-
مش حتتعلمي غير بالممارسة وتذكري ايام مكنتي بتتعلمي تسوقي بسكلته وشوفي كنتي عامله إزاي .
لو عايزه تدريب صح لازم تعملي حجتين :
-اولاً وثانياً وثالثاً انك تتعودي تبصي في المرايات الثلاثة علي طول (اغلب الي مبيعرفش يسوق بيكون بسبب عدم إستخدامه للمرايات )
- رابعاً بقي حقولك علي فكرة حلوه انا اتعلمت بيها السواقة في الأول (من 15 سنه) .دوري علي منطقة فاضية يكون فيها صينية صغيرة دائرية وإتدربي علي انك تلفي حواليها في اقل محيط ممكن (طبعاً دون ان تحتكي بيها) ثم بعد ذلك إعملي نفس الكلام بالمرشيدار . ثم بعد ذلك إتبعي نفس المنهج بس بعد ما تعكسي إتجاهك (يعني لو في المرة الأولي كانت الصينية علي يمينك خليها علي شمالك و هكذا) وإن شاء الله كله حيبقي تمام وحتبقي زي الفل وتذكري ان فيه ناس بقالها 20 سنه بتسوق بس مبيعرفوش يسوقوا واولهم سائقي التاكسي
-
بصى يا اختنا عايز اقول لك حاجة
انا اول ما ابتديت اسوق فضلت حوالى شهر ارجع من اى مشوار ارمى نفسى جثة على السرير من الاجهاد و شدة الاعصاب
كمان فضلت اكتر من اسبوع بركب العربية لوحدى عشان ما يبقاش جنبى حد يوترنى
و اصعب حاجة عليا فى الاول كانت الركن و دى محتاجة منك شوية تدريب و الحمد عربيتك ابعادها سهلة فى الركن
ما تفتكريش ان اللى بيسوقوا كويس دول عباقرة
كلهم بنى ادمين زيك و فيهم اللى انتى انصح واشطر منه ميت مره
مفتاح السواقة هو الممارسة ثم الممارسة
و فى الاول لازم تهدى اعصابك و مايهمكيش مهما اللى وراكى فضل يضرب فى كلاكسات أو يعلى صوته عشان ما تغلطيش و اعملى الصح مهما كان الموقف و الزحمة
ربنا يسترها معاكى ومع كل بناتنا و اخواتنا
-
مبدئياً زي ما قال انالايزر السواقه ممارسه .. كل ما تسوقي اكتر هاتسوقي احسن ..
تاني حاجه .. انا باسوق من و انا عندي 9 سنين ... (اتعلمت البدايات يعني و انا عندي 9 سنين .. حرك العربيه ورا و قدام .. و شويه شويه ادخل علي الغيارات اول و تاني و هكذا .. الي ان وصلت النهارده مابقتش فارقه حتي لو عربيه حته حديه هاسوقها ) ..
المهم بقي .. بصي ..
حركه الرجلين ...دبرياج و فرامل دي .. هاتتعلميها و هاتاخدي عليها .. لحد ما تلاقي رجليكي بتلعب علي الدواسات اوتوماتيك كده من غير ما يبقي في دماغك .. و هيا دي الممارسه .. المشكله بقي في الجزء التاني و التالت ..
