الموضوع: استفسار فى مواتير المياه

عندى موتور المياه بطقم اتوماتك وظهر عيب انه بيشتغل وبيفصل بعد ما يقوم على طول فجربته من غير الاتوماتك والبلونة لقيت الموتور كويس فكده اكيد العيب فى حاجة من اتنين الاتوماتك او البلونة

المهم فكيت الاتوماتك لقيت سوستنين ليهما ريجلاش عاوز اعرف السوستتين دول بيعملوا ايه و الحل للمشكلة دى ايه


شوف ياهندسه, المسامرين دول و احد بيحدد الضغط اللي الموتور يفصل عنده و المسمار التاني بيحدد الضغط اللي الموتور يشتغل عنده , هذا علي حد علمي و تجربتي

يعني لو حضرتك شوفت فكره عمل الموتور هتلاقي ان وظيفته سحب المياه و ضخها لارتفاع اعلي وفقا لقدرته( طبعا انت حاطط الموتور اسفل العماره) ده لو جبنا الموتور بس بدون بالونه , طيب ايه لازمه البالونه ؟؟ البالونه عباره عن مضخه ايضا بس ساكنه و جواها كيس مطاطي محاط بالغطاء الحديدي الخارجي و الغطاء ده ليه بلف هواء زي عجله العربيه و بيتنفخ بضغط فرده الكاوتش بالضبط وبتوصل لحد 40( علي حسب الدور اللي انت فيه ) , طيب بتشتغل ازاي ؟ لو شوفت الموتور اللي عندك هتلاقي البالونه راكبه علي الموتور بواسطه ماسوره علي شكل حرف( تي ) , و طبعا في عداد الضغط راكب تحتها , اعتبر دلوقتي اننا فصلنا الموتور من الكهرباء و نفخنا البالونه عند ضغط 40 مثلا , هتلاقي ضغط المياه عندك ( بتقراه من عداد الضغط اللي راكب علي الموتور) و ليكن 1.5 بار ده عباره عن ضغط المياه داخل الكيس مجموع عليه ضغط الهواء اللي جوه الكفر الحديدي و طبعا لازم تركب ( مانع تسرب عكسي) (سكس بالف) عشان تعزل ضغط البالونه اللي هو اعلي من ضغط خط المياه الرئيسي و الا تسرب الي خط المياه العمومي , دلوقتي حضرتك لما تفتح حنفيه الخلاط عندك في البيت هتلاقي ضغط المياه اندفع من تحت لحد عندك بقوه ضغط الهواء اللي انت نفخت بيه البالونه في الأول اللي هو 40 , و صلت ؟ يعني انت ممكن تركب بالونه بس بعداد و تستخدمها بدون الموتور الكهربائي !! طيب ايه فايده الموتور ؟ الموتور هو قوه خارجيه لضخ المياه و فايدته ان البالونه لوحدها ادائها مش هيبقي مرضي بمعني انه لو في معدل استهلاك عالي للمياه البالونه هتفضي المياه اللي جواها و مستوي الاندفاع اللي بدأت بيه هيقل لان المياه هتخلص و مش هيلحق ضغط المياه العمومي يعوض فرق المياه اللي انت استهلكته و بالتالي المياه هتضعف و تنقطع , يبقي هنا الموتور لا زم يتدخل و هو الوحيد اللي يقدر بقوته يعوض فرق المياه اللي انت بتسحبه للبالونه و بالتالي يحافظ علي معدل الضغط ثابت اثناء الاستهلاك , و ايضا في حاله عدم استهلاك المياه يعمل علي سرعه امتلاء الكيس المطاطي بالمياه اسرع بكثير لو اعتمدنا علي ضغط المياه بمفرده لتعبئه الكيس . المسؤول اللي بيحدد امتي الموتور يشتغل و امتي يفصل هو الاوتوماتيك و عن طريق المساميراللي ذكرناها قبل كده تقدر تضبط ضغط الفصل و المسمار التاني بيضبط ضغط التشغيل و الموضوع سهل و احنا تحت امرك .

شكرا ليكم انا فعلا فكيت البالونة ولقيتها مليانة مياه وفضيتها وفكيت البلونة الكاوتش لقتها مش مخرومة , بس كده الهواء اتسرب فين ؟؟؟


انا هريح دماغى وهجيب بالونة كاوتش جديدة بس عاوز اعرف احسن نوع اسمه ايه وبكام ؟؟؟

المشاركة الأصلية كتبت بواسطة mesaharaty

حتعمل تجربة صغيرة جدا
إنزل جنب الموتور وخللى حد يجرب يشغل الميه من البيت ولاحظ :-
1- لو سمعت صوت تكتكة الأوتوماتك على فترات متقاربة (5 ثوانى مثلا) يبقى العيب فى الأوتوماتك ويتحل بطريقتين :-
الطريقة الأولى إنك تجيب حد بيفهم فى كهربة المواتير يضبط لك الرجلاش .
الطريقة الثانية والاسهل وإللى أنا بحبها هى إنك تركب أوتوماتك جديد .


2- إذا لاحظت إن الموتور بيشتغل ويفصل على فترات متباعدة (دقيقتين مثلا) يبقى العيب فى السكس بلف ولازم يتغير .

3- إذا لاحظت إن الحنفية بتاعت البيت بتجيب مية زى البخبخة كدة أو لاحظت إن فترات إندفاع المية لما الموتور بيسحب بقت فترات متقاربة يبقى العيب بالونة .

الخلاصة :
طالما إنت نزلت جنب الموتور يبقى بص على البالونة الأأول لأنها الاسهل فى الفك والتركيب وكمان بص على الأوتوماتك والسكس بلف بالمرة .
ولو حتغير بالونة هات الكاوتشة إيطالى ولو حتغير الـCover فيه نوع إيطالى حلو إسمه Elba أنصحك بيه .

والله الموفق