الموضوع: يارب تطلع إشاعة

المشاركة الأصلية كتبت بواسطة dr_smart

احكي يا باشا احكي

بص يا سيد
زمان كدة من حوالي 11 او 12 سنة كان عندي ساعتها 17 سنة او 18 تقريباً
صحيت من النوم بالليل كدة قبل الفجر بشوية و كنت جعان موت
قولت انا انزل اصلي و اجيب اكل من الشارع احسن
المهم نزلت و انا ماشي في اول فيصل عند جامع حمد كدة لقيت شخص شكله مريب قاعد على عربية و بيندهلي
يا كابتن خد اقولك
انا حلقتله اول مرة
راح مككرها تاني
قولته خير يا برنس ( بنفس الاسلوب بتاعه كدة )
قالي عايزك
قولته خير
قالي قرب طيب
ماشي يا نجم اديني قربت
قالي عايز اقولك على حاجة
قولتله قول
قالي انا لسة خارج من الحبس دلوقتي و مش معايا فلوس
قولتله و انا اعمل ايه يعني
قالي بقولك خارج من الحبس و مستعد ادخله تاني علشان خدت عليه و بيتكلم بطريقة اللمبي كدة
طيب يا سيدي انا ايه المطلوب مني
قالي عايز 10 جنيه
قولتله لا و الله ما تلاقيش
راح حاطط ايده على كتفي و عايزني امش معاه في شارع جانبي كدة ( الي هو بين المساكن و فيصل )
قولته انت رايح فين
قالي هنتكلم بس شوية جوة
قولتله هو الباشا مش راجل و واخد على الحبس ما تتكلم هنا و لا النجم مش بيعرف يتكلم غير في الشوراع الجانبية
انا يا معلم ممكن اتكلم معاك في اي حتة هنا او جوة
و حط ايده على الاستك بتاع البنطلون بتاعه و طلع منه ايد سيف او سنجة هي حاجة حديد ( بيهددني يعني )
المهم انا و لا اتحركت و قولتله ما تكمل و لا خايف تطلعه هنا
قولته اخر الكلام الفلوس معايا بس مش هديهالك
عايز بقى تتخانق عايزنا نموت بعض هنا او في شارع جانبي يلا بينا و فارس لفارس
المهم لقيته ابتدى يجر حنين معايا
هو الكابتن منين
قولتله من هنا
و كانــــــــــــــــــــــ ــــت الصدمة لما جه يعرفني بنفسه
قالي انا اخوك ( اشرف عنتر ) الي ساكن ناحية مرور فيصل اكيد سمع الاسم ده ( مسجل خطر سمعته زي الطبل البلدي )
انا قولت في سري يا نهار ازرق اشرف عنتر انا عملت كدة مع اشرف عنتر و لقيت ركبي ابتدت تخبط في بعض بعد ما عرفني على نفسه بس مسكت نفسي و كملت معاه عادي و حسسته اني مش منبهر لما عرفت انه اشرف عنتر
المهم اتعرفنا على بعض و عرفني على مجرمين المنطقة و بقينا نسلم على بعض في الرايحة و الجاية لحد ما اختفوا مرة واحدة من المنطقة
تعرفوا لو كان قالي من الاول انه اشرف عنتر و عايز 10 جنيه
انا كنت ممكن اديله كل الي في جيبي بس يخليني امشي


على فكرة كل الي حصل ده مش اسلوبي اصلاً و لا طريقة كلامي
بس سبحان الله أيه الي خلاني اتصرف كدة و اتكلم كدة
اكيد في حكمة من الي حصل ده
و فعلاً أقتنعت ان الحرامي الي عايز يقلبك بيبقى خايف منك أساساً و شغلتله كلها على الدخله بتاعته لو اتهزيت شكراً
لو كملت معاه بنسبة 99% هيحاول يفك منك بأي طريقة