الموضوع: شكر واجب للمهندس خالد فاروق مع صيانة 10000 للكارينز

بصراحة يا جماعة الراجل ده محترم جداً وزوق جداً.عموما انا اقوللكو التفاصيل افضل. بعد وصولى للتوكيل فى ابو رواش جالى مهندس الاستقبال واستلم العربية وسألنى عن اى مشاكل فى العربية.وقلتلو عن مشكلتين 1-زنة فى باب السائق مع علو صوت الكاسيت 2-صوت تزييق فى الشنطة مع اى مطبات او مدقات. وقلتلو انا عضو فى نايل موتورز وسألت على المهندس خالد قال لى اما فى المكتب او فى الورشة. ودخلت على مكتب المهندس خالد قالولى فى الورشة وهيرجع المكتب حالا.نزلت العيال فى الاستراحة وطلعت ثانى المكتب لاقيت المهندس خالد.سلمنا على بعض وعرفته بنفسى ولاقيته راح مفاجئنى.قال لى عربيتك كارينز اوتوماتيك وانت جاى تعمل صيانة 10000 والمهندس اللى استقبلك اسمه محمد حسين وندهله ووصاه عليا علشان يعملى الخصم بتاع نايل موتورز. ودردشنا شوية فى موضوع الاستاذ شريف اسامة بس الدردشة دى خليها فى الاخر. وقالولى ميعاد الاستلام هيكون الساعة 3.3 عصراً. الساعة 2.3 لاقيتهم بيندهوا على اسمى وبيقولولى العربية خلصت يعنى قبل الميعاد بساعة.وكان مهندس الاستقبال فى الاول قال لى ان التكلفة هتبقى حوالى 400 جنيه(زيت+فلتر+غسيل بالفوم+مصنعية).لكن بصراحة المهندس خالد عملى خصم اكثر من 10% ودفعت 295 جنيه بس وعرفت ان كان المفروض ادفع 385 جنيه وبعد خصم 10% يبقى المفروض 346.5 لكن المهندس خالد بصراحة لاقيته عاملى خصم اكثر ودفعت 295 جنيه بس. استلمت العربية وجربت الكاسيت بصوت عالى لاقيت زنة الباب راحت قلت جميل قوى طب نمشى فى المطبات والمدقات ونشوف اخبار الشنطة لاقيت التزييق راح.قلت طب اشد شوية فى المطبات والمدقات علشان اتأكد بردو ونستنى يومين كده ونشوف لاقيتها 100%.وكالعادة طبعا لازم انسى حاجة اقولهم عليها دائما.نسيت اقول على فرامل اليد قصدى الرجل انها ضعفت بس بصراحة لاقيتهم ضبطوها لوحدهم ولاقيتها بقت على الشعرة بعد ماكنت لازم ادوس عليها للاخر علشان تمسك العربية لو فى منحدر ولا حاجة. الخلاصة انهم ناس محترمين جداً ومعاملتهم كويسة جداً وبصراحة وانا فى الاستراحة حاولت ادردش مع كام واحد واعرف رايهم ايه فى معاملة التوكيل كلهم شكروا ومفيش حد اشتكى. اعذرونى على الاطالة بس حبيت انقل كل حاجة بالتفصيل وابعث برسالة شكر للمهندس محمد حسين اللى استقبلنى بشياكة واحترام والمهندس اشرف اللى قعد اتكلم معايا فى موضوع الاستاذ شريف اسامة بكل تفصيل ورسالة شكر خاصة للمهندس خالد فاروق على ذوقه معايا واستقباله المحترم وعلى الخصم الكبير طبعاً.ربنا يكثر من امثال هذا الرجل واتمناله كل الخير والتوفيق من الله. واسف على الاطالة

الله اعلم يا ا/خالد.بس اكيد هياخدو.