الموضوع: تغيير زيت الفتيس الأوتوماتيك كل 30000 كم (معلومة أكيدة من التوكيل)

المشاركة الأصلية كتبت بواسطة أبو عمار

إخوانى الأوبتراويه
إمبارح سألت مهندس معرفة فى التوكيل عن تغيير زيت الفتيس الأتوماتيك لعربيتى الأوبترا خصوصا إنى عامل 42000 كم الآن فقالى التغيير على 30000 كم قولتله مش 60000 كم قالى ده فى المانيوال
رحت إمبارح لأخصائى صيانة أتوماتيك عندنا فى إسكندرية و بالفعل غيرلى الزيت ( أخدت 4 ك زيت موبيل 120 جنيه إجمالى ) و و نضف لى الفلتر بتاع الجيربوكس و الكارتيرة بتاعت الفتيس بالبنزين و الهواء (مصنعيه 40 جنيه و 10 جنيه إكرامية) و للعلم الفلتر كان فيه عكارة كتير و كمان الزيت ما كانش نضيف
فحمدت ربنا إنى عملت الصيانة للجيربوكس و ما غيبتش عليه أكتر من كده
معلومة جميلة و مش جديدة بالنسبة لى بس المهندس صلاح صاحب الورشة أكدهالى
إن الفتيس بتاع الأوبترا هو هو بتاع الكورولا الشكل القديم (2005) و قالى كمان تعالى إتفرج
دخلت المخزن لقيت ما شاء الله جيربوكسات أشكال و ألوان كلها إستعمال خارج
و قالى ده الجيربوكس بتاع الأوبترا و الكورولا و تمنه إستعمال خارج بالضمان 3000 جنيه فقط
و قالى بإذن الله مش هتحتاج تعمل فيه حاجة لإنه محترم جدا و هو معاه أوبترا أتوماتيك 2010 الرياضية و بيقولى العربيات دى ما حدش يعرف قيمتها إلا إلى يشتغل فيها

المشاركة الأصلية كتبت بواسطة Hosam_Optrawy

شكرا جزيلا يابو عمار على المعلومه

مع ان مكتوب فى كتيب الضمان ان سائل وفلتر الفتيس الاوتوماتيك يتم استبدالهم عند 60 الف

بس على فكره مكتوب فى الكتالوج ان الفتيس بياخد 5.77 لتر ممكن يزيدوا او ينقصوا فى حدود 0.2 لتر

وينصح باستخدام esso jws 3309 او total fluid iii g

المشاركة الأصلية كتبت بواسطة hse920

انا كمان كنت فى التوكيل بعمل صيانه ال 25000 وطلب منى انى ارجع تانى على ال 30000 الف اغير الزيت بتاع الفتيس ومش استنى لحد صيانه ال 35000
وكمان قال انى لازم اغير تيل الفرامل كل 15000
بالمناسبه فيه فرع صيانه جديد فتح فى الاسكندريه هوه مش جديد اوى لانه من شهر ونص تقريبا بس انالسه عارف امبارح
موجود فى اخر شارع 45 مع تقاطع شارع مصطفى كامل
مش لازم هناك حجز لانه لسه جديد ومش فيه اى ضغط انا عملت صيانه ال 25000 فى اقل من ساعه وكنت واقف قدام العربيه

المشاركة الأصلية كتبت بواسطة أبو عمار

حسام باشا بوب الشيفروليه
لا شكر على واجب يا باشا ده ما يجيش حاجة فى ذوقك و كرم أخلاقك
موضوع الـ 60000 كم عاوزة تتأكد تانى من التوكيل مع إنى سألت المهندس محمد البرماوى فى فرع سموحه
و بالنسبة لموضوع اللترات
زيت الفتيس مش بينزل كله عند التغيير بيفضل شوية فى الـ converter و بيختلفوا من جير لآخر
و بالنسبة لنوع الزيت فى التوكيل بيستعملوا الـ Mobil

المشاركة الأصلية كتبت بواسطة dark_smoky

علي فكرة في منصور التجمع الخامس بيسخدمو شل مش موبيل
يعني موضوع ان التوكيل بيبقي موصي بنوع زيت معين ده مش حقيقي

المشاركة الأصلية كتبت بواسطة ahmedsalim_2010

السلام عليكم جميعا
يا جماعة الموضوع دة مهم جدا وانا سألت فية قبل كدة ومحدش جاوبني
ياريت حد متخصص يرد علينا عشان طبقا للتجارب مش كل اللي بيعملة التوكيل بيكون صح.
عن تجربة انا واحد صاحبي معاة هوندا سيفيك اوتوماتيك وغير الزيت وعملة مشكلة في الفتيس وهو قالي ماتغيروش لو ناقص زودة بس
طبعا انا محتار علميا الكلام دة مش مظبوط لأن الزيت اكيد لزوجتة بتقل وخواصة بتتغير لكن التجربة العملية حاجة تانية ياريت حد يفيدنا بالأتي:
- نغير الزيت ولا نزود بس
- لو نغير نغير بنوع اية وكل اد اية
- ياريت حد يفيدني بخصوص باقي الزيوت (الباور والمحرك) من حيث المدة وافضل الأنواع واسعارها

شباب
في حاجه مش مظبوطه في الكلام
التوكيل بيستغل ملاك العربيات اقصي استغلال
يعني المصنع اللي انتج العربيه و الحق معاها كتيب الخدمه و الضمان مش بيفهم و هما اللي اساتذه؟
انا شايف استغلال واضح جدا جدا
ممكن تقرو الموضوع ده و تشاركو فيه لو حبيتو
http://www.nilemotors.net/Nile/14008...post3872542087

المشاركة الأصلية كتبت بواسطة أبو عمار

و الله محتمل بس للأمانة الفلتر ماكانش نضيف و الزيت كمان كان لونة غامق

و الموضوع مش مكلف ده كله 170 جنية كل 30000 كم و تشترى دماغك من الجيربوكس

انا قريب ان شاء الله اجمع شويه حاجات كده بس و هعمل موضوع كبير عن الصيانات و سياسه الخوف و الرعب اللي التوكيلات ممشيه الناس بيها
اصبرو عليا شويه و هتلاقو الموضوع ان شاء الرحمن في القسم العام
و هبقي احط لينكاته هنا في الموضوع ده و نتناقش في الموضوع من طق طق لسلامو عليكو