مشروع مبارك لاسكان الشباب (المزايا و العيوب)

**hussein** · 16-01-2008 08:15 PM

خصوصا الاستاذ حسام كرم والذى بدأ الحديث عن المشروع فى الموضوع التالى

من واقع الصوره اللى الاستاذ حسام حططها يتضح الاتى
امبنى تشطيبه سئ ونلاحظ فيه الاتى
1- علب الكهرباء البلاستيكيه (البواطات) موجوده فى الواجهات رغم انها المفروض تكون بعيده عن المطر علاوه على سوء شكلها (دى طبعا مبتحصلش حتى فى المبانى الشعبيه باستثناء علب الكهرباء الرئيسية)
2- السلم:
واضح كده ان تشطيبه اى كلام و معمول مزايكو من اللى انقرض من 30 سنه
3- الشبابيك: صغيره جدا (من عيوب نظام الحوائط الحاملة) ودا هيخلى الشقه على طول ضلمه (الكلام دا واضح اوى فى الصوره) وكمان الشبابيك من الخشب السد يعنى مافيش شيش (مش هيخشلك هوا الا لو فتحت الشباك)
4- الواجهات:طرطشه رديئه جدا (بالذمه دا شكل مبنى جديد عاملها شركة محترمه؟؟؟)
نيجى للشقة من الداخل
المساحة 63 م2 : مساحة جيده جدا شرط حسن التقسيم
طب تعال نحسبها كده
1- 2 غرفة نوم 3م * 3م = 2*3*3=18
2- رسبشن =3.5*3.5=10.5
3- مطبخ = 2.5 *2.5 =6.25
4- حمام =1.5 *1.5 = 2.25

الاجمالى 37 م2
وهنفترض ان الحوائط 15% من اجمالى المساحة
اذن المساحة الكليه = 37 *1.15 = 42.5 قول43 م2 يبقى فين ال 20 م2 اللى ناقصين ؟؟!!!!!!!!!!
ملحوظات سريعه:
1- غرفة النوم الرئيسيه (3 *3) تعتبر صغيره جدا جدا
2- حمام وحيد 1.5 * 1.5 يعتبر صغير جدا
3- التوفير فى المبنى عالى جدا الى حد الاخلال بالمواصفات
يعنى الحمام نصه بس سيراميك؟؟؟و المطبخ مفيهوش سيراميك غير فوق الحوض؟؟
4- مفبش بلكونه للشقه ليه؟؟ طب اللى عايز ينشر هدومه ينشرها فين؟
5- مفيش سلم للسطوح يعنى اللى عايز يركب دش يركبوا فى الجنينه!!
نيجى للفلوس
الشقه دى تكلفتها حتى التشطيب النهائى لا يتعدى 20 الف جنيه على احسن تقدير (نسيت اقول ان انا مهندس مدنى ودى اصلا شغلتى)+الخدمات وتشمل كهربا و مياه و جناين وطرق و صرف حوالى 6 الاف قول 10 الاف
يعنى التكلفة كلها لن تزيد عن 30 الف جنيه بس لسه تمن الارض
اللى هو لن يزيد على 100 جنيه للمتر وبافتراض ان هيبنى على 20% من الارض والباقى هيبقى شوارع و جناين 80%
اذن كل متر فى المبنى هيتحمل عليه 4 م2 خدمات
يعنى نقدر نقول ان المتر فى المبنى تمنه 100 جنيه + 400 خدمات = 500 جنيه
لكن المتر فى المبنى عليه دورين يبقى كل متر فى السقة هيكون تمنه 500/2=250 جنيه
يعنى تمن ال 63 متر = 63* 250=15750 جنيه قول 16 الف
اجمالى التكلفة= 20+10+16=46 الف جنيه
هو هيبيع ب 58 و 68
صافى مكسبه= (58-46)+(68-46)= 34 الف جنيه للشقتين
هيبيع 30 الف شقة
اجمالى مكسبه = 30000 شقه * 34000/2= 510 مليون جنيه !!!
مش بس كدا لأ الحكومه هتديلو على كل شقة 10000 جنيه فى صورة دعم للمواطن !!!!
يعنى هتديلو 30000*10000=300 مليون جنيه من اموال الشعب الغلبان اللى مش لاقى ياكل يعنى ادعم ساويرس والغى الدعم على كل حاجه فى مصر
التقسيط
هيخلى تمن الشقة 140 الف جنيه مش 100 الف و احسبوها
خلاصة الكلام
1-لايزال الشعب المصرى يتلقى اسوء انواع الخدمات فى كل المجالات تحت ستار الدعم الذى هو فى الاساس سبوبه لناس تانيه كبيره
2- طبعا اللى بالنسبه له الشقه مناسبه يتوكل على الله ويستخير لأنه اكيد شايف ان دى احسن المتاح
3- بالنسبه لموضوع ان مفيش اساسات خرسانيه دا كلام لا يصدق ولكن لكى يطمئن قلب المشترى ممكن يزور الموقع و يلقى نظره عل اى مبنى فى مراحله الاولى لكى يتأكد بنفسه
4- الحوائط الحامله نظام انشائى محترم و فى مبانى فى اوربا 20 دور من الحوائط الحاملة
ولو حد عندو اى استفسار فى اى موضوع يخص المبانى ممكن يسأل
حسين عزام

