حد يعرف حاجة عن الoff road trips رحلات خارج الطريق فى مصر

**Sameh** · 09-05-2010 04:52 PM

أنا جربت الموضوع ده بعمق فى السودان عند عطبرة وفى الأردن عند حتة اسمها سواقة ، ومرات تانية بس على خفيف فى مصر فى الصحراء البيضا وبين قفط و القصير وفى السعودية فى رابغ ، وكلهم كانوا لشغل عشان بندور على خامات معينة ، والموضوع ممتع فعلاً وبيحتاج خبرة وحذر لأن الإستهتار فيه ممكن يأدى لمشاكل جادة زى ما قال مينا ، ياما سمعت قصص عن ناس تاهت والجيش جابهم أو راحوا وماحدش جابهم ، وفى سواق لاقوه مجنون بعد كام يوم بعيد عن العربية
الأخطر من السواقة والتجهيزات هو معرفة الطريق ومعرفة طريق العودة أو الخروج لأن أكبر المشاكل فى الصحرا بالنسبة للمبتدأين هو تحديد الإتجاهات السليمة وتقدير المسافات ، لأن كتير جداً بتستهون بمسافة وتبص على جبل قدامك تقول مثلاً ده على بعد 2-3 كم وممكن أمشيها حتى فى حين إن هو على بعد 18-20 كم وانت مش عارف تقدر المسافة عشان المساحة مفتوحة والجبل ضخم فممكن يظهر اقرب من الحقيقة ، وما أسهل إن البنزين والمياه يخلصوا منك وانت بتلف حوالين نفسك أو واخد خط مستقيم بس فى الإتجاه الغلط
بس عموماً من ناحية المتحة هى متعة حقيقية وتجربة غير عادية ده غير التأمل والهدوء بتاع بالليل ومنظر السما وكمية النجوم اللى بتشوفها حتى مختلف ، ودلوقتى فى وسائل تسهل الموضوع أكتر وأكتر زى الجى بى إس وتليفون الثريا
بس سؤالى لمينا ، هل بتقابل مشاكل فى مصر من الناحية الأمنية ؟ يعنى حد بيسألك انت بتعمل إيه هنا ولا حد بيضايقك من العرب ؟

**M!NA** · 09-05-2010 05:19 PM

المشاركة الأصلية كتبت بواسطة sameh

أنا جربت الموضوع ده بعمق فى السودان عند عطبرة وفى الأردن عند حتة اسمها سواقة ، ومرات تانية بس على خفيف فى مصر فى الصحراء البيضا وبين قفط و القصير وفى السعودية فى رابغ ، وكلهم كانوا لشغل عشان بندور على خامات معينة ، والموضوع ممتع فعلاً وبيحتاج خبرة وحذر لأن الإستهتار فيه ممكن يأدى لمشاكل جادة زى ما قال مينا ، ياما سمعت قصص عن ناس تاهت والجيش جابهم أو راحوا وماحدش جابهم ، وفى سواق لاقوه مجنون بعد كام يوم بعيد عن العربية
الأخطر من السواقة والتجهيزات هو معرفة الطريق ومعرفة طريق العودة أو الخروج لأن أكبر المشاكل فى الصحرا بالنسبة للمبتدأين هو تحديد الإتجاهات السليمة وتقدير المسافات ، لأن كتير جداً بتستهون بمسافة وتبص على جبل قدامك تقول مثلاً ده على بعد 2-3 كم وممكن أمشيها حتى فى حين إن هو على بعد 18-20 كم وانت مش عارف تقدر المسافة عشان المساحة مفتوحة والجبل ضخم فممكن يظهر اقرب من الحقيقة ، وما أسهل إن البنزين والمياه يخلصوا منك وانت بتلف حوالين نفسك أو واخد خط مستقيم بس فى الإتجاه الغلط
بس عموماً من ناحية المتحة هى متعة حقيقية وتجربة غير عادية ده غير التأمل والهدوء بتاع بالليل ومنظر السما وكمية النجوم اللى بتشوفها حتى مختلف ، ودلوقتى فى وسائل تسهل الموضوع أكتر وأكتر زى الجى بى إس وتليفون الثريا
بس سؤالى لمينا ، هل بتقابل مشاكل فى مصر من الناحية الأمنية ؟ يعنى حد بيسألك انت بتعمل إيه هنا ولا حد بيضايقك من العرب ؟

معلومات ممتازة....

