الموضوع: يعنى ايه هاف باور

كلمتين اقولهم لوجة الله بعد ما قريت كل الخلافات، انا مش شايف ان فيه اى حد قال كلمة غلط فى موضوع علبة الديريسكيون والاسكاترا، الخلافات كلها نابعة من خلفية كل منا فى اصلاح سيارته، بمعنى ان مثلا فيه ناس بتطلق كلمة علبة ديريكسيون على كل نظام توجيه سواء كان دودة او جريدة وبنيون، ولو جربت مثلا انك تروح تشترى عبلبة ديريسيون شاهين او اكسنت او لانسر تاجر قطع الغيار هيديلك الشئ الصح لو قلت له عايز علبة ديريكسيون أو لو قلت له سكاترا ، وفيه ناس تانية بتعتبر ان علبة الديريكسيون هى الشئ المكعبر اللى كان موجود فى العربيات القديمة ويعمل بنظام الدودرة، لكن الشئ الطويل الموجود فى العربيات الحديثة اسمه اسكاترا ولا يصح ان نطلق عليه علبة ديريسكيون، هذة كلها اختلافات لفظية تبعا لثقافة المنطقة التى يتعامل معها كل منا لكن أى منها لا يمثل خطأ فنى، زى ما مثلا فى السعودية بيقولو على الكبالن عكوس وعلى البويبنة ديلكو، هل معنى كدة انهم صح واحنا غلط او العكس؟ ولا مثلا الأخوة السكندريين لما يقولوا على الجبنة الرومى جبنة تركى وعلى الطعمية فلافل، هى معنى كدة ان هم او احنا غلط، كلها اختلافات لفظية بحسب الثقافة

وعلشان الخص وجهة نظرى فى الموضوع خلينى اعيد كلام محمد ممدوح وسمير عياد والجميع مرة اخرى فى سطور لكى تكون الصورة واضح بشكل نهائى:

1- علبة الديريكسيون تنقسم ميكانيكيا الى نوعين، واحد بنظام الدودة وهو ما يطلق عليه علبة ديريكيون فقط، وواحد تانى بنظام الجريدة والترس وهو الأكثر شيوعا بشكل ساحق، والبعض يطلق عليه سكاترا فقط والبعض يطلق عليه علبة ديريكسيون والبعض يطلق عليه كلا الاسمين ولا خطأ فى اى من هذا
2- علبة الدريكيسون تنقسم من وجهة نظر المؤازرة(أى المساعدة الميكانيكية) الى خمسة انواع:
1- النوع الأول هو عديم المؤازرة : مثل هذا الموجود فى السيارات القديمة والصغيرة زى ال 128 والماروتى وهو يعمل قوة يد السائق على الطارة فقط بدون اى دعم من الماكينة
2- النوع ذو الموازرة الهيدروليكية اى باستخدام الزيت عن طريق مضخة زيت من المحرك وعلبة ديريكسيون ذات مكابس، ومنها ما هو بنظام الدودة مثل تلك التى كانت موجودة فى ال132 ومنها بنظام الجريدة والبنيون مثل كل السيارات الحديثة
3- النوع ذو المؤازرة الكهربية: وهى فكرة حديثة بدأت تحل فى بعض السيارات الحديثة عن طريق استبدال النظام الهيدروليكى بمحرك كهربائى يحرك منظومة التوجيه مع السائق، ويتوافر فى سيارتا مثل الكورولا والياريس والإلانترا الموديلات الحديثة وتتوجه اليه كثير من الشركات حاليا
4- النوع ذو المؤازرة الهجينة: اى كهربائية مع هيدروليكية وهو نوع استفدت بمعرفته من خلال قرائتى لمشاركاتكم فى هذا الموضوع ولم تتح لى الفرصة بعد للاستزاده عنه لكن واضح من مشاركاتكم القيمة انه مكون من نظام مشترك بين الفكرتين الكهربائية والهيدروليكية
5- الهاف باور: وهو نظام خيالى لا وجود له سوى فى مخيلة تجار سوق العاشر ونصابين السيارات، انا بسمع عنه من اكتر من 20 سنة، وكان بيتقال على الريجاتا والمازدا 323 من الموديلات الغير مزودة بالباور ستيرنج(أيامها كان الباور ستيرنج يوجد فى السيارات العالية مثل ال132 وال504 والمرسيدس)، لكن كل الأبحاث الأركيولوجية والأنثروبولوجية وابحاث الموميوات والحفائر والمقارنات الوثائية للقى التاريخية لم تثبت وجود مثل هذا الهاف باور فى أى مركبة اخترعها الانسان منذ عربة أحمس الحربية وحتى عربة أبوللو القمرية