الموضوع: ((((أسئلة انترفيوهات الخطوبة قواعد و شروط )))))

المشاركة الأصلية كتبت بواسطة akramlail

بعد كل دة وتقول مش ماديات !! انت اتكلمتى على حاجة غير الماديات ومين قال ان فى الاسلام العريس علية كل حاجة وتطلع اية كل حاجة دى ؟؟

أولا موضوع ان في الاسلام المرأة معلهاش اي التزامات مادية في الزواج دي مفروغ منها, و يا ريت تسأل و انت تتأكد. طبعا ده مش معناه انها تغالى في الطلبات خالص لكن العريس هو الي ملزم يجهز بيت الزوجية و يدفعلها مهر يكون بمثابة هدية ليها تقدر حسب الحالة الاجتماعية و المادية للطرفين.

بالنسة لكلامي حضرتك بتقول انه كله ماديات. انا بحاول أوضح ان ساعات العروسة يتطلب حاجات عشان شايفة ان العريس يقدر ماديا انه يلبي الطلبات دي, مش شرط يكون طمع لكن لما يكون قادر من حقها يجبلها الحاجات اللي هي عايزاها بالمعقول طبعا, لأنها بتقيس على ده تصرفه معاها بعد الجواز و اذا كان حيحاول يريحها و لا حيكون من النوع اللي يستخصر.

بالنسبة للمثال اللي انا قولته واضح انه اتفهم غلط خالص, انا بقول ان والدي كان تقريبا بيتحايل على جوزي ميعملش فرح عشان يوفر المصاريف, يبقى كدة مادي؟؟؟ انما بالنسبة لجوز أختي هو فعلا كان عنده القدرة المادية انه يعمل فرح و كمان لما والدي أصر على الفرح قال له انه يعمل الفرح الي امكانياته تسمح بيه يعني ماشترطش عليه مستوى معين زي ما ناس كتير بتعمل, و كمان شارك معاه في مصاريف الفرح ده, فيا ريت قبل ما نتهم الناس بالمادية نقرا الكلام كويس.

أنا كل اللي بحاول أقوله ان الشباب ما يتسرعش و يحكم على البنت بالمادية لمجرد انها ليها طلبات. لكن بصفة عمة انا لوحكيتلك أنا اتجوزت ازاي حتعرف ان فعلا لسة فيه بنات يهمها الراجل نفسه أكتر مليون مرة من الفلوس.

المشاركة الأصلية كتبت بواسطة walidadel

مشاكل اخري زي عدم القدره علي تحمل المسئوليه "مش عايز اشيل هم حد تاني" وواحد يقولك انا كده كويس بروح و باجي براحتي مش عايز حد يقولي كنت فين و مع مين حاجات من دي كتيييير و ممكن عدم الاهليه اصلا و حاسس انه ليسه صغير علي الارتباط و انه يفتح بيت و كده يعني

متفق معاك يا باشا فى كل اللى حضرتك قلته بس فى رأى المتواضع إن أهم مشكلة ممكن تواجهك لو القدرات المالية متوفرة هى إنك تلاقى الإنسانة المناسبة اللى تقدر تكمل معاك المشوار مش يكون كل همها انها تاخد اللى عندك و الجواز بالنسبة لها عبارة عن صفقة انت بتجيبلها اللى هى عايزاه بفلوسك وانت فى المقابل بتاخد منها اللى انت عايزه وللأسف انا شفت ده كتير وسمعته أكتر من بنات كتير عندهم استعداد يتجوزو اللى هيدفع أكتر وكاننا بقينا مرة تانية فى عصر الجوارى .

المشاركة الأصلية كتبت بواسطة hh

أنا بس عايزة اعلق على الكلام بتاع طلبات أهل العروسة لأن ده اللي بيتقال في أي موضوع بيتفتح فيه سيرة الجواز في المنتدى.

أولا طبيعى جدا ان أهل العروسة يكون عندهم طلبات, يعني المهر االلي انتوا بتتكلموا عليه ده المفروض انه يكون هدية للعروسة لكن الواقع ان فلوس المهر ابو العروسة بيكمل عليه عشان يجيب الجهاز, رغم انكوا لو رجعتوا للأسلام الزوج هو اللي ملزم بكل حاجة, يعني احنا في الزمن الحالي بقى فيه ظلم كبير واقع على البنت اللي بقت مطالبة هي و أهلها بمصاريف كتير و تجهيزات رغم ان ده مش من الاسلام لكن ماعتقدش ان فيه أهل بيقولوا لعريس بنتهم انت عليك كلحاجة و احنا مالناش دعوة.
ثانيا طبيعي لما يكون واحد رايح يتقدم لواحدة بطريقة جواز الصالونات انه يكون عنده الحد الأدنى من متطلبات الجواز و الا العروسة و أهلها بيحسوا انه بيستهبل أو طمعان. و الصح انه من البداية يوضح لهم امكانياته كويس عشان ميبقاش ده محل خلاف بعد كدة. و برده لو ما قبلهوش مينفعش نتهمهم بالطمع لأن هو بالنسبالهم عريس زيه زي غيره معندهمش سبب للتمسك بيه.
مش معنى كدة ان المعيار الوحيد هو المادة, بالعكس انا اللي شفته مع كل صاحباتي و قرايبي ان الأغلب ان الواحدة بتتخطب للي بتكون هي و أهلها مستريحنله و متوسمين فيه خير حتى لو مكانش الأفضل ماديا بين خطابها انما اللي أقصده انه مينفعش واحد يروح يتجوز جواز صالونات و هو مش محدد ايه اللي حيعملوا في متطلبات الجواز.

