كنت عاوز اخد رايكم فى موضوع محتار فيه
من مده عملت حادثه بعربيه والدى و كان متامن عليها رحت ودتها لواحد بتاع سمكره و دوكو يصلحها و كان هو تبع التامين فقالى انا هخلصلك كل ورق التامين و مالكش انت دعوه بحاجه و بعد ما خلص قالى العربيه اتكلفت 1400 جنيه و انا هحاسبه و هو هيجيبلى الشيك من الشركه فى خلال اسبوع
و بالفعل حاسبته لكن هو فضل يماطل عشان يجيب الشيك و يقولى اصل الشركه فيها مشاكل اصلهم مش بيطلعوا شيكات
و بعد شهر او اتنين من المماطله كلمت ابو واحد صاحبى هو اللى كان معرفنى عليه و مودينى ليه و قاله ايه المشكله و ماينفعش كده عشان يخلصلى الموضوع
كام يوم و لقيت السمكرى ده بيكلمنى و بيقولى تعالى خد فلوسك المهم رحت و انا مستغرب ازاى هو اللى صرف الشيك قلت مش مشكله المهم اخد فلوسى لقيته بيدينى 1000 جنيه فبقوله انا ليا 1400 جنيه قاللى انا دافعلك الفلوس دى من معايا عشان انت مستعجل عليهم و اما يطلع الشيك هبقى اديهولك و تصرفه و تاخد ال 400 جنيه بتوعك و ترجعلى فلوسى (ده باعتبار انى مختوم على قفايا)
المهم قلت نص العمى و لا العمى كله و بعد كده فضل برضه يماطل فى موضوع الشيك مع انه المفروض خو على كلامه هو اللى يجرى ورايا و ورا االشيك لانه هو كده اللى ليه فلوس
المهم رحتله لقيته بيتكلم باسلوب مش كويس و عصبنى فقلتله الفلوس لو ما رجعتش فى خلال اسبوع هتشوف انا هعمل ايه لقيته بيقوللى و لا هتقدر تعمل حاجه و اللى عندك اعمله قلتله انا مش هرد عليك احتراما للراجل اللى معرفنى عليك اللى هو ابو صاحبى
بس بجد الموضوع ده حارق دمى انى اتنصب عليا فى 400 جنيه و عاوز اعرف هو ممكن يطلع الشيك و يصرفه هو و لا ايه و لا نصب عليا ازاى
المهم انا كنت بفكر اليومين دول فى حاجه انا عربيتى محتاجه ترش الاكصدام الامامى و الخلفى فكنت بفكر اروحله او اخلى واحد صاحبى اللى يروحله و بعد ما يخلصها ما اديلوش فلوس بس مش عارف كده حلال و لا حرام ياريت تفيدونى بس انا بفكر ما اخذ بالقوه لا يسترد بغير القوه