الجزء التاني : القلب الجامد .. و ده بيفرق بين الواد و البنت .. و دي بصراحه ماشفتش بنت قلبها جامد في السواقه .. بس دي برضه ليها حل .. (طبعاُ القلب الجامد مهم في السرعات العاليه ... و حلها انك كده كده مابتسوقيش سرعات عاليه)
الجزء التالت .. و ده الاهم بقي بين الكل .. "تقدير المسافات" .. لازم لازم تكوني بتعرفي تقدري المسافات كويس .. ازاي ؟ يعني .. لو عربيتين واقفين و بينهم مسافه .. المسافه دي هاتدخلك بالعربيه ولا لاء ؟ ... طب لو انا ماشي بسرعه شويه .. المسافه اللي قدامي تكفي اني افرمل ولا لاء ؟ .. و كمان .. لو مثلاً باعدي واحد .. و فيه مقابل جاي .. المسافه هاتجبني و تخليني اعدي اللي قدامي و افادي المقابل ولا لاء ؟ ... المسافات اهم من ده كله ... للأن اي حد هايعرف يغير الغيارات .. انما المسافات باشوف ناس بتعمل حوادث عشان مش عارفين المسافه هاتجيبهم ولا لاء !.. (انا باشوف العجب .. انا شفت كمان واحد سواق تاكسي مش عارف يمشي ريفيرس ! ) ..
مميزات الماروتي بقي .. موتور صغير و حجمها صغير .. و هاتسهل مواضيع المسافات و كده..
و نصيحه بقي .. بلاش تستخدمي مرايات .. لو عاوزه ترجعي لورا .. لفي وشك و امسكي الكرسي اللي جنبك و بصي ورا .. من جوه العربيه كده .. مش عيب .. انا يالل باسوق بقالي كتير ماعرفش استخدم مرايات و مش عايز ..
اخوكي
جون اكس
http://www.nilemotors.net/Nile/showthread.php?t=13779
-
اقتباس
اقتباس
و انا بعرف اسوق (ذى كل البنات اللى فى مصر يعنى )
ما هو باين ان كل البنات اللى فى مصر بيسوقوا زييك[/quote]
ليه بقى الغلط ده
مالهم البنات
اعتقد ان زى ما فى بنات ضعيفه فى السواقه فى شباب برضو كده
هوفين الغلط بس يا سندريلا هانم
مش هى اللى قالت انها بتسوق زى كل البنات
بس متهيألى انتى متأكده ان البنات الضعيفه فى السواقه اكتر بكتير من الشباب
-
اولا : الف مبروك
ثانياً : نداء الى كافة الاخوة الاعضاء 000 نرجوا منكم ابداء النصيحة وليس التريقة ومن لم يستطيع ان يمسك نفسة فعلية الصمت ومن لدية النصيحة فليبدها وبارك الله للجميع
ثالثاً : للاخت العضوة الف مبروك وبارك الله لكى فى سيارتك ، والقيادة لا تأتى بين يوم وليلة بل كما قال بعض الاخوة بالممارسة والخبرة ولكن لابد وان تقودين بهدوء اعصاب ولا تلتفتى للاخرين واجعلى اذنك صماء من كلمات الاخرين ، وحاولى ان تتدربى على يد مدربة محترفة وقودى السيارة وهى بجوارك ، واعلمى ان الكثير ممن يقودون الان فى الشوارع المصرية للاسف بلا خبرة ولا دراية بأصول القيادة ، واتمنى ان يأتى اليوم الذى لا يحصل فية احد على الرخصة الا من خلال مدرسة صحيحة لتعليم القيادة وبأمتحان خالص لوجهة الله دون اى وسايط او كروت او هواتف !!!
وبارك الله فيكى
-
انا لما حابيت اتعلم السواقه قلت لوالدى قالى انا مش فاضى و قالى خد مفتاح العربيه و انزل سوق مع انها كانت نوبيرا و زيرو اتخيلوا الموقف بس الحمد لله العربيه علمتنى لوحدها الانحراف المهم ان ما فيش حد قالى كلمه فى السواقه ولا الركن غير انى كنت براقب الناس و كنت حابب السواقه بجد علشان كده خلال شهر واحد بس منت شبيح خلاص
-
أنا من رأي الجميع السواقه مماااااااااااااااارسه وأهم حاجه في السواقه المرايات وتقدير المسافات ولازم تتعرفي كويس على قدرات عربيتك عسدشان تقدري المسافات صح لكن الأفضل أنك تستعيني بالله أولا ثم إحدى صديقاتك ...لأ بلاش صديقاتك لحسن هيعلموكي زي مابيسوقوا تبقى المصيبه أكبر ..
