افيدونى فى شراء 128 موديل 1984

**aboomar2010** · 17-03-2010 08:58 AM

السلام عليكم اهل المنتدى الكرام ارجو منكم مساعدتى اولا انا ليس لدى اى خبره سابقه بالقياده وكنت اريد سياره مستعمله عشان بهدلة المواصلات خاصة وانا متزوج وعندى طفلان ونصحونى ان ابدا بالسياره 128
زميلى فى العمل اشترى 128 موديل 84 من حوالى شهرين وانا ركبت معاه هى بصراحه واقفه على رجليها فرش نظيف وجنوط سبور وطاره سبور وسماعات جامده جدا
المهم انا عرفت انه احتمال يبعها وانا لسه مكلمتوش عاوز اعرف ايه رايكم وهو كان شاريها بميلغ 16000 وهل السعر ده مناسب ولا لا
افيدونى بالله عليكم لانه ليس لى اى خبره
سؤال اخير انا من سكان المطريه وطبعا مرور السلام قدامى فرصه انى انقل العنوان على الاميريه عشان ابقى تبع مرور الاميريه تفتكروا اعمل كده ولا خلينى زى مانا خصوصا انى حنقل عنوان فقط لكن لنا ساكن فى المطريه
وجزاكم الله عنى خير الجزاء

**kayson** · 17-03-2010 10:54 AM

لو عرفت تخلصها ب15000 ج بس بشرط تكون مش محتاجة مصاريفطبعا اهرب من مرور السلام نصيحة من واحد تبع مرور السلام.

**dondark** · 17-03-2010 11:20 AM

هو السعر ديما متوقف على الحالة
بس حدود 14او 15 معقول جدا لو مفهاش الهوا
وابعد عن السلام
اخوك من المطرية وحامل هم انى لسة هرخص شهر4 وبفكر اصلا اغير البطاقة

**aboomar2010** · 17-03-2010 11:45 AM

انا متشكر جدا لكل اخوتى فى المنتدى انا انشاءالله حكلمه واحاول اتفاوض فى السعر وربنا المستعان مع انى خايف من مشاكلها زى الصيانه والاعطال والزحمه
هل مرور الاميريه فعلا كويس ولا كلهم زى بعض وايه الفرق
وشكرا مره تانيه

**waelms3** · 17-03-2010 12:33 PM

ابعد واهرب عن مرور السلام بصراوحة اوحش مرور فى جمهورية مصر العربية
وعايز يتنسف

**medo980** · 17-03-2010 04:05 PM

انت لو رخصت تبع مرور السلام هتكره العربيه والمرور وانك اتولدت مصرى اساساً لو حالة العربيه كويسه ماشى انما مرور السلام نصيحه لوجه الله بلاش ده انا لو عرضوا عليا ارخص فى السلام او حلايب وشلاتين اروح حلايب وشلاتين احسن

**aboomar2010** · 18-03-2010 08:53 AM

السلام عليكم اهل المنتدى الكرام
انا اتكلمت مع صاحبى امبارح فى موضوع بيع العربيه وقالى انها زى الفل مش محتاجه مصاريف وانه لما جاه يشتريها رفعها وكشف عليها وقالى انها راشه دواخل نضافه وحلفلى نضافه بس ولسه مغير لها زيت ومغير البوجيهات والسيور وانا ركبت معاه فيها امبارح بصراحه حالتها كويسه المهم اتفقت معاه على البيع فى خلال اسبوعين والسعر علشانى 15500 جنيه وده اخرها ..تفتكروا السعر كويس
انا طبعا لما ربنا يسهل واشتريها حتعلم عليها السواقه لحد ما اطلع الرخصه صحيح بمناسبة الرخصه سمعت ان المطريه حتنضم لمرور الاميريه وده بفضل مجهود نائب المطريه محمود مجاهد مش عارف الكلام ده صح ولا غلط ياريت الى يعرف يقولى بدل ما اغير البطاقه على الفاضى
سؤال اخير عاوز اعرف ايه الاجراءات الى بعد شراء العربيه من ورق وتراخيص وايه افضل طريه لتعليم السواقه
معلش انا طولت عليكم لكن عاوز اعرف عشان انا لسه جديد فى الموضوع
وشكرا