ثالثا لازم الشباب يكونوا فاهمين ان البنت لما بتتخطب بتكون مستنية من خطيبها هي و أهلها انه يعمل أقصى ما في وسعه عشان يجيبلها كل اللي نفسها فيه. المسألة مش مسألة فلوس بس, المسألة ليها علاقة بأحساسها بأهميتها عنده و بيديها انطباع انه بعد الجواز حيبقى كويس معاها و لا حيستخسر فيها. طبعا الكلام ده كل واحد حسب امكانياته. يعنى كمثال أنا لما جيت اتجوز جوزي كان لسة متخرج و في بداية حياته و كانت امكانياته على قده, فأنا والدي كان بينصحه انه ميعملش فرح و يوفر الفلوس لحاجة في البيت, انما هو عمل الفرح عشان أنا كنت حموت و نعمله. لما جت أختى الصغيرة تتجوز جوزها مكنش عايز يعمل فرح عشان شايفها مصاريف ملهاش لازمة انما والدي و والدتي هما اللي أصروا على الفرح و قالولوا انهم عايزين يفرحوا بيها. الفرق بين الموقفين انه جوزها امكانياته كانت تسمح انه يعمل فرح و هو اللي مش عايز فهما تمسكوا برأيهم, انما انا عشان جوزي امكانيته كانت ضعيفة كانوا بيحاولوا يوفروا عليه.

انا أسفة ان أنا طولت عليكوا و خرجت بره الموضوع أنا بس عايزة الشباب ميكونش حاطط في دماغه حكاية ان العروسة و أهلها ماديين دي لأن الموضوع حسب الظروف و فيه ناس كتير كويسة و مش هدفها الأول الماده انما ساعات يبان غير كدة.

اسمحيلى سيادتك إنى أرد عليكى و بمنتهى الحيادية
أولا : حضرتك بتقولى إن من الإسلام إن العريس هو اللى يتحمل كافة نفقات تجهيز مكان الزوجية وان فى الزمن ده بقى فى ظلم على البنت وأهلها عشان بيتحملوا جزء من المصاريف وإن المهر بيكون هدية من العريس للعروسة لكن حاليا أبو العروسة بياخد المهر عشان يكمل عليه عشان الجهاز .
أنا متفق معاكى تماما فى إن الإسلام الزم الزوج بتجهيز منزل الزوجية ولكن فى حدود إمكاناته يعنى المفروض لو حبينا ناخد حاجة من الدين ناخدها كلها على بعضها مش ناخد اللى على مزاجنا ونسيب الباقى على طريقة ولا تقربوا الصلاة , الإسلام فعلا الزم الزوج بتدبير منزل الزوجية لكنه ما فرضش عليه انه يكون فى مكان معين ومساحة معينة ومستوى تشطيب معين ويكون العفش من امريكان فيرنتشر و يكون فى تليفون وتليفزيون ومايكروويف وتكييف ...... الخ وخدامة فلبينية ؟
مغالاة الأهل فى طلباتهم هى اللى بتخلى الموضوع شبه مستحيل وموضوع المهر اللى ابو العروسة بياخده عشان يكمل عليه فده كان ايام جدتى وجدتك كان العريس بيدفع مبلغ والد العروسة بيحدده وبيكون هو المسئول عن تجهيزات الشقة وموضوع ان المهر هدية للعروسة فأحب اوضح نقطة مهمة بتختلط على ناس كتير فى مفهوم الدين المهر هو صداق المرآة ولا يصح العقد بدونه وقد يكون مسمى أو غير مسمى وتستحقه المرآة فى حالات معينة لسنا فى مجال ذكرها الأن لكن فى عصرنا هذا المهر أصبح غير الصداق اللى بقى اسمه المؤخر فلازم تجيب شبكة بكذا عشان هى مش اقل من بنت عمها وبنت خالتها وبنت عم عبده البقال (ما اعتقدش انه من الدين فى شئ أن هدية العريس اللى بيجيبها لعروسته تتحدد قيمتها من اهل العروسة ) ونيجى للقايمة اللى طبعا اهل العروسة عايزين يكتبوا فيها كل حاجة حتى العريس نفسه وطبعا مفيش حاجة فى الإسلام اسمها قايمة ولا نايمة لأنه مش من العدل انى اكون شارى الحاجة بفلوسى واتسجن لو بعتها منتها العدل فعلا!!!!!!!!!!