**Hassan Khalil** · 17-01-2008 12:02 AM

بالنسبه لموضوع ان مفيش اساسات خرسانيه دا كلام لا يصدق ولكن لكى يطمئن قلب المشترى ممكن يزور الموقع و يلقى نظره عل اى مبنى فى مراحله الاولى لكى يتأكد بنفسه

شاكرين للتحليل الفني يا بشمهندس ..
و فعلا الواحد بيحمد ربنا علي نعمة وجود الناس حواليه في مختلف المجالات ..و ادينا بنقوم بقضاء حوائج البعض .
و فعلا ..لم يتبق الا الزيارة للمشاهدة علي الطبيعة ..و الله الموفق

**eng_mkhalaf** · 17-01-2008 09:35 AM

مهندس حسين عزام مشكور جدا وكفييت ووفيت - بارك الله فيك وقدرك على فعل الخير وجعلة فى ميزان حسناتك

**حسام كرم** · 17-01-2008 09:37 AM

شاكرين جدا يا بشمهندس حسين على تحليلك الرائع ولى بعض الايضاحات
- العلب الموجوده فى الواجهه بجوار جانبى الشقه مباشرة ديه علب للعداد والى فى النصف ديه انا مش عارف وضعها ايه بس فعلا يبدو انها علبه كهرباء زى ماانت قلت
- السلالم فعلا مزايكو فى الصوره ولكن هناك بعض الوحدات سلالمها رخام جيد وبصراحه انا مش عارف السر فى كده
- طرطشه الواجهة توجد وحدات جيده والوانها فاتحه وتسر العين وتوجد وحدات سيئه واعتقد ان السر فى ذلك قد يرجع الى انه يتم اسناد اعمال المقاولات لمقاولين من الباطن وكل واحد على حسب ضميره
- الشباك بالفعل ضيق ولكن الشيش مش مصمط هو مفتوح بفتحات طوليه ضيقه ولكن حضرتك مش شايفها فى الصوره والتساول لحضرتك هل لو تم زيادة مسافه الشباك وتوسيعه هناك خطر على السقف خصوصا ان القبب مبنيه بالطوب وليس المسلح وما هو المحتمل حدوثه عند فتح شقتين على بعض وازاله جانب من الحائط هل ينهار السقف بالكامل ام لا
- فعلا لايوجد مكان مناسب للنشر ولايوجد حتى منشر واعتقد انه يمكن تركيبه فى الدور العلوى بس السفلى بصراحه انا مش عارف ولا حتى مهندسى الشركه الحل ايه
- بالنسبه للتهويه الوحدات كلها مصممه على ارض الموقع بحيث تسمح بدخول الهواء والاضاءه من جميع الجوانب وهذا ما لمسته بنفسى عند زيارة الوحدات فكلها مضاءه جدا بالنور الربانى
- الصاله 3.5*3.5 = 12.25
يوجد طرقه حوالى 3*1 =3
التشطيب فعلا غير جيد بعض الشيى ولكن لاننسى انه اقتصاددى لمحدودى الدخل
بالنسبه للسعر ونظام الدفع هو ليه مائه طريقه ولكن الثوابت هى 15 الف مقدم والقسط لايتعدى ربع المرتب ومثلا فى حالتى انا قارب المبلغ الاجمالى بالتقسيط على 15 سنه 93 الف وليس 140
ومجملا ايه راى حضرتك فى امكانيه توسعة الشبابيك وفتح الشقق على بعض ( رغم ان العقد ينص على عدم اجراء تعديلات )
وايه رايك ايضا فى السعر مقارنة بالاسعار الموجوده الان فى سوق العقارات سواء استثمارى او شعبى او اقتصادى مع اخذ بعض المميزات فى الاعتبار بجوار العيوب كاتساع الشوارع ووجود مساحات خضراء وموقع المدينه
وشكر جزيلا لك

