النهاردة


كنت في ميت غمر بجيب أدوية للصيدلية
وراجع
طالع كوبري ميت غمر ..وقدامي عربية ميكروباص ..وقدام الميكروباص عربية ملاكي
إديت إشارة ورعشت النور وطلعت أعدي الميكروباص
فجأة
بتاع الميكروباص راح كاسر علشان يعدي
حدفت نفسي شمااااااال وإيدي على التلكس علشان الحمار ياخد باله
كسر عليا برضوو وعدى
وطبعا كان فيه عربيات جاية في المقابل..وإلي في وشي على طول بيرعشلي نور
علشان كنا 3 عربيات ماشيين جمب بعض على الكوبري
ربنا ستر
ومحصلش حاجة ..قرصت وجبت الميكروباص وكسرت عليه وقفته
(أنا عامل لوحات سودا ..وبادج النيابة العامة)
نزلت وفتحت باب الميكروباص وسحبته بره العربية
وللأمانة
ماحصلش ضرب ..الموضوع كله إني شتمته ومسحت بكرامته الأرض
سواقين ميكروباص معديين
نزلوا وكانوا عاوزين يمسكوا فيا..علشان بيجاملوا سواق الميكروباص

وبكل القرف إلي جوايا من الغباء الأزلي بتاع السواقين
شتمتهم كلهم:" وطلع موبايلي وصورت عربياتهم فيديو مع كلمات تهديد ووعيد مني
واحد فيهم إتجرأ ومسكني من هدومي
قولتله:" وحياة أمك هتبات في الحجز النهاردة ..أنا وكيل نيابة زفتى ياعربجي"
فجأة
بدون مقدمات
كلهم إتقلبوا قطط ...معلش ياباشا
ومعلش يابيه ..وإجنا غلابة ..وإحنا بناكل عيش
وكلام من ده


المهم
الموقف إنتهى على كده


حبيت أحكيلكم على الموقف من باب الفضفضة
...تعرفوا
زمان الواحد كان مؤدب ومحترم وبيخاف إنه يحتك بسواقين الميكروباص وغيرهم
بس مش عارف الواحد بقا مش هامه حاجة ليه؟؟
المهم
الموقف إنتهى على كده


حبيت أحكيلكم على الموقف من باب الفضفضة
...تعرفوا
زمان الواحد كان مؤدب ومحترم وبيخاف إنه يحتك بسواقين الميكروباص وغيرهم
بس مش عارف الواحد بقا مش هامه حاجة ليه؟؟
.............
حاجة تانية بقا عاوز أقولكم عليا
بعد تظبيط العربية من جوه ومن بره..أنا عملت شغل فيها من جوه
أجمل مايكون ..والحمد لله ..وعامل موضوع في ألبوم سيارات الأعضاء لو تحبوا تتفرجوا

المهم
بعد لما العربية خلصت ..حصلت كام حاجة مش ولا بد

الكاوتش إتقطع ..وعملت له شنبر داخلي
أخدت حكة -وهيا واقفة-في الاكصدام الامامي والخلفي
الساعة بتاعتي إتكسرت
الموبايل وقع في كباية الشاي ..وبيتصلح دلوقتي
شاحن الاب توب فصل ..وروحت إشتريت واحد تاني
رفين إزاز إتكسروا عندي في الصيدلية
ضاع مني 200 جنيه ..مش عارف ضاعوا فين

وده كله ..في خلال يومين بس


الحمد لله