الموضوع: تسريب في المياه الخضراء

المشاركة الأصلية كتبت بواسطة elakawy

السلام عليكم ورحمه الله وبركاته
من كام يوم لاحظت خروج كمية بسيطة من المياه الخضراء من الفتحة الموضحة بالصورة بس ده لما بتكون العربية باردة ولما بتسخن المياه اللي على الفتحة دي بتتبخر وبتنشف ولما العربية بتبرد تاني بتخرج المياه من الفتحه تاني بكمية بسيطة اوي .
كنت عايز اعرف ايه هي الفتحة دي وايه الأضرار الناتجة عن المشكلة دي وازاي اعالجها ؟؟
وشكراً

[aldl]http://www14.0zz0.com/2010/03/26/19/307869699.jpg[/aldl]

دي يا باشا اسمها (طبه) والموتور فيه 8 طبات تقريبا ( 4 امامي و 4 خلفي ) اللي في الصوره دي واحده من الطبات الاماميه
وسعر الطبه دي 5 الى 7 جنيه الواحده وموجوده ومتوفره عند بتوع قطع الغيار وتركيبها سهل جداااااااا لانها بتركب كبس بعد نطر القديمه طبعا , وتأاكل الطبات ده بيحصل عادي كل كام سنه حسب الميا الموجوده في دوره التبريد

ملحوظه صغيره : يفضل انك تاخد الطبه القديمه وتجيب نفس المقاس زيها بالظبط عشان تركب صح , وده لان الطبات مقاسات

المشاركة الأصلية كتبت بواسطة mohammad_alshamy

دي يا باشا اسمها (طبه) والموتور فيه 8 طبات تقريبا ( 4 امامي و 4 خلفي ) اللي في الصوره دي واحده من الطبات الاماميه
وسعر الطبه دي 5 الى 7 جنيه الواحده وموجوده ومتوفره عند بتوع قطع الغيار وتركيبها سهل جداااااااا لانها بتركب كبس بعد نطر القديمه طبعا , وتأاكل الطبات ده بيحصل عادي كل كام سنه حسب الميا الموجوده في دوره التبريد

ملحوظه صغيره : يفضل انك تاخد الطبه القديمه وتجيب نفس المقاس زيها بالظبط عشان تركب صح , وده لان الطبات مقاسات

معلش نسيت اضيف حاجه صغيره بس على كلامي

انا كنت سألت محمد عبده عن فايده الطبه دي وعرفت منه انها ملهاش اي لازمه غير ان المصنع كان عمل الفتحات دي في جسم الموتور عشان يقدروا يتحكموا في عمليه الامساك بالموتور على الماكينات اثناء تجميع اجزاءه الداخليه ,, وبعد الانتهاء من تجميع اجزاء الموتور بيقفلوا الفتحات دي بطبه نظرا لانتهاء مهمة الفتحه او وظيفتها

يارب اكون قدرت افيدك واطمنك شويه :-)

المشاركة الأصلية كتبت بواسطة samirayad

لا كده تحليل مش صح من محمد عبده

الطبب دى مش معموله للهدف ده

دى معموله علشان لما يبقى البلوك مليس من الرواسب
تتفور الطبب كلها

وتأخد البلوك تعمله دور تسليك محترم

لضمان جودة دورة التبريد وضمان سريان الميه حول كل غرف الحريق

علشان مفيش غرفه تسلخ بسبب تعرضها للحراره الفائقة الأرتفاع

لو حصل عندها سدد لأى سبب من الأسباب

وبعد تسليك البلوك كاملا وعمل الصيانه الازمه له
بتتركب طبب جديده


وأزاى ملهاش لازمه يامحمد باشا.........؟

طبعا حضرتك مشكوووور على توضيح السبب الحقيقي لعمل الطبب دي

هو محمد عبده قال السبب اللي كنت ذكرته بالحرف الواحد وانا بركب عنده طبب خلفيه بدل اللي كانو عندي , وحبيت بس انقل المعلومه