**cpt_shawky** · 17-01-2008 10:22 AM

فين الصور ؟؟

**eng_mkhalaf** · 17-01-2008 10:38 AM

فين الصور ؟؟

+10000000000000000000

**hussein** · 17-01-2008 10:59 AM

واعتقد ان السر فى ذلك قد يرجع الى انه يتم اسناد اعمال المقاولات لمقاولين من الباطن وكل واحد على حسب ضميره

ماهو لو كل واحد و ضميره و مافيش رقابه من الشركة يبقى تعمل حسابك ان هيطلعلك مشاكل فى الشقه (يعنى هتصرف عليها شويه)

ايه راى حضرتك فى امكانيه توسعة الشبابيك وفتح الشقق على بعض

عايز تفتح الشقتين على بعض افتح بينهم ابواب لكن ماتشيلش حيطه كاملة
بالنسبه لتوسعة الشباك دا هيبوظ شكل الواجهه لأنه هيكون فى تكسير و مرمات و كمان فى حاجه اسمها عتبه الشباك(عتبه خرسانيه بتشيل الطوب اللى فوق الشباك) دى غالبا بتزيد عن فتحة الشباك بمقدار 20 سم من كل جانب دا معناه انك متقدرش توسع الشباك الا اذا كانت العتبه زياده عن الشباك ب 40 سم من كل جانب

الصاله 3.5*3.5 = 12.25
يوجد طرقه حوالى 3*1 =3

يبقى لسه فاضل 15 م2

التشطيب فعلا غير جيد بعض الشيى ولكن لاننسى انه اقتصاددى لمحدودى الدخل

ماحنا قولنا مكسبهم كبير جدا و على فكره لو فيه رقابه جيده نقدر ناخد شغل احسن بنفس التكلفة

**hussein** · 17-01-2008 11:11 AM

ومثلا فى حالتى انا قارب المبلغ الاجمالى بالتقسيط على 15 سنه 93 الف وليس

بالنسبه للتكلفة فى حالة التقسيط على 18 سنه زى ماكنت انت كاتب
1- 800 جنيه علشان تقدم
2- 15000 مقدم حاجز
3-43110 اقساط سنويه (2395 جنيه * 18 سنه
4- 24000 اقساط شهريه اول 8 سنوات (250 جنيه * 12 شهر * 8 سنوات)
5-54000 اقساط شهريه فى ال 10 سنين اللى بعدهم (450 *12*10)
--------------------------
الاجمالى =136910 جنيه نقول 140 الف :)

**BASHAR** · 17-01-2008 11:33 AM

المشاركة الأصلية كتبت بواسطة eng_mkhalaf

+10000000000000000000

+11111111111111111111111

**hussein** · 17-01-2008 11:41 AM

وايه رايك ايضا فى السعر مقارنة بالاسعار الموجوده الان فى سوق العقارات سواء استثمارى او شعبى او اقتصادى مع اخذ بعض المميزات فى الاعتبار بجوار العيوب كاتساع الشوارع ووجود مساحات خضراء وموقع المدينه

الميزه الرائعة فى الشقق دى ان جميع المبانى دورين فقط و دى ميزه جامده جدا
و ان شاء الله يكون نسبه الخدمات عاليه يعنى الشوارع واسعة و الجانين كبيره و خطوط المياه و الصرف جيده
اللى ممكن ساويرس يعملو و يكون دى اكبر خدمه للمشترين ان يهتم جدا بالتشجير و المساحات الخضراء مش بس ساعة التسليم لأ طول العمر الكلام دا هيخليها زى الحاب باظبط (عمارات الرحاب مش بتعجبنى بس الاند سكيب بتاعهم رائع ودا اللى مخلى الرحاب اجمالا رائعة)
و الكلام دا سهل تطبيقه يعنى لو ساويرس حط من تمن كل شقة الف جنيه فى البنك هيبقى عندو 30 مليون جنيه يطلعوا قائده سنويه 3 مليون جنيه هيخلو المدينه جنه طول العمر