بالنسبة لسؤالك...

العرب موجودين في سينا... و كذلك حرس الحدود و المخابرات و اللبش دا كله....

لكن احنا بنطلع في الناحية الغربية... صحرا غربية ... واحات... هناك الدنيا لطيفة جدا.. و مفيهاش المشاكل ديه...

**M!NA** · 09-05-2010 06:11 PM

المشاركة الأصلية كتبت بواسطة gmakram

يا مينا متعقدش الناس الصحراء فيها حجات حلوه زى ورق العنب وحجات تانيه كتير مش كدا ولا ايه؟

تقبل مرورى يا صديقى

ماتفكرنيييييييييييييييييش شششششششششش,,,,,

ورق عنب و ممبار كمان...!!!! (و كان ناقص الطاولة و تكمل)

متقبل مرورك المرة ديه زي بعضه...

**M!NA** · 10-05-2010 11:46 AM

المشاركة الأصلية كتبت بواسطة Sameh

من التجهيزات الظريفة اللى ممكن تاخدها وانت داخل الصحرا هى (الشيح)
أيوة الشيح من عند أى عطار
وده ميزته انك لما بتفرشه حوالين الخيمة بيطفش التعابين لأنها مابتحبش ريحته ، بس تقريباً مالوش تأثير على العقارب

من الحاجات الخطيرة بقا فى الصحرا وخصوصاً هنا فى مصر هى الطريشة
الطريشة دى أخطر كائن فى الصحراء المصرية ممكن يتقال فيها قصص وحواديت عشان كدة لازم تعرفوها كويس وأكيد مينا يعرفها كويس ، هى علمياً أفعى مش ثعبان عشان بيبقا فيه فروق فى شكل الأنياب شوية ، ما علينا هى تعبان قصير حوالى 30-60 سم وجسمه تخين وراسه مثلثة وعليها زى قرنين صغيرين أوى وده سبب تسميتها horned viper (أى الأفعى المقرنة) هى لونها زى الرملة ودايماً بتدفن نفسها فى الرمل وتعتمد على إحساسها بالإهتزاز والحركة لأن نظرها ضعيف شبه مابتشوفش تقريباً ودايماً تبقا لفة نفسها مش مفرودة . الخطر فيها إيه بقا ؟ سمها فتاك يقتل فى خلال دقائق بسيطة جداً وبيقولوا مالهاش أى علاج غير بتر مكان العضة فوراً لأن فى الحالة دى يا البتر يا الوفاة وده سبب الخوف الشديد منها
الكويس إنها زى معظم التعابين مش كائن عدوانى بطبيعته يعنى هى بتميل للسكون طول الوقت ولا تهجم إلا إذا تم إستفزازها أو لإصطياد فريسة صغيرة ، وأنا شخصياً افتربت منها لمسافة حوالى 30 سم لإلتقاط صورة لها فى البحر الأحمر ، بس طبعاً ده مش مستحب لأنها لما بتهجم بتهجم عن طريق القفز ، عشان كدة لازم تسيب مسافة كافية دايماً لو حصل وقابلتها
ودى صور ليها من جوجل وهى نفس الشكل بالظبط

مش قصدى أخوف حد ، الحاجات دى نادرة مش بتشوفها على طول ولا حاجة لأنها دايماً مستخبية ، بس ممكن يكون مفيد لو عرفتوا عنها برضه

كلامك مظبوط,,, الطريشة دايما بتستخبى في الكهوف... و بتكون ملفوفة حوالين نفسها....
و في جزء من الثانية ممكن تنط.... قبل ما تدرك أصلا أنها هتتحرك...

بس الحاجات ديه كلها بتعمل بيات شتوي... لأنها من ذوات الدم البارد...

عشان كدا موسم سفاري الصحرا دايما بيكون في الشتا... من أول شهر أكتوبر... و لحد مايو...

بعد كدا مش بيستحب دخولها... عشان الحرارة الشديدة... بالاضافة للكائنات اللطيفة اللي ذكرناها...