ثانيا : انا متفق معاكى فى إن أى واحد بيتقدم لواحدة فى جواز صالونات لآزم يكون عنده الحد الأدنى من الإمكانيات اللازمة للزواج ولكن ما هو الحد الأدنى المطلوب ؟؟؟؟؟
انا فى مرة رحت مع واحد صاحبى عشان نخطبله واحدة كانت طالبة عنده فى احد الكورسات والبنت زى ما هو قالى ان والدها خريج أزهر وخطيب مسجد تصدقوا اول حاجة والدها المحترم اتكلم فيها إيه؟؟؟
يا بنى قبل ما نتكلم فى اى حاجة ولا نعرف حاجة عنك ولا عن أهلك أو إمكانياتك احنا عندنا شرط عشان نكون على نور عايزين شبكة ب 20000 ج و مؤخر 30000 ج وقايمة ب 150000 ج عشان نكون متفقين من الأول !!!!!!!!!
طب يا حج مش تعرف ظروفى الأول ؟ مناسب ليكم ولا لأ ؟ اهلى كويسين ولا عندكم إعتراض على حاجة ؟
و انا بصراحة كان عندى كلمتين عايز اقولهم بقوله يا حج انا عرفت ان حضرتك خطيب مسجد فين بقى تيسير الزواج وعدم المغالاة فى المهور وإن جاءكم من ترضون دينه وخلقه فزوجوه ؟؟؟
قالى يا بنى الكلام ده بنقوله على المنبر بس !!!!!!! ولا تعليق
فبصراحة مقدرتش اقوله غير حاجة واحدة هو حضرتك عندك بنت للجواز ولا عارضها فى سوق الجوارى ؟
ثالثا : زى ما المفروض ان البنت بتكون عايزة خطيبها يهتم بيها ويجيبلها حاجات كتير عشان يبينلها إزاى هو بيحبها و مهتم بيها ؟
المفروض هى كمان تراعى ربنا فيه و تقف جنبه عشان يخلص المسئوليات الكتير اللى عليه مش يبقى مقياس حبه واهتمامه هو الهدايا اللى بيجيبهالها ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟
و انا عايز اسأل حضرتك سؤال ليه حضرتك معترضة ان العريس يكون عنده قدرة مالية انه يعمل فرح وما يعملهوش ؟ هو ده برده من فروض الإسلام إن الفرح يتعمل فى فندق أو نادى ويتكلف الاف مؤلفة ويبقى الواحد ابتدى حياته الجديدة بمعصية ؟
مش الفلوس دى ممكن يبتدوا بيها حياتهم بلاش ممكن يسافروا يعملوا عمرة وتكون دى أحسن بداية لحياتهم الجديدة أو حتى يسافروا تركيا مثلا يعملوا شهر عسل محترم بدل ما يصرفوا الفلوس فى تفاهات و فى الأخر مهما عمل ما بيعجبش حد.
أسف على الإطالة وبعتذر عن أى حدة ممكن تكون موجودة فى كلامى

المشاركة الأصلية كتبت بواسطة shnory

بعد مناقشات كتييييييييييييييير في المواضيع دي
فاحسن حاجه
تسيبوها علي الله
كل واحد حياخد نصيبه
والزوجه اللي ربنا اختارهاله في الوقت المحدد له
===================
وعموما من اسباب فشل الخطوبه هو تغيير الاتفاقات بعد الخطوبه
وكل ما تسال واحده فسختي خطوبتك ليه
تقولك
اصله طلع ابن امه
زي ما يكون لازم تكون يتيم علشان تروح تخطب ست الحسن والجمال

حبيب قلبى شنورى ربنا يخليلك الحاجة وقولها أحمد بيقولك كل سنة وانتى طيبة .
بص يا باشا لازم نفرق بين حاجتين إن الواحد يكون بار بأهله دى حاجة ما تزعلش حد أبداا واى حد يقول غير كده يبقى يستاهل ضرب ...........
انما يكون الواحد امعة وما عندوش شخصية وامه هى اللى بتختاره كل حاجة وممشياه بالريموت كنترول فأسمحلى ده ما يبقاش اسمه راجل ابدا . وانا متأكد إنك تقصد الأولانى مش التانى .

المشاركة الأصلية كتبت بواسطة Janno28

لا اسمحلى ياشنورى واسمحولى كلكم فى فرق انه يكون بار بوالديه وتحديدا بوالدته وفى فرق انه يسمع لوالدته بدون اى تفكير وده بيسبب مشاكل كتير وحصل موقف شخصى معايا شخصياً واقسم بالله ان ده مسبب مشاكل للطرفين دلوقتى بتخيل نفسى انى لو كنت مكان البنت دلوقتى اكيد مكنتش حعمر

فياريت نوضح الكلمة بس مش اكتر ومش تلاكيك هى والله عشان والدة الولد فى بعض الاحيان بتتخيل ان ابنها اول مطلع بره بيتها الغيرة بتزيد عليه وازاى ترب وتكبر وواحده تاخده على الجاهز مع احترامى للجميع بس ده بيحصل فعلا ياجماعه

متفق معاكى تماما