.زيارة لعبد الله اوبل

**nourco123** · 02-04-2010 08:50 PM

النهاردة عملت زيارة لورشه عبد الله اوبل المكان ظريف وعبد الله شخصية لطيفة وصنايعية
فى منتهى الجمال
عملى غسيل لدورة الفرامل وصلحت ال abs هوصحيح ساعات بينور لكن مع ذلك شغال
وغيرت سير الكاتينه وبعض اللمض الناقصة... الاشكال طلع ان التكييف بيسرب فريون
واصبح دفايه ونا لسه عامله عند سكارو من شهر ودفعين 375 جنية
المهم فاتورة عبد الله
60 سير كاتينة
20 زيت باور
50 مصنعية
سير الكاتينه مش فاكر اسمه

**فادى محمد** · 02-04-2010 10:22 PM

ع البركه ياباشا .. ارجع لسكارو لو كان عاطيك ضمان وشوف الدنيا عامله ايه ؟؟

**N.a.j.d** · 02-04-2010 11:09 PM

تماام ياباشا ربنا يباركلك فيها والاسعار حلوه

**AbO_FaRaH** · 02-04-2010 11:44 PM

معلش ياباشا ممكن تقولى عنوانه او تليفونه

**haitham gazaly** · 03-04-2010 12:39 AM

عبدالله اوبل ده اللى فى المريوطية برضه

**cayman69300** · 03-04-2010 01:02 AM

السلام عليكم و رحمه الله و بركاته
الاخ الكريم
انا هقول على حاجتين من الاخر

الحاجة الاولى :

استلقى وعدك بقة من تامر على اللى هيعمله معاك .............. لية بقة ؟
لان صوته اتنبح من كلمة اشترى قطع الغيار قبل ما تروح لعبد الله اوبل او لاى حد تانى و وصفلك اتنين فى التوفيقية " الشركة المتحدة و سرور " و كمان قالك على الانواع السيور = جتيس او بوش

الحاجة التانية :

روح لسكارو " اللى هو الكابتن " و ادخل علية بكل حمشنة و قولة
اية الحكاية يا بية .........
حاجة غريبة حصلت فى التكييف بعد ما حضرتك شحنتة .........
هيقولك خير هو حصل اية .......
قولة حاسس ان الكباس مش شغال ......
هقولك هنشوف .........
و بعد ما يشوف هيقولك لا الحكاية شحنة فريون .......
هنا بقة ادخل فية شمال """ مش ممكن & دا انت لسة مجرب الدورة & و لسة شحنة & اية الحكاية "" المهم اعملوا بالو و خلية على دماغة يشحن التكيف تانى
و يكشف التسريب من انهى حتة
و شكرا
و ربنا يقويك على تامر
و سلام

**nourco123** · 03-04-2010 01:47 AM

مساء الفل على الجميع
اولا- انا اتصلت بالراجل اللى اشتريت منه العربية واللى صلحت عن طريقة التكييف وقاللى ادينى يوميين لانى رايح اعمل شغل هناك وحتفق معاهم علشان اروح الصلح التكييف.
ثانيا- بالنسبه ل abs اللمبه كانت بتنور وتطفى والفرامل كانت محجرة .. فغيرنا زيت الباكم
واخدنا هوا وطلعنا جربنا .. العربيه هايلة وشغالة ومع ظهور لمبه ال ABS منورة ولكن كانت شغالة
ثالثا- عنوان عبد الله - فهو للى جى من الجيزة ياخد فيصل كله الى اخره حتى يرى الكوبرى الجديد
فوقة يتجة يمين وحتبقى ترعة المريوطية على شمالكم ناخد السكة للأخر وقبل الوصول الى مطلع الدائرى حيبقى (فلفلة)على اليمين محدش يطلع لكن يخش من تحت الكوبرى يمين وفى المشى حتلاقوا
مغسلة هو فى الشارع اللى قبلها يمين تسأل هناك الف من يدلك لان بذلك تكونوا وصلتم
المكان والشارع مرصوف والسكه سهلة
4- نيجى لموضوع السيور- انا لما اشتريت العربية البايع قاللى انه غير السيور بس انا كنت عايز
اطمن وفعلا هو فك كل حاجة على شان اطمن على السيور وفعلا انا محظوظ لان سير الكاتينه كان
على وشك القطع وغيرته من عنده - موضوع ان اشترى سير من بره موضوع صعب ياجماعة
الا اذا كنت حاطط فى دماغى ان اغير سيور كذا وكذا فنشتريهم براحتنا ونروح لكن انا مش حاطط فى دماغى تغير سير الكاتينه واجده مقطوع وعلى وشك النهاية - استحالة انى اسيب العربية واخد ناكسى
والمكان هناك صعب تجد فيه وسيلة مواصلات الا الميكروباس زى افلام زمان تلاقى الناس قاعدة
على حجرك وواحدة طالعة بجبنه اومش اوفسيخ يعنى من الاخر اسانس f ولا واحدة تقولك خللى الواد على حجرك لحد ماطلع الفلوس
ولا تلاقى فرخى ولابطه واقفة على كتفك لان المنطقة منطقة فلاحين ولووجدت تاكسى وده مستحيل
تدفعلك مبلغ علشان تروح تشترى السير وانت وحظك اصل وكمان بتوع قطع الغيار مش ملايكه؟؟!!
وبعدين تخيل انك عامل فيها مفتح وتروح ومعاك سير الكاتينه ويقولك النوع ده وحش ولا مش بتاع
العربية .. الموضوع مش سهل ومتنسوش لو حصل حاجة الواحد يرجع له لانه شغله ..
وبعدين اخر حاجة قلت لكم ان الدركسيون عندى تقيل قوى لما بركن.. احنا غيرنا زيت البابور والحال
زى ماهو وان طلمبه الباور عطلانه ومحتاجة تغير وهى فى حدود 850
ودى كانت حكايتى مع الزمان.