاق الرجعى والطلاق البائن والطلاق البائن بينونة ضغرى والطلاق البائن بينونة كبرى انا ما عنديش مانع زى ما عملت موضوع قبل كده عن علامات الساعة واكيد انا عارف كويس ان صداق المرآة من حقها لوحدها وما حدش يشاركها فيه لا اب ولا ام ولا أخ ولا أى حد هو من حقها لوحدها و يحق للمرآة ان تحصل على صداقها فى حياة الزوج أو من تركة الزوج بعد وفاته وإذا لم يدفع الصداق ولم تسامح الزوجة فيه يحبس الزوج عن دخول الجنة ولو كان شهيدا .



بالنسبة لموضوع القايمة ده انا عمري ما أقتنعت بيه ولا أبويا كتب قايمة و لا على جوزي و لا على ازواج اخواتي الاتنين.


والله دى حاجة كويسة وربنا يبارك لوالدك ولحضرتك ولأخواتك

ثانيا: موضوع الحد الأدنى لأمكانيات الراجل لما يروح يتجوز جواز صالونات ده زي ما قلت قبلكدة نسبي. بس على الأقل لازم يكون عنده تصور هو حيعمل ايه في موضوع البيت و الجهازو الحاجات دي و يعرض عليهم امكانياته بمنتهى الوضوح. موضوع انهم يقبلوا أو يرفضواده راجع للعروسة و أهلها و انا مش شايفة ان أي حد ليه الحق انه ينتقد اختيارهم لورفضوا حتى لو السبب الماديات. كل واحد في الأخر مسئول عن اختياراته و بيتحملنتيجتها. يعني اللي ترفض واحد أخلاقه كويسة و محترم عشان واحد أقل منه في الشخصيةبس أعلى ماديا غلط مية في المية بس هي اللي حتتحمل الغلط ده لأنها هي اللي حتعاشره. زي بالظبط الراجل اللي يشوف واحدة مؤدبة و متدينة و من عيلة محترمة و يفضل عليهاواحدة مش على نفس المستوى ده من الأخلاقيات عشان بيضا و عنيها ملونة, و لا مابيحصلش؟؟؟ اشمعنى بنتهم البنات بالسطحية؟؟

أنا هقول لسيادتك حاجة واحدة أعتقد إننا كلنا من طبقة متقاربة المستوى مفيش إختلافات مادية كبيرة قوى ما بينا يعنى المفروض تكون الإمكانيات المطلوبة متقاربة فلما العريس اللى لازم فى رأى انه يكون على الأقل عنده شقة وعنده وظيفة بدخل يساعده على أنه يقدر يصرف على البيت ومعاه مبلغ يخليه يقدر يقوم بإحتياجات تأثيث الشقة الأساسية اعتقد كده انه معاه الحد الأدنى اللى يخليه يقدر يتقدم لواحدة من نفس المستوى أو أقل منه لكن غير كده يبقى بيهرج واحد ما بيشتغلش وما معهوش شقة او حتى مش شايل فلوسها ورايح يتجوز صالونات يبقى بيهزر لكن لما يبقى معاه كل ده ويكون ابن ناس ومحترم ويلاقى طلبات غريبة ومبالغ فيها صدقينى انا واحد من الناس بالرغم من إنى الحمد لله اقدر البى الطلبات دى لكن برفض الموضوع من أساسه لأن ده جواز يعنى مودة ورحمة مش استغلال وخلاص.
انا فى واحد زميلى رشحلى بنت جارته وقالى ان اهلها محترمين وكويسين وقعد يقول فيهم قصايد وقالى انه كان عايز يجوزها لأبن خاله لكنهم رفضوا عشان ليهم شوية شروك مقدرش يوفرها فبقوله ايه يعنى ؟
قالى أولا عايزين شقة تمليك ما تقلش عن 150 م ولسه هيقول ثانيا قولتله شكرا الموضوع انتهى طب وليه يا احمد ما انا عارف انت انت عندك شقتك وتمليك وما شاء الله كبيرة قولتله دول مش عايزين عريس دول عايزين واحد ييجى يشترى وانا ما بشتريش جارية انا عايز زوجة ممكن تكونى شايفانى غلط لكن هى دى طريقة تفكيرى وما اعتقدش انها طريقتى لواحدى لأن عندى أكتر من حد بنفس ظروفى وعندهم نفس المشكلة ؟؟؟