**aboomar2010** · 21-03-2010 09:03 AM

[overline]
صباح الخير على اهلى المنتدى
ياريت حد يرد عليه فى موضوع العربيه يكون من اهل الخبره فى الفيات ويقولى اعمل ايه
[/overline]

**dondark** · 21-03-2010 10:46 AM

المشاركة الأصلية كتبت بواسطة aboomar2010

السلام عليكم اهل المنتدى الكرام
انا اتكلمت مع صاحبى امبارح فى موضوع بيع العربيه وقالى انها زى الفل مش محتاجه مصاريف وانه لما جاه يشتريها رفعها وكشف عليها وقالى انها راشه دواخل نضافه وحلفلى نضافه بس ولسه مغير لها زيت ومغير البوجيهات والسيور وانا ركبت معاه فيها امبارح بصراحه حالتها كويسه المهم اتفقت معاه على البيع فى خلال اسبوعين والسعر علشانى 15500 جنيه وده اخرها ..تفتكروا السعر كويس
انا طبعا لما ربنا يسهل واشتريها حتعلم عليها السواقه لحد ما اطلع الرخصه صحيح بمناسبة الرخصه سمعت ان المطريه حتنضم لمرور الاميريه وده بفضل مجهود نائب المطريه محمود مجاهد مش عارف الكلام ده صح ولا غلط ياريت الى يعرف يقولى بدل ما اغير البطاقه على الفاضى
سؤال اخير عاوز اعرف ايه الاجراءات الى بعد شراء العربيه من ورق وتراخيص وايه افضل طريه لتعليم السواقه
معلش انا طولت عليكم لكن عاوز اعرف عشان انا لسه جديد فى الموضوع
وشكرا

بص موضوع رشة نضافة او رشة حلاوة روح
مش بيفرق لانه كل القديم راشش او المعظم
المهم الحاله
15500 كتير بصراحة على موديل 84 بس هنقول تانى الفيصل الحالة ....الحاله فقط لا غير
خدها لميكانيكى واتنين وارفعها وشوفها

انا بحاول اغير البطاقة لاى مكان عشان ابعد عن السلام
دانا رخصة القيادة مطلعها ب500 جنيه بعد 4 مرات ما اروح
منهم مرة روحت وامتحنت وعملنى (غياب)مش راسب لا (غياب)وتاجيل شهر((طلعت الرخصة بعد اسبوعين بس من الشهر دا ب500 جنية))وبالعند فى العقيد وقعت 4 اقماع مع انى ساعتها كنت بعرف اسوق كويس وبسافر بالعربية .......
ياريت يتنقل مرور الاميرية فى اسرع وقت قبل ما اجدد الرخصة بتاعة العربية فى نص 4

الاجراءات ياسيدى
سيبك من موضوع التوكيل والرغى دا
اقرب شهر عقارى وسجل العربية رسمى ....مش عارف التسجيل بياخد كام انا مسجلها فى الاسماعيلية ب 650 تقريبا بس اكيد كل الموديل ماكان اقدم كل ما كان ارخص
بس دا أأمن حاجة

افضل طريقة لتعليم السواقة بقة
وبما انك من المطرية او قريب منها

مساكن ابو غزالة وانطلق فيها مع حد من اصحابك
والحته الى تحت كوبى الطاهره....
يومين تلاته واطلع مدينه نصر لف حوالين سيتى ستارز
قلبك جامد ارمى نفسك فى الحلمية واهو تتعود على الزحمة (فى شارع من ازحم شوارع مصر والقارة السمراء)

الى معاك فى السواقة بقة اسمع كلامه بس مش تاخده قرآن شغل دماغك برضة وخليك ديما فى الاول على اليمين لحد ما تعرف لغه العربيات والشارع

واى حاجة تححت امرك