إستعيني بأحد أقربائك الرجال اللي بقالهم مده بيسوقوا في مصر وخليه يدربك أسبوع واحد بس ع السواقه وأساسياتها زي المرايات والرجوع للخلف بسرعه ...الخ وبعدين تبدأي الممارسه وياريت تحاولي بعربيه غير عربيتك وكنت دايما بنصح خالتي أول ماعلمتها السواقه أنها تشتري عربيه 128 127 تتعلم عليها السواقه الأول وبعدين تجيب زيرو ماسمعتش الكلام وجابت فيرنا 2006 زيرو (كانت فيرنا وكانت 2006 وكانت زيرو) وبعد أسبوعين أتنين ماكنش في حته في العربيه من غير بوسه بعضها بارد والأخر حار جدااااااااااا
-
1 مرفق
بصي الكلام الصح انك حسب منطقة سكنك تاخدي العربية وتطلعى على اي مكان فاضي
ولو مش عارفة اماكن فاضية قوليلي ساكنة فين وانا ادلك اقرب مكان ليكي
المهم تاخدي معاكي شوية زجاجات بلاستيك وتمليها مية
وترسمي خط على الارض وتوزعي الزجاجات البلاستيك علية زي متحان السواقة بالظبط
تفضلي توحي وتيج عليهم وتعدي ما بينهم في خطة انتي تكوني راسمها لنفسك
وبعدين تحوطي مثلا 5 زجاجات ورا بعض في خط مستقيم بين كل واحد 40 سم تقريبا
وتتخيلي ان الزجاجات دي الرصيف وتحطي زجاجة من قدام وواحدة تانية من ورا عشان تكون حدود العربية اللي قدامك
وتبقي مهارتك كلها انك تركني بدون ما تخبطي الزجاجات
صدقيني لو قدرتي تركني كويس تبقي عرفتي ابعاد عربيتك ومش هاتبطل منك ولا كلام من ده
بس مانصحكيش بموضوع انك تجربي في مطلع كوبري ده لان العربيات بتيجي ماشية بسرعة عشان تطلع الكوبري
وتكوني انتي طالعة بالراحة ولا واقفة تتسبب في كارثة لا قدر الله
ممكن تشوفي اي شارع من اللي فيه مطالع ومناز حادة وتجربي فيه احسن من الكوبري
هارفق رسم توضيحي لاسلوب وضع الزجاجات على الارض وبيان السيارة اللي قدامك وااللي وراكي
كريم منير
------------------
بيان الرسم التوضيحي النقاط الحمرا تيجي اماكن الزجاجات البلاستيك اللي تحطيها
ومكان الرصيف ده مكان وهمي ترسميه على الارض تحطي جنبه الازايز
والخطين الحمر دول حدود العربيتن اللي قدامك ووراكي وتقدرش تحدديهم بالزجاجات برضه
والاكس الحمرا دي المكان اللي عايزة تركني فيه
شوفي هاتقعدي تركني في اد ايه وصدقيني بعدها هاتكوني بتسوقي ممتازة
وممكن تستعيني بوالد او اخوكي يقف يحذرك ويقللك بينك وبين الحواجز قد ايه
----------
معلش على الرسم بقى ده كروكي كدة عشان تفهمي قصدي بس
-
اهلا و سهلا بيكي معانا في المنتدي
أنا عايزك تجمدى قلبك و تصبرى شوية على نفسك
و كل شىء حتتعلميه و تتقنيه بالممارسة و الأستمرارية
-
10000شكرا على كل الردود و النصايح الجامدة
وحبتدى التنفيذ على طول ان شاء الله
شكرا مرة تانية
Content Relevant URLs by
vBSEO 3.6.0 PL2