ثالثا: انا مقولتش ان البنتمتكونش مهتمة بانها تراعي خطيبها و ماتتقلش عليه, أنا قولت انها لو بتطلب حاجاتامكانياته تسمح بيهاممكن يكون من باب العشم و انها عايزاه يبقىبيحاول يسعدها مش من باب الطمع.

أى بنت لو حسست خطيبها انها بتخاف عليه وعلى مصلحته وبتحبه عشانه هو مش عشان اللى معاه لو قدر يجيبلها حتة من السما مش هيتأخر

و بعدين و اضح ان موضوع الفرح ده مزعلحضرتك قوي. لو أعرف كدة كنت رجعت خمس سنسن لورا عشان معملوش
لأ بجد, بصأنا معاك ان فلوس الفرح فيه مليون حاجة أهم ممكن تتعمل بالفلوس. بس ناس كتير - وأنامنهم - شايفين الفرح ده مرة في العمر و ما يتعوضش. أحنا هنا مش في مجال للنقاشالفرح صح و لا غلط. النقطة الوحيدة اللي كنت أقصد اثيرها و انتوا مفهمتوهاش ان ممكننفس الأب موقفه يتغير حسب ظروف العريس. يعني لو العريس امكانياته تسمح يطلب منهأكتر من واحد تاني معندوش امكانيات عشان ده الطبيعي ان كل واحد بيعمل حسبامكانياته. وبعدين انا بقولك ان لما والدي طلب من جوز أختي يعمل فرح شاركه فيالمصاريف, يعني مش موضوع طمع هو بس نفسه يفرح ببنته. و على فكرة أنا أعرف واحدقريبي كان بيتحايل على والده ميعملوش فرح و يديه الفلوس يعمل بيها حاجة تانية وأبوه أصر يعمل الفرح, يعني هي مش حكاية ولد و بنت

موضوع الفرح ده موضوع نسبى والله ما بيفرق معايا فى حاجة حضرتك عايزة تعملى فرح وجوزك موافق يبقى ربنا يباركلكم لكن انا شايف بصراحة إن حرام الواحد يدفع فى اول حياته 10000 او 15000 ج عشان يشارك والد العروسة فى فرح محترم عشان الناس تنبسط والعروسة تنبسط لكن فى حاجات بسيطة بتتعمل وتفرح الإتنين من غير تكاليف مبالغ فيها وعامة هو موضوع بالإتفاق وربنا يبارك لكل إتنين ناويين يتجوزا وعايزين يرضوا ربنا ويتملهم على خير سواء عملوا فرح أو ما عملوش وربنا يباركلك فى زوجك وفى بيتك و يرزقكم كمان وكمان بس ما تبقيش تقولى الكلام ده قدام اى حد عشان فى ناس ما بترحمش وعينيها ما بتهزرش ربنا يكرمكم بالخير دايما ويزيدكم من نعيمه وخيراته ويبعد عنكم عنين الناس و صدقينى طعم الحاجات دى لما بتيجى بعد تعب بيبقى احلى كتير ما الواحد يلاقيها على الجاهز عشان يعرف يحافظ عليها .
والإختلاف فى الرأى لا يفسد للود قضية .

أه نسيت أسال حضرتك على حاجة مهمة ما عندكيش عروسة حلوة ليا انا والواد شنورى عشان والدته ووالدتى يرتاحو ويبطلوا يتكلموا معانا فى الموضوع ده؟؟؟؟