من ناحية تانية... عامل مهم جدا... اختيار مكان النوم... و دا بيكون بناء على حاجات كتيرة أوي....

منها البعد عن مصادر الحياة... زي المياة و الزرع...

و أي مخلفات (بقايا أكل أو أي زبالة) لازم تتدفن في مكان بعيد نسبيا عن مكان الcamp

علشان أي ريحة مش طبيعية (كويسة أو وحشة)... بتكون عامل جذب قوي....

من الآخر... أهم حاجة في الصحرا... أنك تكون عارف بتعمل ايه... بناء على اللي تتعلمه من الناس الأقدم منك...

بالطريقة ديه... ممكن تعيش بأمان انشالله سنة كاملة في الصحرا....

**M!NA** · 10-05-2010 12:55 PM

المشاركة الأصلية كتبت بواسطة raouf

ايه يا رجالة احنا كده مش هنلاقى حد يطلع معانا هههههههههههههههههه
دول ليلة او ليلتين مش هنعيش هناك يعنى
صحيح مينا انا نفسى اروح وادى الريان
ايه طبيعة التربة هناك وازاى اروحها وينفع اخد العيلة معايا هناك يعنى فيه اماكن نوم او محلات وكده لان فيه اطفال ولا اروح لوحدى زى الطلعات اللى بنعملها هنا فى الصحراء ؟

مش مستحب يكون معاك العيلة أول مرة...

و طبعا مافيش أي محلات أو أي حاجة غير غرود رملية و جبال من الحجر الرملي...
و البحيرة...

لكن أي مظاهر للحياة... مافيش... ديه صحرااااااااااا

**M!NA** · 10-05-2010 02:18 PM

المشاركة الأصلية كتبت بواسطة Sameh

نصيحة بلاش العيلة خالص ، وبلاش أى سيدات فى الصحراء لأسباب كتير ، انت ماتعرفش انت هتقابل مين ولا شكله إيه

بص يا باشا... هو مافيش بني آدمين أصلا.. و ديه حاجة أؤكدهالك... (زي ما قلنا الكلام ده بيكون ناحية سينا)

وادي الريان ده في النهاية محمية طبيعية...

و الناس الخارجين عن القانون عمرهم ما بيستهدفوا بتوع السفاري... عشان عارفين أنهم مش هيلاقوا معاهم غير جراكن مية و بنزين / جاز ...

كمان الخارجين عن القانون مش بيعرفوا يدخلوا deep desert ... عشان معندهمش المهارات بتاعت الملاحة و الاتجاهات....

و آخر حاجة.... الدخول في الصحرا العميقة بيتطلب احترافية و تكنيك في عبور الغرود الرملية العالية... يعني مش أي واحد معاه 4x4 ممكن يخش صحرا...

حتى لو معاه كل المعدات اللازمة.... الموضوع محتاج تكنيك و خبرة بتكتسب مع الوقت...

و على فكرة فيه ناس كتير جدا بيطلعوا معاهم عائلاتهم و أطفالهم الرضع كمان...

بس أنا بقوله بلاش على أساس أنه أول مرة ييجي يعاين ظروف المكان...

عشان الستات و الأطفال هيلاقوا صعوبة في النوم و الإغتسال و قضاء الحاجة.... (إلا لو كانوا واخدين على الcamping)

الموضوع: حد يعرف حاجة عن الoff road trips رحلات خارج الطريق فى مصر

LinkBack

أدوات الموضوع

عرض

-

-

-

-

-

المواضيع المتشابهه

مقطع رائع لشاحنة ادائها ممتاز خارج الطريق وبأي مكان

صور1 رحلات فريق عمر الصياد-رحلات تسقيط من المكس مع الدرافيل 4/6/2012

حد يعرف حاجة عن الفولكس فاجن إلى كانت فى فيلم بلبل حيران حاجة ؟

محتاج حد يعرف باص رحلات عشان رايحين Arabian nights..

حد يعرف اذاي اجيب اتوبيس رحلات ؟؟

الكلمات الدلالية لهذا الموضوع

المفضلات

المفضلات

ضوابط المشاركة