بس حضرتك نبهتنى لحاجه خلتني اقرف من محمد عبده اكتر , وهي ان محمد عبده معملش اي تسليك ولا تنضيف لأي بلوك , واكتفى بإنه يخلي الناس اللي معاه ينطروا الطبب دي ويركبوا غيرها , مع العلم اني مغير الطبب الخلفيه بالكامل !!!!! لا حول ولا قوه الا بالله

المشاركة الأصلية كتبت بواسطة elakawy

طب ليه ده كل الناس بتشكر فيه اوي

بأمانه محمد عبده مجتهد الى حد ما لكنه فعلا بيفتي كتييييييييير وكمان الناس اللي معاه بيفتوا اكتر منه

وللاسف ان محمد عبده نفسه عليت عشان الصيت اللي معمول عشانه على الموقع بتاعه على النت (زي ما هو بيقول وطبعا هو يقصد المنتدى هنا) ولما بيحب يكروت حد بيكروته ويقلبه في لحظه

ومش بيشبع فلووووس ياجدعااان , والله العظيم كنت برجلش عنده فرامل خلفي وطلعت من عنده وبعدها بساعه رجعتله عشان حاسس ان مفيش فرق (قبل وبعد) فخلى الناس عنده تفك العجل ورا والطنابير (اللي كانت لسا مفكوكه من ساعه) ويكملو شغلهم و طلب منى 70 جنيه ولما قولتله ان ده تكمله شغله قالى بما معناه , ان اكتر حاجه بيكرهها وبتزعله ان حد يفاصل معاه في فلوس وده بيخليه يكرووووت الزبوووون , مع ان العقل والمنطق بيقول ان الشغل اللي عمله من ساعه ده مكنش صح وان تاني مره دي كانت تكمله شغل تبع الشغل الاولاني , وبصراحه انا من بعدها مدخلتش الورشه عنده تاني

وقبلها كان عندي مشكله في الفرامل كانت بتزيئ , وقعد اربع خمس زيارات يقولي التيل وحش ولما غيرت تيل ونفس الصوت فضل موجود فقالي في مشكله في البلي , ولما المشكله طلعت مش بلي قالى نغيير طنابير ورا بـ 450 جنيه , ولما قولتله يشوفلي حل غير ده قالي خلاص نطبع الطنابير والتيل الجديد , وطلع يجري في الشوارع بالعربيه ويضرب فرااااااااااااااااااامل والعربيه تسحف وانا قلبي بيتقطع على المرمطه اللي بيمرمطها للعربيه , وفي الاخر لما قرفت منه روحت لميكانيكي تاني (اول مره اتعامل معاه) و والله العظيم حل المشكله اللي محمد عبده دوخني عليها بـ 10 جنيه عند الخراط , كانت شفه في الطنابير الاماميه واتعملت بـ 10 جنيه

على فكره انا عملت عنده حوار الطبات اللي عند حضرتك ده بس كانت خلفيه طبعا , اخد مصنعيه بس 175 جنيه بالعافيه , وللأمانه انا كنت غيرت قاعدتين موتور في نفس الزياره, بس ما اخدوش منه غير 5 دقايق , رفع الموتور شويه على الكوريك وفك القواعد القديمه وركب الجديده

سامحني لو كنت حكيتلك قصه حياتي وطولت عليك بس والله ده من كتر ما انا فعلا متضايق منه , بس دي اسطوره محمد عبده المزيفه

انا فكرت اعمل موضوع منفصل واقول فيه ان اللي قابله مشكله مع محمد عبده يقول ويشارك بحكايته , وانا متوقع هلاقي بلاوي بتتقال عنه (واكيد هنلاقي كلام كويس بردو) , بس بصراحه انا مش بحب امشي في قطع عيش حد وكمان مش حابب اعمله شهره اوسع وانا مش واخد بالى

سامحني على الاطاله