رحت النهارده توكيل المقطم (وشكراً لبيشوى وحد تانى مش فاكر اسمه على وصف الطريق) .. علشان أعمل صيانة الـ 5000 آلاف كيلو ، وأنا عندى حاجتين اتنين فقط ملحوظين فقلت أركز عليهم علشان يتعملوا بدل ما أوسع المسائل وفى الآخر مافيش حاجة تتعمل ..
المشكلة الأولى : موضوع عضة المارشيدير الشهيرة ، ودى قلت طالما عرفوا حلها وعملوها مع بيشوى يبقى أكيد هيعملوها معايا (تركيب مجموعة البريك) ، وبقوا يعملوها أوتوماتيك مع أى حد يشتكى منها.

والمشكلة التانية : ودى مش مشكلة عامة وانما تخص عربيتى بس ، والحقيقة هى حاجة بسيطة (فى نظرى) بس قلت نشوفها برضه وهى ان فى المطبات القاسية باسمع صوت زى عود قصب بيتكسر كده، جاى من عند العجلة الأمامية شمال والحقيقة الصوت ساعات باسمعه وساعات مش باسمعه ، فقلت له عليه وتوقعت يكون تربيط عفشة أو بالكتير جلبة مقص واللا حاجة.

كنت هناك الساعة 10.30 صباحاً تقريباً واستقبلنى مدير الاستقبال م. محمد عبد الحى مقابلة كويسة جداً وأخد ملاحظاتى وعاين العربية وسجل ملاحظاته (عن الخدوش وخلافه) فى جهاز معاه ودخلوها الورشة ، وقال لى الاستلام هيكون الساعة اتنين ..

قعدت فى الاستراحة والوقت جرى والساعة بقت 3 ومافيش حس ولا خبر ، فرحت للمهندس محمد عبد الحى وسألته عن سبب التأخير ، فقال لى ان فيه مشكلة هتحتاج شغل أطول وهى ان صوت الخبطة الأمامية سببه ان المساعد الأمامى ضرب وجايب زيت ولازم يتغير ، وهيكلفنى 550 جنيه ، طبعاً اتصدمت ، فقلت له دى العربية فى الضمان ويادوب عاملة 5000 كيلو ، قال لى مفهوم بس ضمان المساعدين مدته 3 شهور فقط ، قلت له امال ضمان الـ 3 سنين ده يبقى على ايه لما المساعدين 3 شهور ، قال لى على الموتور والفتيس .. فاذبهليت أكتر وبقيت مش عارف أقول ايه لأنى حسيت ان الكلام بقى غريب ، فطلبت مقابلة حد من المهندسين وكنت متضايق خصوصاً وان الخبطة دى باسمعها من أول شهر من عمر العربية يعنى حتى لو ضمان المساعد 3 شهور فأكيد ان المساعد باظ بدرى جداً،

دخلت المكتب واتصل م. محمد بمهندس اسمه عمرو فتوح علشان ييجى يقابلنى ، وبعد خمس دقائق لقيته جه وقال لى انه اتكلم فى الموضوع ده مع مهندس اسمه عبد الظاهر وانهم متعاطفين معايا علشان العربية عاملة 5 آلاف فقط ، وقال لى ان فيه محاولات لحل المشكلة بدون غرامات ، وبعد شوية جاء لى مع مهندس اسمه ياسر وقال لى ان الموضوع اتحل وهيقدروا يغيروا المساعد فى الضمان والبركة فى المهندس ياسر فشكرته وقلت له ان العيب ده موجود بالفعل من أول شهر فقال لى انت كنت هتساعدنا أكتر لو كنت جبت العربية أول ما العيب ظهر ، فقلت له دى خبطة بسيطة ويمكن كنت نسيت أصلاً أقول لكم عليها ، فقلت نخليها فى أول صيانة خصوصاً وانى باجيلكم من سفر طويل وشكرته تانى ، والحقيقة ما يفوتنيش إنى أشكر مدير الاستقبال مهندس/ محمد عبد النبى لأنه كان الدينامو اللى ساهم باتصالاته فى سرعة الوصول إلى حل.

المهم رفعوا العربية على الرافعة اللى قدام الباب بره الورشة والفنى فك الكاوتش علشان يغير المساعد والمرة دى أنا كنت شايف الشغل لأنه قدام الباب على عكس لما كانت العربية فى الورشة ما كنتش شايف حاجة، واستلمت العربية قرب الساعة خمسة مساءاً.

وبالنسبة لنتائج الزيارة :
1- مشكلة الخبطة اتحلت بتغيير المساعد.
2- موضوع المارشيدير للأسف ما عملوش الحل اللى عملوه لبيشوى ، والعضة زى ما هي ، والأسوأ انهم رفعوا (علوا) دواسة المارشيدير بحيث انه يفصل بدرى ما تحتاجش تدوس للآخر ، والموضوع ده طبعاً ضايقنى جداً لأن الدواسة عليت وبعد ما كنت باحرك مشط رجلى علشان أدوس عليها ، أصبحت باضطر أرفع رجلى كلها علشان أجيبها من أولها وأدوس عليها ، ومش عارف هم عملوا كده ليه .. على أى حال لنا لقاء فى صيانة الـ 10.000 ان شاء الله.
3- مراجعة سوائل السيارة .. كنت تعبان وجبت آخرى عن الاستلام ومابيصيتش عليها ، بس أنا رايح أصلاً والسوائل مستوياتها طبيعية مش قلقان من الموضوع ده ، بس هابص عليها بكره ان شاء الله.

واللى نقدر نستفيده من الزيارة دى هو :
1- اعمل صيانتك فى مركز كبير على قد ما تقدر وما تستقربش .. لأنى أعتقد انى لو كنت رحت مكان غير المقطم كان ممكن يقفلوا معايا فى موضوع المساعد ، ده ان اكتشفوها من الأصل.

2- حكاية ان ضمان العربية 3 سنين ، دى جملة عامة ، وطلع ان فيه أجزاء ضمانها أقل من كده ، فضمان المساعد 3 شهور فقط ، ودى حاجة برضه تثير الاستغراب ، لأن المساعد المفروض انه من قطع الغيار المعمرة فازاى يكون ضمانه قليل كده؟

3- لو انت مستلم العربية جديد وحسيت بمشاكل أو خبط فى العفشة ، روح التوكيل على طول علشان تلحق لو حاجة عايزة تتغير قبل ما يفوت 3 شهور وتفاجأ ان الضمان خلص.

4- لما تروح تعمل صيانة ما تعتمدش على انهم هيعملوا اللازم وخلاص ، لكن قول اللى تقدر عليه ، ولو تعرف اسم حد من المهندسين هناك اسأل عليه بالاسم واشرح له المشكلة. يعنى أنا لما قلت عندى عضة فى المارشيدير وخلاص ، ماجابش نتيجة ، لكن أعتقد لو ماكسلتش وكنت سألت على المهندس اللى بيشوى قال لنا على اسمه وطلبت منه تركيب مجموعة البريك ، كان الوضع اختلف.

5- برضه لما تكون رايح تعمل صيانة خد معاك حاجة تتسلى فيها علشان الانتظار ممل جدااااااااااً.